ލަންޑަން، އިނގިރޭސިވިލާތް (މޭ 22) - އިނގިރޭސިވިލާތުގައި މަންކީޕޮކްސްގެ "ލޯކަލް ޓްރާންސްމިޝަނެއް" އެބަ އޮތް ކަމަށް އިއުލާންކޮށްފި އެވެ.
އިނގިރޭސިވިލާތުގެ އެތެރޭގައި މަންކީޕޮކްސް ފެތުރެމުންދާ ކަމަށް އިއުލާން ކުރީ ގައުމުން ބޭރަށް ދަތުރު ނުކުރާ މީހުންނަށް ވެސް ބަލި ޖެހި ރިޕޯޓުކޮށްފައި ވާތީ އެވެ.
ޔޫކޭ ހެލްތު ސެކިއުރިޓީ އެޖެންސީ (ޔޫކޭއެޗްއެސްއޭ) އިން ބުނީ ބައްޔާ ގުޅޭ އާ ތަފާސްހިސާބު ހޯމަ ދުވަހު ހާމަކުރާނެ ކަމަށެވެ. މިދިޔަ ހުކުރު ދުވަހު އެކަނިވެސް 20 ކޭސް ރިޕޯޓުކުރި އެވެ.
"ހުޅަނގު އެފްރިކާއަށް ދަތުރު ނުކުރާ އަދި އެ ހިސާބަށް ދަތުރު ކުރި މީހަކާ ކޮންޓެކްޓު ނުވާ މީހުންނަށް ވެސް ބަލި ޖެހިގެން ރިޕޯޓުކޮށްފައިވޭ،" ޔޫކޭއެޗްއެސްއޭގެ ޗީފް މެޑިކަލް އެޑްވައިޒަރު ސޫޒަން ހޮޕްކިންސް ވިދާޅުވި އެވެ.
"ކޮންމެ ދުވަހަކު ވެސް ފެންނަ ކޭސްތަކުގެ އަދަދު ދަނީ އިތުރުވަމުން."
އޭނާ ވިދާޅުވީ ބަލި ފެތުރެމުން ދަނީ މީހުން ގިނައިން ދިރިއުޅޭ ހިސާބުތަކުގައި ކަމަށާއި ވަކިން ހާއްސަކޮށް އެއް ޖިންސުން ގުޅުން ހިންގާ ފިރިހެނުންގެ މެދުގައި ފެތުރުން އިތުރު ކަމަށެވެ.
"އާއްމުންނަށް އޮތް ރިސްކު މި ވަގުތު ވަރަށް ކުޑަ. އެހެންވީމަ ހުރިހާ އެންމެން ވެސް އެކަމަށް ސަމާލުވެ ތިބުން މުހިއްމު،" ހޮޕްކިންސް ފާހަގަކުރެއްވި އެވެ.
އިނގިރޭސިވިލާތުން މަންކީޕޮކްސްގެ ފުރަތަމަ ކޭސް ރިޕޯޓު ކުރީ މޭ ހަތް ވަނަ ދުވަހު އެވެ. އެއީ ނައިޖީރިއާއަށް ދަތުރު ކުރި މީހެކެވެ.
މި ބަލީގެ އަލާމާތްތަކުގެ ތެރޭގައި ފުރަތަމަ ހުން އައުން، ގައިގައި ރިއްސުން، ވަރަށް ބޮޑަށް ވަރުބަލިވުން، ބޮލުގައި ރިއްސުން އަދި ކަރުގަ އާއި، ކިހިލުގައި ނުވަތަ އުކުޅުވަޅުގައި ގޮށްލުން ހިމެނެ އެވެ.
ބައްޔަށް ހާއްސަ ފަރުވާއެއް ނެތް ނަމަވެސް، ސްމޯލްޕޮކްސްއާ ދެކޮޅަށް ޖަހާ ވެކްސިނުން މަންކީޕޮކްސް ޖެހުމުގެ ފުރުސަތު 85 ޕަސެންޓު ކުޑަކޮށްދެ އެވެ.
ޔޫކޭގެ އެޑިއުކޭޝަން ސެކެޓްރީ ނަދީމް ޒަހަވީ ވިދާޅުވެފައި ވަނީ ސްމޯލްޕޮކްސް ވެކްސިންގެ ސްޓޮކްތަކެއް އެ ގައުމުގެ ސަރުކާރުން ގަންނަން ފަށާފައިވާ ކަމަށެވެ.
