ޖެނީވާ، ސްވިޓްޒަލޭންޑް (މޭ 23) - އާއްމުކޮށް މަންކީޕޮކްސް ނުފެންނަ ގައުމުތަކުގައި އެ ބަލި ކޮންޓްރޯލްކޮށް، އިންސާނުންގެ ގައިން އެހެން އިންސާނުންގެ ގަޔަށް ބަލި ފެތުރުން ހުއްޓުވިދާނެ ކަމަށް ދުނިޔޭގެ ސިއްހަތު ޖަމިއްޔާ (ޑަބްލިއުއެޗްއޯ) އިން ބުނެފި އެވެ.
ޑަބްލިއުއެޗްއޯގެ ތަޖުރިބާކާރު މާރިއާ ވޭން ކެރްކޮވޭ ވިދާޅުވީ މިހާތަނަށް ރިކޯޑްކޮށްފައި ވަނީ މަންކީޕޮކްސްގެ 200 އަށް ވުރެ މަދު އަދަދެއްގެ ކޭސްތަކެއް ކަމަށެވެ.
"މިއީ ކޮންޓްރޯލް ކުރެވިދާނެ ހާލަތެއް. ވަކިން ހާއްސަކޮށް މި ބަލި މިހާރު ފެންނަމުން މިދާ ޔޫރަޕާއި އުތުރު އެމެރިކާގެ ގައުމުތަކުން އެކަން ކުރެވޭނެ،" އޭނާ ވިދާޅުވި އެވެ.
"އަޅުގަނޑުމެން ބޭނުން ވަނީ އިންސާނުންގެ ގައިން ގަޔަށް މި ބަލި އެރުން ހުއްޓުވަން. މި ބަލި އާއްމުވެފައި ނުވާ ގައުމުތަކުގައި އެކަން ކުރެވޭނެ."
އޭނާ ވިދާޅުވީ ބަލި ފެތުރެމުން ދަނީ "ކްލޯޒް ކޮންޓެކްޓް" ވެގެން ކަމަށެވެ. މިހާތަނަށް ރިކޯޑް ކުރި ކޭސްތަކުގެ ތެރޭގައި ސީރިއަސް ކޭސްތައް މަދު ކަމަށް ފާހަގަކުރެއްވި އެވެ.
ޑަބްލިއުއެޗްއޯ އެމެޖެންސީޒް ޕްރޮގްރާމްގެ ސްމޯލްޕޮކްސް ސެކްރެޓޭރިއެޓް ބަލަހައްޓާ ރޯޒަމުންޑް ލުވިސް ވިދާޅުވީ މަންކީޕޮކްސްއަކީ މީގެ 40 އަހަރު ކުރިން ދެނެގަނެވުނު ބައްޔެއް ކަމަށާއި ފާއިތުވި ފަސް އަހަރު ވެސް އެފްރިކާގެ ގައުމުތަކުން ޔޫރަޕަށް ދަތުރު ކުރި ބައެއް މީހުންގެ ގައިން މި ބަލި ފެނުނު ކަމަށެވެ.
"އެކަމަކު މިއީ އެއް ފަހަރާ ގިނަ އަދަދެއްގެ ގައުމުތަކުން، އެފްރިކާއަށް ދަތުރު ނުކުރާ ގިނަ ބަޔެއްގެ ގައިން މި ބަލި ފެންނަ ފުރަތަމަ ފަހަރު،" އޭނާ ވިދާޅުވި އެވެ.
އޭނާ ވިދާޅުވީ މި ބަލި އާއްމުކޮށް ފެންނަ ނުވަތަ އެންޑެމިކް ގައުމުތަކަކީ ނައިޖީރިއާ، ކެމެރީން، ސެންޓްރަލް އެފްރިކަން ރިޕަބްލިކް އަދި ޑިމޮކްރެޓިކް ރިޕަބްލިކް އޮފް ކޮންގޯ ކަމަށެވެ.
މި ވައިރަސް މިޔުޓޭޓްވި ކަމުގެ ހެކި އަދި ފެންނަން ނެތް ނަމަވެސް، ވައިރަހެއް އުޅޭތާ ގިނަ ދުވަސްވާ ނަމަ މިޔުޓޭޓްވުމުގެ ފުރުސަތު އޮންނަ ކަމަށް އޭނާ ފާހަގަކުރެއްވި އެވެ.
ޑާބްލިއުއެޗްއޯގެ އިތުރު އޮފިޝަލެއް ކަމަށްވާ އެންޑީ ސީލް ވިދާޅުވީ މިއީ ޖިންސީ ގުޅުމުގެ ސަބަބުން ގައިން ގަޔަށް އަރާ ބައްޔެއް ނޫން ކަމަށާއި ކޮންމެ މީހަކު ވެސް "ކްލޯޒް ކޮންޓެކްޓް" ވެއްޖެ ނަމަ ބަލި ޖެހިދާނެ ކަމަށެވެ.
މީގެ ކުރިން ބައެއް ރިޕޯޓުތައް ބުނީ ގިނަ ކޭސްތަކުގައި ފާހަގަވެފައި ވަނީ އެއް ޖިންސުން ގުޅުން ހިންގާ ފިރިހެނުން ކަމަށެވެ. އެކަމަކު ސީލް ވިދާޅުވީ މިއީ އެފަދަ މީހުންނާ ގުޅުން ހުރި ބައްޔެއް ނޫން ކަމަށެވެ.
"ކޮންމެ މީހަކަށް ވެސް މަންކީޕޮކްސް ޖެހިދާނެ ގައިގޯޅިވެ އުޅޭ ނަމަ ނުވަތަ ކްލޯޒް ކޮންޓެކްޓެއްގެ ގޮތުގައި ހިމެނޭ ނަމަ."
