ހަންގަނޑުގެ ތެތްކަން ކެނޑި، ކުރަކިވެފައި ހުރުމަކީ ވޭން އަޅާ ކަމެކެވެ. އެކަމަކު ހަމުގެ މައްސަލައާ ގުޅިފައިވަނީ އެ ހާލަތު މެދުވެރިވުމުން އިހުސާސްކުރަންޖެހޭ ޖިސްމާނީ ތަދު އެކަންޏެއް ނޫނެވެ. ހަންގަނޑު ހިކުމާއި އޭގެ ސަބަބުން އަންނަ ހަމުގެ މައްސަލަތަކުގެ ސަބަބުން ނަފްސާނީ ގޮތުން އުނދަގޫ ތަޖުރިބާ ކުރާ މީހުން ގިނަ އެވެ. ހާއްސަކޮށް މޫނުގެ ހަމަށް މައްސަލަ ޖެހުމަކީ މި ފިކުރު އެތައް ގުނަ ބޮޑުވާ ކަމެކެވެ. ހަމަށް ދިމާވާ މައްސަލަތަކާ ގުޅޭގޮތުން ގިނަ އަދަދެއްގެ ދިރާސާ ކޮށްފައިވަނީ ވެސް މި ސަބަބުތަކާ ހެދި ކަމަށް ވުން އެކަށީގެންވެ އެވެ.
ހަންގަނޑު ހިކިގެން އެކި މީހުންނަށް ވަނީ އެކި ގޮތްގޮތެވެ. އޭގެ ތެރޭގައި ހަންގަނޑު ކުރަކިވެ ފާރުވުމާއި، ކެހުމާއި ހަންފޮޅުން ހިމެނެ އެވެ.
ސިއްހީ ދާއިރާއިން ފުޅާ ދާއިރާއެއްގައި ސިއްހީ މައުލޫމާތު ގެނެސްދޭ، އެމެރިކާގެ މަޔޯ ކްލިނިކްއިން ޝާއިއުކޮށްފައިވާ ލިއުމެއްގައިވާ ގޮތުން ހަންގަނޑު ހިކުމުން ފެންނަ ގިނަ އަލާމާތްތަކެއް ހުރެ އެވެ.
އަލާމާތްތައް
- ހަންގަނޑުގައި (އާދަޔާ ހިލާފު) ވާންކަމެއް ހުރުން
- ހަންގަނޑު ކުރަކިވުން ނުވަތަ ކުރަކިކަމެއް އިހުސާސްވުން
- ގައިކެހުން
- ހަންފޮޅުން
- ހަން ނޮޅުން
- ހަންގަނޑު ކަނޑަކަނޑައިގެން ގޮސްފައި ހުރުން
- ހަންގަނޑުގައި ރޮނގު އެޅިފައި ހުރުން
- ހަންގަނޑު ރަތްވުން
- ހަނގަނޑު ފުންކޮށް ކަނޑައިގެން ގޮސް ލޭ އައުން
ހަން ހިކެން މެދުވެރިވާ ސަބަބުތައް
ހަންގަނޑު ހިކެނީ ކޮންމެވެސް ސަބަބަކާ ހެދި ހަމުގެ ބޭރު ފަށަަލައިން ފެން މަދުވުމުންނެވެ. އެކަން އެހެން ދިމާވާ ގިނަ ސަބަބުތަކެއް މާޔޯ ކްލިނިކްގެ ލިއުމުގައި ހިމަނާފައިވެ އެވެ.
- ހޫނުވުން: ގެދޮރު ހޫނުކުރާ ނިޒާމުތަކާއި އުނދުނާއި އަވަން ފަދަ ތަކެތިން އަރާ ހޫނުގެ ތެރޭގައި ގިނައިރު އުޅުމަކީ ހަންގަނޑު ހިކެން މެދުވެރިވާ ސަބަބުތަކުގެ ތެރެއިން ދިރިއުޅުމުގެ ވައްޓަފާޅިއާ ގުޅިފައިވާ އެއް ސަބަބެވެ.
- މާހައުލު: ފިނިގަދަ ވައިގެ ތެތްކަން ކުޑަ ނުވަތަ ހިއުމިޑިޓީ ދަށް ސަރަހައްދެއްގައި އުޅެން ޖެހުމަކީ ވެސް ހަންގަނޑު ހިކިދާނެ ކަމެކެވެ.
- ބާރުގަދަ ބާވަތްތައް ބޭނުންކުރުން: މަޝްހޫރު ބައެއް ބާވަތްތައް ވެސް ހިމެނޭ ގޮތުން ބައެއް ސައިބޯނިތަކާއި ޝަވަޖެލް އަދި ދޮންނަކުނޑިން ވެސް ވާ އެއް ކަމަކީ ހަމުގައިވާ ތެތްކަން ނެތި ދިއުމެވެ. އެހެން އެކަންވާ ސަބަބަކީ އެ ބާވަތްތަކުން އަމާޒުކުރަނީ ހަމުގައިވާ ތެޔޮކަން ފިލުވުަމށް ކަަމށް ވުމެވެ.
- ހަމުގެ އެހެން މައްސަލަތައް: ހަމުގެ ބަލިތައް ކަމަށް ވާ އެކްޒެމާއާއި އެޓޮޕިކް ޑާމެޓައިޓިސް ފަދަ ބަލިތަކުން ވެސް ހަންގަނޑު ހިކެން މެދުވެރިވެ އެވެ.
- ސިއްހީ ފަރުވާތައް: ކެންސަރަަށް ކުރާ ފަރުވާތަކާއި ޑަޔަލިސިސް ހެދުމާއި ބައެއް ބާވަތްތަކުގެ ބޭސްތައް ކެއުމުން ވެސް ހަންގަނޑު ހިކެ އެެވެ.
- އުމުރުން ދުވަސްވުން: އުމުރުން ދުވަސްވާ ވަރަކަށް، ހަންތުނިވެ، ހަމުގައި ތެޔޮކަން ހިފެހެއްޓުމުގެ ބާރު ދަށްވެ އެވެ. އެހެންވެ ހަންގަނޑު ހިކެން ފަށައެވެ.
ޑޮކްޓަރަކަށް ދައްކަންވީ ކިހާ ހިސާބަކުން؟
ހަންގަނޑު ހިކުމުގެ ގިނަ މައްސަލަތަކަކީ ދިރިއުޅުމުގެ ވައްޓަފާޅިއަށް ގެންނަ ބަދަލުތަކުންނާއި ގޭގައި އަމިއްލައަށް ކުރާ ފަރުވާތަކުން ރަނގަޅުކުރެވޭ ކަންތައްތަކެވެ. އެކަމަކު މިކަމުގައި އާއްމު ބަލިތަކުގެ ޑޮކްޓަރަކަށް ނުވަތަ ހަމުގެ ހާއްސަ ޑޮކްޓަރަކަށް ވެސް ދައްކަން ޖެހޭ ހިސާބެއް އަތުވެދާނެ އެވެ. މިސާލަކަށް؛
- ހަންގަނޑު ދުޅަވެ ތަދުވާ ނަމަ
- ކެންސަރުގެ ފަރުވާއާ ގުޅިގެން ހަންގަނޑު ބޯވެ ހިކޭ ނަމަ
- ހަމުގެ މައްސަލައިގެ ސަބަބުން އާއްމު ދިރިއުޅުމަށާއި ނިންޖަށް ހުރަސް އެޅޭ ވަރަށް ކަންބޮޑުވާ ނަމަ
- ހަންގަނޑު ފާރުވެ އިންފެކްޝަން އުފެދުން
- ބޮޑެތި ހަންގަނޑުހަނޑު ނޮޅޭގޮތްވުން
ސަލާމަތްވާން ކުރެވިދާނެ ބައެއް ކަންތައްތައް
- މޮއިސްޗަރައިޒާއެއް ބޭނުންކުރުން: މޮއިސްޗަރައިޒާ ބޭނުންކުރުމުން، ހަންގަނޑުގައިވާ ފެން ބޭރުވިޔަނުދީ ބަންދުކޮށްދެ އެވެ. މުޅި ދުވަހު ވެސް މޮއިސްޗަރައިޒާއެއް ބޭނުންކުރާށެވެ. އެންމެ ރަނގަޅު ގޮތަކީ ގެއިން ބޭރަށް ނުކުންނަ އިރު ސަން ސްކްރީން ލޯޝަނެއް ބޭނުންކުރުމެވެ. އަވީގައި އުޅޭ ނަމަ ކޮންމެ ދެގަޑިއިރަކުން އެކަހަލަ ލޯޝަނެއް ލާށެވެ.
- ފެން ޖެއްސުން މަދުކުރުން: ހަންގަނޑު ހިކޭ ނަމަ ގިނައިރު ވަންދެން ފެންވެރުމަށް ވުރެ ރަނގަޅީ ފެން މާގަނޑުގެ ދަށުގައި ހޭދަކުރާ ވަގުތު މަދުކުރުމެވެ. އެންމެ ރަނގަޅީ ހޫނު ނުވަތަ ތާފަނާ ފެނުން ފެންވެރުމެވެ. އަދި ދުވާލަކު އެއް ފަހަރަށް ވުރެ ގިނައިން ފެން ނުވެރުމެވެ.
- ބާރުދަށް ބާވަތްތައް ބޭނުންކުރުން: ޝަވަޖެލް ނުވަތަ ސައިބޯނީގެ ބާރު ގަދަ ބާވަތްތަކުގެ ބަދަލުގައި މެދުމިނުގެ ނުވަތަ ބާރު ދެރަ ބާވަތްތައް ބޭނުންކުރުން މުހިއްމެވެ. އެގޮތުން އިހުތިޔާރުކުރަންވީ އަލެގްރެން އާއި އަލްކަހޯލް އެކުނުލެވޭ ބާވަތްތަކެވެ.
- ގިނައިން ދިޔާތަކެތި ބޭނުންކުރުން: މުޅި ދުވަހުވެސް ގިނަަގިނައިން ދިޔާތަކެތި ބޭނުންކުރުމަކީ ވެސް ހަންގަނޑު ހިކުމުން ސަލާމަތްވާނެ ކަމެކެވެ. އެކަމަކު ބޭނުންކުރަން ރަނގަޅީ ކެފެއިން އެކުނުލެވޭ ބާވަތްތަކެވެ.
