ކިޔެވް، ޔޫކްރެއިން (މޭ 28) - ޔޫކްރެއިންގެ ކުރީގެ ރައީސް ޕެޓްރޯ ޕޮރޮޝެންކޯ ގައުމުން ފުރުން މަނާކޮށްފި އެވެ.
އެކަން ހާމަކުރަމުން ޕޮރޮޝެންކޯ ވިދާޅުވީ ރަޝިއާގެ ސިފައިންނާ ދެކޮޅަށް ހަނގުރާމަ ފެށި ފަހުން އޮތް ސިޔާސީ އެއްބަސްވުމަށް ސަރުކާރުން ކަމޭނުހިތާ ކަމަށެވެ.
ޕޮރޮޝެންކޯ ރައީސްކަން ކުރެއްވީ 2014 އިން 2019 އަށެވެ. ހަނގުރާމައާ ގުޅިގެން އެމަނިކުފާން ދަނީ ވަރަށް ގިނައިން ބޭރުގެ މީޑިއާއަށް އިންޓަވިއުތައް ފޯރުކޮށްދެއްވަމުންނެވެ.
ޕޮރޮޝެންކޯގެ ޔޫރަޕިއަން ސޮލިޑާރިޓީ ޕާޓީއަކީ ޔޫކްރެއިން ޕާލިމެންޓްގެ ދެ ވަނައަށް އެންމެ ބޮޑު ޕާޓީ އެވެ. އެ ގައުމުގެ އެންމެ ބޮޑު ޕާޓީއަކީ ރައީސް ވޮލޮޑިމިރް ޒެލެންސްކީގެ ވެރިކަން ކުރާ ޕާޓީ އެވެ.
ފެބްރުއަރީ މަހު ރަޝިއާގެ ސިފައިން ޔޫކްރެއިނަށް އެރުމުން، ރަޝިއާއަށް ތާއީދު ކުރާ ބައެއް ސިޔާސީ ޕާޓީތައް ޔޫކްރެއިނުން މަނާ ކުރި އެވެ.
އެހެން ނަމަވެސް ބައެއް ޕާޓީތައް މަސައްކަތް ކުރިއަށް ގެންދަން ފުރުސަތު ދިނީ "ސިޔާސީ އެއްބަސްވުމެއްގެ" ދަށުންނެވެ. އެގޮތުން ހުރިހާ ޕާޓީތަކުން ވެސް އެތެރޭގެ ހިޔާލު ތަފާތުވުން އެއް ފަރާތްކޮށް ހަނގުރާމައާ ދެކޮޅަށް އެއްބައިވަންތަ ވާން އެއްބަސްވި އެވެ.
ނަމަވެސް ހޮނިހިރު ދުވަހު ޕޮރޮޝެންކޯގެ އޮފީހުން ބުނީ އެމަނިކުފާނަށް ގައުމުން ބޭރަށް ދަތުރު ނުކުރެއްވުނު ކަމަށާއި ސަރުކާރުން ސިޔާސީ އެއްބަސްވުމާ ހިލާފުވެއްޖެ ކަމަށެވެ.
ޕޮރޮޝެންކޯ ގައުމުން ބޭރަށް ވަޑައިގަންނަވަން ހަމަޖެހުނީ ލިތުއޭނިއާގައި އޮންނަ ނޭޓޯ ޕާލިމެންޓް އެސެމްބްލީގައި ޔޫކްރެއިނުން ބައިވެރިވާ ވަފުދުގެ މެމްބަރެއްގެ ގޮތުގަ އެވެ. އެކަމަށް ދަތުރު ކުރުމަށް ހާއްސަ ހުއްދަ ވެސް ލިބިވަޑައިގެންނެވި އެވެ.
ދަތުރުގެ ތެރެއިން ލިތުއޭނިއާގެ ރައީސް ގިޓަނަސް ނޯސެޑާ އާއި އީޔޫގެ ޕާލިމެންޓް މެމްބަރުންނާ ބައްދަލުކުރަން ތާވަލުކޮށްފައިވެ އެވެ.
