ޔޫރަޕްގެ ގިނަ ގައުމުތަކުން މަންކީޕޮކްސްގެ ކޭސްތައް ފެނިފައި ވާތީ ބަލި ފެތުރެމުންދާ ގޮތާ ގުޅޭ ތަހުގީގެއް ދުނިޔޭގެ ސިއްހަތު ޖަމިއްޔާ (ޑަބްލިއުއެޗްއޯ) އިން ފަށައިފި އެވެ.
އިނގިރޭސި ވިލާތުން ބަލީގެ ހަތް ކޭސް ރިޕޯޓުކޮށްފައިވާ އިރު، ބުރާސްފަތި ދުވަހު ވަނީ އިޓަލީ އާއި ސްވިޑަންއިން ވެސް ކޭސްތަކެއް ފެނިފަ އެވެ. ޔޫރަޕްގެ އެހެން ބައެއް ގައުމުތަކާއި އެމެރިކާއިން ވެސް ކޭސްތައް ރިޕޯޓުކޮށްފައިވެ އެވެ.
ސިއްހީ އޮފިޝަުން ބުނާ ގޮތުގައި ބައެއް ކޭސްތަކުގައި ބަލި ފެތުރުނީ އެއް ޖިންސުން ގުޅުން ހިންގާ ފިރިހެނުންގެ މެދުގައި ކަމަށް ބެލެވެ އެވެ. އެއީ މި ވައިރަސް ފެތުރޭ ގޮތާ ގުޅޭ މުޅިން އާ ހޯދުމެއް ކަމަށް ސައިންސްވެރިން ބުނެ އެވެ.
އިންސާނުންނަށް މަންކީޕޮކްސް ޖެހުމުން ފެންނަ އަލާމާތްތަކުގެ ތެރޭގައި މުޅި ހަށިގަނޑުގައި ފިއްތަކެއް ނެގުމާއި ހުން އައުމާއި ގައިގައި ރިއްސުމާއި ފިނިވުން ހިމެނެ އެވެ.މިއީ އެފްރިކާގެ ބައެއް ގައުމުތަކުގައި ވަރަށް އާއްމުކޮށް ފެންނަ ބައްޔެކެވެ.
އާއްމު ގޮތެއްގައި ބަލި ފެތުރެނީ ވައިރަހުން އިންފެކްޓްވެފައިވާ މީދާ ނުވަތަ ރާމާމަކުނު ފަދަ ތަކެއްޗާ ކައިރިވުމުންނެވެ. އިންސާނުންގެ ގައިން އެހެން އިންސާނުންގެ ގަޔަށް ބަލި އެރުން އެހާ ފަސޭހަ ނޫން ކަމަށް ކުރިން ސައިންސްވެރިން ބުންޏެވެ. މި ބަލީގައި މީހުން މަރުވަނީ ވަރަށް މަދުންނެވެ.
