މޮސްކޯ، ރަޝިއާ (މޭ 26) - ޔޫކްރެއިން ހަނގުރާމައާ ގުޅިގެން ހުޅަނގުން ރަޝިއާއާ ދެކޮޅަށް އަޅާފައިވާ ފިޔަވަޅުތައް އުވާލައިފި ނަމަ ކާބޯތަކެތީގެ ކާރިސާގައި އެހީވާނެ ކަމަށް ރައީސް ލެޑިމިއަ ޕުޓިން ވިދާޅުވެއްޖެ އެވެ.
ޕުޓިން އެގޮތަށް ވިދާޅުވީ ފޯނު މެދުވެރިކޮށް އިޓަލީގެ ބޮޑު ވަޒީރު މާރިއޯ ޑްރާގީއާ އެކު ކުރެއްވި މަޝްވަރާގަ އެވެ.
"ގޮދަން އަދި ފާޓިލައިޒާ އެކްސްޕޯޓްކޮށްގެން، ކާބޯތަކެތީގެ ކާރިސާއިން އަރައިގަންނަން އެހީވާން ރަޝިއާއިން އޮތީ ތައްޔާރަށް ކަމަށް ޕުޓިން ފާހަގަކުރެއްވި. އެކަމަކު ދަތިކުރުމުގެ ފިޔަވަޅުތައް އުވާލުމަކީ ޝަރުތެއް،" ރަޝިއާ ސަރުކާރުން ނެރުނު ބަޔާނުގައި ބުންޏެވެ.
އޭގެ އިތުރުން ބައިނަލްއަގްވާމީ މާކެޓުގެ ކާބޯތަކެތީ ސަޕްލައި މަދުވުމުގެ ޒިންމާ އުފުލަން ޖެހޭނީ ރަޝިއާ ކަމަށް ކުރާ ތުހުމަތަކީ ހަގީގަތެއް ނެތް ވާހަކައެއްގެ ގޮތުގައި ޕުޓިން ސިފަކުރެއްވި އެވެ.
އިޓަލީ ސަރުކާރުން ނެރުނު ބަޔާނުގައި ބުނީ ދެ ލީޑަރުންގެ މަޝްވަރާގެ ލަނޑުދަނޑިއަކީ ކާބޯތަކެތީގެ ކާރިސާއަށް ގުޅިގެން ހައްލު ހޯދޭނެތޯ ބެލުން ކަމަށެވެ.
މިދިޔަ ފެބްރުއަރީ މަހުގެ 24 ވަނަ ދުވަހު ރަޝިއާގެ ސިފައިން ޔޫކްރެއިނަށް އަރައި ހަނގުރާމަ ފެށުމުން، ހުޅަނގުގެ ގައުމުތަކުން ވަނީ ރަޝިއާއާ ދެކޮޅަށް ބޮޑެތި ދަތިކުރުމުގެ ފިޔަވަޅުތަކެއް އަޅާފަ އެވެ.
އެ ފިޔަވަޅުތަކާއި ހަނގުރާމައިގެ ސަބަބުން ޔޫކްރެއިނާއި ރަޝިއާއިން ގޮދަން އަދި ފާޓިލައިޒާ އާއި އެހެން ތަކެތި އެކްސްޕޯޓް ކުރުން ވަނީ މެދުކެނޑިފަ އެވެ. ދުނިޔޭގައި އުފައްދާ ގޮދަނުގެ ސަޕްލައިގެ 30 ޕަސެންޓް އެކްސްޕޯޓް ކުރަނީ އެ ދެ ގައުމުންނެވެ.
