ކިޔެވް، ޔޫކްރެއިން (މޭ 22) - ޔޫކްރެއިންގައި ކުރަމުންދާ ހަނގުރާމަ ނިމުމަކަށް ގެނެވޭނީ "ޑިޕްލޮމެސީ" ނުވަތަ ބައިނަލްއަގްވާމީ މަޝްވަރާ މެދުވެރިކޮށް ކަމަށް އެ ގައުމުގެ ރައީސް ވޮލޮޑިމިރް ޒެލެންސްކީ ވިދާޅުވެއްޖެ އެވެ.
"ނިމުމެއް އަންނާނީ ޑިޕްލޮމެސީ މެދުވެރިކޮށް. ހަނގުރާމައިގައި ލޭ އޮހޮރުވުން ގިނަ ވާނެ. މިކަމަށް ޔަގީންކަމާ އެކި ނިމުމެއް ގެނެވޭނީ ޑިޕްލޮމެސީ މެދުވެރިކޮށް،" ޔޫކްރެއިންގެ ޓީވީ ޗެނަލަކަށް ޒެލެންސްކީ ވިދާޅުވި އެވެ.
"ބައެއް ކަންކަމަކީ ހަމައެކަނި މަޝްވަރާގެ މޭޒެއް ކައިރިން ހައްލު ހޯދޭނެ ކަންކަން. އަޅުގަނޑުމެން ބޭނުމީ ކުރިން ހުރި ގޮތަށް ކަންކަން އެނބުރި ދާން. އެކަމަކު ރަޝިއާއިން އެގޮތެއް ބޭނުމެއް ނުވޭ."
މަޝްވަރާގައި ޔޫކްރެއިންގެ ފަރާތުން ބައިވެރިވާ އެންމެ އިސް އޮފިޝަލް މައިކާލޯ ޕޮޑޯލިޔަކް މިދިޔަ އަންގާރަ ދުވަހު ވިދާޅުވީ ކުރިން ބޭއްވުނު މަޝްވަރާތަކުގެ އެދެވޭ ނަތީޖާއެއް ނުނިކުންނާތީ މަޝްވަރާތައް މަޑުޖައްސާލާފައިވާ ކަމަށެވެ.
އެ ދުވަހު ރަޝިއާ ސަރުކާރުގެ ތަރުޖަމާނު ޑިމިޓްރީ ޕެސްކޯވް ޔޫކްރެއިނަށް ތުހުމަތު ކުރެއްވީ ހަމަނުޖެހުން ނިމުމަކަށް ގެންނަން މަޝްވަރާ ކުރަން އެ ގައުމުގެ ސަރުކާރުން ބޭނުން ނުވާ ކަމަށެވެ.
"މަޝްވަރާތަކުން ކުރިއެރުމެއް ނުލިބޭ. ޔޫކްރެއިންގެ އޮފިޝަލުން މަޝްވަރާ ކުރިއަށް ގެންދަން ބޭނުން ނުވާކަން އަޅުގަނޑުމެން ފާހަގަކުރަން،" އޭނާ ވިދާޅުވި އެވެ.
ރަޝިއާގެ ނިއުސް އެޖެންސީތަކުން ބުނާ ގޮތުގައި ދެ ގައުމުގެ މެދުގައި އެންމެ ފަހުން މަޝްވަރާ ބައްދަލުވުމެއް ބޭއްވީ އެޕްރީލް 22 ވަނަ ދުވަހު އެވެ.
ރަޝިއާ ސިފައިން ޔޫކްރެއިނަށް އަރައި ހަނގުރާމަ ފެށީ ފެބްރުއަރީ 24 ވަނަ ދުވަހު އެވެ. ވެރިރަށް ކިޔެވް ހިފަން މަސައްކަތްކޮށް ކާމިޔާބު ނުވުމުން މިހާރު ރަޝިއާ ސިފައިން ހަމަލާތައް ދެނީ އިރުމަތީ ސަރަހައްދަށެވެ.
