ބްރަސެލްސް، ބެލްޖިއަމް (މޭ 18) - އެމެރިކާއިން އިސްވެ ހިންގާ އަސްކަރީ ގްރޫޕް، ނޭޓޯގެ މެމްބަރުކަން ހޯދުމަށް އެދި ފިންލޭންޑާއި ސްވިޑަންއިން ރަސްމީކޮށް ފޯމު ހުށަހަޅައިފި އެވެ.
"މިއަދު ހުށަހެޅި ފޯމުތަކަކީ ތާރީހީ ފިޔަވަޅެއްގެ ރަމްޒު. ތި ގައުމުތަކުން ނޭޓޯއަށް ކުރާ ދަތުރުގައި ދެން އަމަލު ކުރަންވީ ގޮތެއް ނިންމާނީ މެމްބަރު ގައުމުތަކުން،" ނޭޓޯގެ ވެރިޔާ ޖެންސް ސްޓޮލްޓެންބާގް ވިދާޅުވި އެވެ.
ނޭޓޯގައި ވައިވެރިވުމަށް އެދި ފިންލޭންޑާއި ސްވިޑަންގެ ފަރާތުން ފޯމު ހުށަހެޅީ އެ ދެ ގައުމުގެ ސަފީރުން، ނޭޓޯގެ މައި މަރުކަޒަށް ވަޑައިގެން، ސްޓޮލްޓެންބާގްއާ ބައްދަލުކުރެއްވުމަށް ފަހު އެވެ.
މިދިޔަ ހަފްތާގައި ފިންލޭންޑާއި ސްވިޑަންގެ ސަރުކާރުން ރަސްމީކޮށް ބުނީ ނޭޓޯގެ މެމްބަރު ކަމަށް އެދި ހުށަހަޅާނެ ކަމަށެވެ. މީގެ ކުރިން މި ދެ ގައުމަކީ އަސްކަރީ ގޮތުން ވަކި އަތަކަށް ނުޖެހޭ ދެ ގައުމެވެ.
ނަމަވެސް ޔޫރަޕްގެ އެންމެ އުތުރުގައި އޮންނަ ދެ ގައުމުގެ ޒަމާންވީ ވިސްނުން ބަދަލުވީ ފެބްރުއަރީ 24 ވަނަ ދުވަހު ރަޝިއާގެ ސިފައިން ޔޫކްރެއިނަށް އަރައި ހަނގުރާމަ ފެށުމުންނެވެ.
އެ ދެ ގައުމުން ނޭޓޯއާ ގުޅުމަށް މަސައްކަތް ކުރި ނަމަވެސް، ނޭޓޯގެ މެމްބަރެއް ކަމުގައިވާ ތުރުކީއިން އެކަމާ ދެކޮޅެވެ. ތުރުކީއިން ބުނީ އެއީ "ޓެރަރިޒަމަށް" ހިތްވަރުދޭ ދެ ގައުމު ކަމަށެވެ.
"ތުރުކީއަށް ދަތިކޮށް، ފިޔަވަޅު އަޅާ ގައުމުތަކުން ސަލާމަތާ ގުޅޭ ޖަމިއްޔާ ނޭޓޯއާ ގުޅުމަށް އަޅުގަނޑުމެންގެ އާނ ބަހެއް ނުލިބޭނެ،" ތުރުކީގެ ރައީސް ތައްޔިބް އުރުދުގާން ވިދާޅުވި އެވެ.
ތުރުކީގައި ކުރުދީ ހަނގުރާމަވެރިންނާ ދެކޮޅަށް ބޮޑެތި އޮޕަރޭޝަންތައް ހިންގާ އިރު، ތުރުކީ ސަރުކާރުން ތުހުމަތު ކުރަނީ ފިންލޭންޑާއި ސްވިޑަންއިން ކުރުދީންނަށް އެއްބާރުލުންދޭ ކަމަށެވެ.
އާދީއްތަ ދުވަހު ތުރުކީގެ ފޮރިން މިނިސްޓަރު މެވްލުތް ކަވުސޮގްލޫ ވެސް ވިދާޅުވީ "ޓެރަރިޒަމަށް ތާއީދު ކުރާ ގައުމުތަކުން ނޭޓޯގައި ހިމެނިގެން ނުވާނެ" ކަމަށެވެ.
