ރަޝިއާގެ ސިފައިން ޔޫކްރެއިނަށް އަރައި ހަނގުރާމަ ފެށި ފަހުން، ހަނގުރާމައިގެ ޖަރީމާއާ ދެކޮޅަށް ޔޫކްރެއިންގައި ބޭއްވި ފުރަތަމަ ޝަރީއަތުގައި އުމުރުން 21 އަހަރުގެ ރަޝިއާ ސިފައިންގެ މީހަކު، ހަތިޔާރު ނެތް އުމުރުން ދުވަސްވީ ޔޫކްރެއިން ރައްޔިތަކު މަރާލި ކަމަށް އިއުތިރާފްވެއްޖެ އެވެ.
ވަޑީމް ޝިޝިމަރިން ބުނީ ހަނގުރާމަ ފެށިތާ މާ ގިނަ ދުވަސްތަކެއް ނުވަނީވެސް އުމުރުން 62 އަހަރުގެ ފިރިހެނެއްގެ ގަޔަށް ބަޑި ޖަހައި މަރާލި ކަމަށެވެ. އެކަމުގެ އަދަބެއްގެ ގޮތުން އޭނާ އުމުރަށް ޖަލަށް ލާނެ ކަމަށް ބެލެވެ އެވެ.
ޔޫކްރެއިން ސިފައިން ހައްޔަރު ކުރި ވަޑީމް، ވެރިރަށް ކިޔެވްގައި ޝަރީއަތް ކުރިއަށް ގެންދަން ހަމަޖެއްސި ކޯޓުގެ ކުޑަ ކޮޓަރިއަށް ވެއްދީ އަތުގައި ބަޑި އަޅުވައި، ވަށައިގެން ހަތިޔާރު އެޅި ގިނަ ގާޑުންތަކާ އެކު އެވެ. އޭނާ ހާސްވެފައި ހުރި އިރު، ގިނަ ވަގުތު ހުރީ އިސް ޖަހައިގެންނެވެ.
ވަޑީމް ހަމަލާ ދިނުމުން މަރުވި މީހާގެ އަންހެނުން ވެސް އެ ކޮޓަރި ތެރޭގައި އިނެވެ. ކެޓެރީނާގެ ފިރިމީހާ އޮލެކްސެންޑަރް ޝެލިޕޯވް މަރާލި ގޮތުގެ ވާހަކަ ޕްރޮސެކިއުޓަރުން ދައްކަން ފެށުމުން، އޭނާ ލޮލުން ކަރުނަ ފޮހޭ މަންޒަރު ނޫސްވެރިންނަށް ފެނިފައިވެ އެވެ.
ކުށަށް އިއުތިރާފުވަންތޯ ފަނޑިޔާރު ސުވާލު ކުރުމުން، ވަޑީމް ބުނާ އިއުތިރާފްވާ ކަމަށެވެ. ޕްރޮސެކިއުޓަރުން ބުނީ ވަޑީމްއަކީ ޓޭންކް ޑިވިޝަނެއްގެ ކޮމާންޑަރެއް ކަމަށެވެ. އޭނާގެ ޔުނިޓަށް ހަމަލާތައް އަމާޒުވާން ފެށުމުން، އޭނާ އާއި ރަޝިއާގެ އިތުރު ހަތަރު ސިފައިން ކާރެއް ވަގަށް ނެގި އެވެ.
ޔޫކްރެއިން ޗުޕަކިވާ ސަރަހައްދު ކައިރިން ދަނިކޮށް، އުމުރުން 62 އަހަރުގެ ފިރިހެން މީހާ ބައިސްކަލެއްގައި އުޅެނިކޮށް އެ މީހުންނަށް ފެނުނެވެ. ޕްރޮސެކިއުޓަރުން ބުނީ އޭނާ މަރާލުމުގެ އަމުރު ވަޑީމްއަށް ލިބުމުން، އެކަމަށް ބޭނުން ކުރީ ކަލަޝްނިކޯވް އެސޯލްޓް ރައިފަލްއެއް ކަމަށެވެ.
ރަޝިއާއިން ބުނީ ވަޑީމްގެ މައްސަލަ ކޯޓުގައި ކުރިއަށްދާކަން ޔޫކްރެއިނުން އަންގާފައި ނުވާ ކަމަށެވެ.
ވަޑީމް ކުށަށް އިއުތިރާފްވުމާ އެކު ބުދަ ދުވަހު ޝަރީއަތް މެދުކަނޑާލި އެވެ. އެ ޝަރީއަތުގެ ބާކީ ބައި ކުރިއަށް ދާނީ ބުރާސްފަތި ދިުވަހު އެވެ.
ޔޫކްރެއިން ސަރުކާރުން ބުނީ ރަޝިއާ ސިފައިން މިހާތަނަށް ހަނގުރާމައިގެ ޖަރީމާގެ ގޮތުގައި ބެލެވޭނެ 10،000 އަށް ވުރެ ގިނަ އަމަލު ހިންގާފައިވާ ކަމަށެވެ. އެކަމަކު ރަޝިއާއިން އެ ތުހުމަތު ދޮގުކުރެ އެވެ.
ރަޝިއާގެ މައްޗަށް ތުހުމަތު ކުރެވޭ ކަންކަން ތަހުގީގު ކުރަން އިންޓަނޭޝަނަލް ކްރިމިނަލް ކޯޓް (އައިސީސީ) ގެ 42 މެމްބަރުންގެ ޓީމެއް ޔޫކްރެއިނަށް ދަތުރު ކުރާނެ އެވެ. އެ ޓީމުގައި ހިމެނެނީ އިންވެސްޓިގޭޓަރުންނާޢި ފޮރެންސިކް ތަޖުރިބާކާރުންނާއި ސަޕޯޓް ސްޓާފުންނެވެ.
ޔޫކްރެއިނުން ވެސް އަންނަނީ ތުހުމަތު ކުރެވޭ މައްސަލަތަކުގެ ހެކި ރައްކާތެރި ކުރުމަށް ގިނަ މަސައްކަތްތަކެއް ކުރަމުންނެވެ.
