ވިލިމާލޭ ހޮސްޕިޓަލުން ކުޑަކުއްޖެއްގެ ގަޔަށް މުއްދަތު ހަމަވެފައި ހުރި ވެކްސިން ޖެހި މައްސަލަ އާ ގުޅިގެން އެ ހޮސްޕިޓަލުން ވެކްސިން ޖެހުމުގެ ހިދުމަތް ވަގުތީ ގޮތުން މެދުކަނޑާލާފައިވާ ކަމަށް އެ ހޮސްޕިޓަލް ހިންގާ އައީޖީއެމްޗުން މިއަދު ބުނެފި އެވެ.
މުއްދަތު ހަމަވެފައި ހުރި ވެކްސިން ޖެހި މައްސަލައެއް ފެންމަތިވުމާ ގުޅިގެން، އައިޖީއެމްއެޗުން މިރޭ ނެރުނު ބަޔާނުގައި ބުނީ ހޮސްޕިޓަލުންނާއި ހެލްތް ޕްރޮޓެކްޝަން އޭޖެންސީ (އެޗްޕީއޭ) އިން އެ މައްސަލަ ވަރަށް ސީރިއަސް މައްސަލައެއްގެ ގޮތުގައި ބަލަމުން އަންނަ ކަމަށެވެ.
"މި މައްސަލައިގައި އިހުމާލުވާ ފަރާތްތަކާ މެދު އަޅަން ޖެހޭ ފިޔަވަޅުތައް އަޅާ، މިފަދަ ކަމެއް ކުރިމަގުގައި ތަކުރާރު ނުވާނެ ކަން ކަށަވަރު ކުރުމަށް ޓަކައި އަޅަންޖެހޭ އެންމެހާ ފިޔަވަޅެއް އަޅާނެ ކަމުގެ ޔަގީންކަން އަރުވަމެވެ." އައިޖީއެމްއެޗުން ނެރުނު ބަޔާނުގައި ބުނެފައިވެ އެވެ.
މި މައްސަލައާ ގުޅިގެން ވިލިމާލޭ ހޮސްޕިޓަލުން ވެކްސިން ޖެހުމުގެ ހިދުމަތް ވަގުތީ ގޮތުން މެދުކަނޑާލާފައިވާ ކަމަށް ބުނެފައިވާއިރު، އަލުން އެ ހިދުމަތް ދޭން ފަށާނެ ދުވަހެއް ބުނެފައެއް ނުވެ އެވެ.
މުއްދަތު ހަމަވެފައި ހުރި ވެކްސިން ޖެހި ކަމަށް ބުނެ ވިލިމާލެ ދާއިރާގެ މެންބަރު އަހުމަދު އުޝާމް އާންމުކުރެއްވި ފޮޓޯއިން ފެންނަ ގޮތުގައި އެ ވެކްސިންގެ މުއްދަތު ހަމަވެފައިވަނީ މިއަހަރުގެ ޖެނުއަރީ މަހު އެވެ.
މީގެ ކުރިން، 2018 ވަނަ އަހަރު ތެރޭގައި ވެސް ވިލިމާލެ ހޮސްޕިޓަލުން މުއްދަތު ހަމަވެފައި ހުރި ވެކްސިންތަކެއް ޖެހި މައްސަލައެއް، 2019 ވަނަ އަހަރު ތެރޭގައި ފެންމަތިވެފައިވެ އެވެ. އެ މައްސަލައިގައި އެޗްޕީއޭއާ ގުޅިގެން މައްސަލަ ބެލުމަށްފަހު، ފިޔަވަޅު އަޅާފައިވާނެ ކަމަށް އައިޖީއެޗުން އޭރު ބުނެފައިވެ އެވެ.
