އެއް އާއިލާއަކަށް ނިސްބަތްވާ ކުދިންތަކަކަށް ޖިންސީ ގޯނާކުރި ކަމުގެ ތުހުމަތުގައި ހައްޔަރު ކުރި ފިރިހެން މީހާ ކްރިމިނަލް ކޯޓުން ދޫކޮށްލި އަމުރު ހައިކޯޓުގައި އިސްތިއުނާފް ކުރަން ދައުލަތުން ނިންމައިފި އެވެ.
އެ މައްސަލައާ ގުޅިގެން މިދިޔަ އޭޕްރިލް މަހުގެ ނުވަ ވަނަ ދުވަހު ކޯޓު އަމުރެއްގެ ދަށުން ހައްޔަރު ކުރި 55 އަހަރުގެ އެ މީހާ ބަންދުގައި ހުންނަތާ 30 ދުވަސް ފަހުން ކްރިމިނަލް ކޯޓުން އޭނާ ދޫކޮށްލީ އިއްޔެ އެވެ.
"މާދަމާގެ ވަގުތެއްގައި ހައިކޯޓަށް އަޅުގަނޑުމެން [އިސްތިއުނާފް] ފޯމު ހުށަހަޅާނެ،" ޕަބްލިކް ޕްރޮސެކިއުޓަރު އަހްމަދު ޝަފީއު މި ނޫހަށް ވިދާޅުވި އެވެ.
އެނގިފައިވާ ގޮތުގައި އެމީހާ ޖިންސީ ގޯނާ ކޮށްފައިވަނީ އެކި ދުވަސް މަތިން އެއް އާއިލާއަކަށް ނިސްބަތްވާ ހަ ކުޑަ ކުއްޖަކަށެވެ. އެ މީހާއަކީ ވެސް އެ އާއިލާއަށް ނިސްބަތްވާ މީހެއްކަން އެނގިފައިވެ އެވެ.
ކުޑަ ކުއްޖެއް ހިމެނޭ މައްސަލައަކަށްވާތީ އިތުރު ތަފްސީލްތަކެއް އިދާރާތަކުން ރަސްމީކޮށް ނުދެ އެވެ. އެހެންވެ ބަންދުން ދޫކޮށްލި ސީދާ ސަބަބެއް ނޭނގެ އެވެ.
އެ މައްސަލަ ފުލުހުން ދަނީ އަދިވެސް ތަހުގީގު ކުރަމުންނެވެ.
