ވިލިމާލެ ދާއިރާގެ އަންހެނުންގެ ތަރައްގީއަށް މަސައްކަތްކުރާ ކޮމިޓީއަށް މެމްބަރަކު ހޮވުމަށް ބޭއްވި ބައި-އިލެކްޝަންގައި ވޯޓު ގުނީ އެންމެ އިންސާފުވެރިކޮށް ކަމަށް ނުދެކޭތީ ކޯޓަށް މައްސަލަ ހުށަހަޅަން ދިރާސާތަކެއް ކުރެވެމުންދާ ކަމަށް މޯލްޑިވްސް ނޭޝަނަލް ޕާޓީ (އެމްއެންޕީ)އިން މިއަދު ބުނެފި އެވެ.
މި މަހުގެ 14 ވަނަ ދުވަހު ބޭއްވި އެ ބައި އިލެކްޝަން އެމްއެންޕީގެ ކެންޑިޑޭޓް އާމިނަތު ޝީޒާ ބަލިކޮށް ޕީޕީއެމްގެ ކެންޑިޑޭޓް ފާތިމަތު ނާޒިމާ ކާމިޔާބު ކުރީ އެންމެ ވޯޓެއްގެ ތަފާތުންނެވެ. ޝީޒާއަށް 358 ވޯޓު ލިބުނު އިރު ނާޒިމާއަށް ލިބުނީ 359 ވޯޓެވެ.
ބާތިލް ބައެއް ވޯޓުތައް ކަނޑައެޅި ގޮތާ މެދު އެމްއެންޕީން ހިތްހަމަނުޖެހޭތީ އަލުން ހުރިހާ ވޯޓެއް ގުނަން އެ ޕާޓީން ހުށަހެޅި އެވެ. ނަމަވެސް ސުވާލު އުފެދުނު ދެ ވޯޓު ކަރުދާސް އެކަނި ޗެކް ކުރުމަށް ފަހު، އިލެކްޝަންސް ކޮމިޝަން (އީސީ)އިން ނިންމީ ނަތީޖާއަށް ބަދަލެއް ނާންނަ ކަމަށެވެ.
އެމްއެންޕީން ބޭއްވި ނޫސްވެރިންގެ ބައްދަލުވުމުގައި އެ ޕާޓީގެ ނައިބު ރައީސް އަދި ރައްޔިތުންގެ މަޖިލީހުގެ ވިލިމާލެ ދާއިރާގެ މެންބަރު އަހްމަދު އުޝާމް ވިދާޅުވީ ހުރިހާ ވޯޓެއް ގުނުމުގެ ބަދަލުގައި ދެ ވޯޓު ކަރުދާސް އެކަނި ޗެކް ކުރަން ނިންމި ނިންމުން ވެސް އިންސާފުވެރި ކަމަށް ގަބޫލު ނުކުރެވޭ ކަމަށެވެ.
މިކަމާ ގުޅިގެން "އަދަދު"އިން ކުރި ސުވާލަކަށް ޖަވާބު ދެއްވަމުން އުޝާމް ވިދާޅުވީ އިންތިހާބުގެ ނިންމުންތައް އިންސާފުވެރިކަމަށް ނުދެކޭތީ އެކަމުގައި އިތުރަށް އެޅިދާނެ ފިޔަވަޅުތަކާ ގުޅޭ ގޮތުން ޕާޓީގެ އެތެރޭގައި މަޝްވަރާ ކުރެވެމުންދާ ކަމަށެވެ.
މި ގޮތުން މިދިޔަ އަހަރު ބޭއްވި ކައުންސިލް އިންތިހާބާއި އަންހެނުންގެ ގޮނޑީގެ އިންތިހާބުގައި ހައި ކޯޓަށް ހުށަހެޅި މައްސަލަތަކާއި އެ މައްސަލަތަކުގައި އެ ކޯޓުން އިއްވާފައިވާ ހުކުމްތައް ދިރާސާ ކުރަމުންދާ ކަން އޭނާ ފާހަގަ ކުރެއްވި އެވެ.
"ހުކުމްތަކުގައި އެބަ ހުރި އުސޫލުތަކެއް ކަނޑައަޅާފައި، އުސޫލުތަކަށް ބަލާއިރު އަޅުގަނޑުމެންނަށް ކޯޓަށް މައްސަލަ ހުށަހަޅައިގެން ކާމިޔާބު ވާނެތޯ ނުވަތަ ނޫންތޯ އެއީ ސުވާލު އުފެދޭ ކަމެއް، އަޅުގަނޑުމެން އެ މައްސަލާގައި ކުރިއަށްދާނެތޯ ނުވަތަ ނޫންތޯ ކަނޑައަޅަން އެ ހުކުމްތައް އެބަ ދިރާސާ ކުރަން،" އޭނާ ވިދާޅުވި އެވެ.
އުޝާމް ވިދާޅުވި ގޮތުގައި ހުރިހާ ވޯޓެއް ގުނަން އެ ޕާޓީން އެދުނީ ވެސް މީގެ ކުރީ އިންތިހާބުތަކުގައި އީސީން އަމަލު ކޮށްފައިވާ އުސޫލަށް ރިއާޔަތްކޮށްފަ އެވެ. ކުރިން އެއް ވޯޓަށް ވުރެ ބޮޑު ފަރަގުތަކުގައި ވެސް ހުރިހާ ވޯޓެއް އަލުން އެ ކޮމިޝަނުން ގުނާފައިވާ ކަން އޭނާ ފާހަގަ ކުރެއްވި އެވެ.
"އަޅުގަނޑުމެން ގަބޫލު ކުރި ގޮތުގައި މީގެ ކުރިން އިލެކްޝަންސް ކޮމިޝަނުން އަމަލުކޮށްފައި ހުރި ގޮތަށް ބަލާއިރު، ރައްޔިތުންގެ މަޖިލީހުގެ އިންތިހާބުގައި ވެސް ހަތަރު ފަސް ވޯޓުން ނަތީޖާ ކަނޑައެޅި ދާއިރާތަކުގައި ވެސް އަލުން ހުރިހާ ވޯޓު ފޮށިތަކެއް ގުނާފައިވޭ،" އުޝާމް ވިދާޅުވި އެވެ.
މި އިންތިހާބުގައި އެންމެ ވޯޓެއްގެ ފަރަގުން ބަލިވުމަކީ ވެސް ބޮޑު ކާމިޔާބީއެއްގެ ގޮތުގައި އެމްއެންޕީން ފާހަގަ ކުރި އެވެ. މިއަދު ބޭއްވި ނޫސްވެރިންގެ ބައްދަލުވުމުގައި ޕާޓީގެ ރައީސް މުހައްމަދު ނާޒިމް (ކާނަލް) ވިދާޅުވީ އެ ޕާޓީން ވާދަކުރި ޕީޕީއެމް ފަދަ ބޮޑު ޕާޓީއެއްގެ އަތުން ލިބުނު ނަތީޖާއާ މެދު ހިތްހަމަޖެހޭ ކަމަށެވެ.
"އެނގިލައްވާނެ ފަދައިން އަޅުގަނޑުމެން ވާދަކުރީ، ރާއްޖޭގައި 16 އަހަރުވީ، އަދި ގިނަ ދުވަސްތަކަކަށް ރާއްޖޭގައި ވެރިކަން ކުރި، ރާއްޖޭގައި އޮތް އެންމެ ބޮޑު އެއް ޕާޓީއާ، އެ ޕާޓީއާ ވާދަކޮށް އަޅުގަނޑުމެން ނެރުނު ނަތީޖާއާ މެދު ވަރަށް ބޮޑަށް ވެސް ހިތްހަމަޖެހޭ،" މަޖިލީހުގެ ދަނގެތި ދާއިރާގެ މެމްބަރުކަން ވެސް ކުރައްވާ ނާޒިމް ވިދާޅުވި އެވެ.
މި އިންތިހާބު ބޭއްވީ ހުޅުމާލޭގައި ހިނގައިދިޔަ ނުރައްކާތެރި އެކްސިޑެންޓެއްގައި ސީރިއަސް އަނިޔާތަކެއްވެ، މާލެ ސިޓީ ކައުންސިލްގެ އަންހެނުންގެ ތަރައްގީއަށް މަސައްކަތްކުރާ ކޮމިޓީގައި ވިލިމާލެ ދާއިރާ ތަމްސީލު ކުރައްވަމުން ގެންދެވި މެމްބަރު، އައިމިނަތު އީމާން ނިޔާވުމާ ގުޅިގެން އެ ގޮނޑި ހުސްވުމުންނެވެ.
