މިދިޔަ ފެބްރުއަރީ މަހު މާލޭގެ އޮފީހެއް ފަޅާލައި އެ ތަނުން އެއް ލައްކަ ރުފިޔާއަށް ވުރެ ގިނަ ފައިސާ ވަގަށް ނެގި މީހަކު ގާތްގަނޑަކަށް ނުވަ މަހަށް ޖަލަށް ލާން ކްރިމިނަލް ކޯޓުން ހުކުމްކޮށްފި އެވެ.
ދައުލަތުން ކްރިމިނަލް ކޯޓަށް ހުށަހެޅި މައްސަލާގައިވާ ގޮތުން، ދައުވާ އުފުލާފައިވާ ފަރާތުން ފެބްރުއަރީ މަހުގެ 16 ވަނަ ދުވަހު މާލެ ހެންވޭރުގައި ހުންނަ އިމާރާތެއްގައި ހިންގާ އޮފީހެއްގެ ފުރާޅުން ޓިނު ނަގައި، ސީލިން ހަލާކުކޮށް އޮފީސް ތެރެއަށް ވަނީ ވަދެފަ އެވެ.
ދެން އޮފީހުގެ އެކައުންޓްސް ޑިޕާޓްމަންޓްގައި ހުރި ހުދު ކުލައިގެ ތިޖޫރީއެއްގެ ތެރެއިން 62،000 ރ. އާއި 2،450 އެމެރިކާ ޑޮލަރު އަދި އޮފީހުގެ މޭޒެއްގެ ޑްރޯވާއިން 20،000 ރ. އާއި 600 ޑޮލަރު ނަގާފައިވާ ކަމަށް ވެސް ދައުލަތުން ކުރާ ދައުވާގައިވެ އެވެ.
އެއީ ޖުމުލަ ގާތްގަނޑަކަށް 129،123 ރުފިޔާ އެވެ.
މި ކުށާ ގުޅިގެން އޭނާގެ މައްޗަށް ދެ ދައުވާއެއް ކުރެ އެވެ. އެއީ ވައްކަމުގެ ދައުވާއާއި، އެނގި ހުރެ ހުއްދަ ނޫން ތަނަކަށް ވަނުމުގެ ދައުވާ އެވެ. މި ދެ ދައުވާއަށް ވެސް އޭނާ އިއުތިރާފް ވުމުން ހުކުމް ކުރީ އަވަސް ނިޔާގެ ދަށުންނެވެ.
ވައްކަމުގެ ދައުވާއަށް އޭނާގެ މައްޗަށް ހަތް މަހާއި 20 ދުވަހުގެ ޖަލު ހުކުމެއް އިއްވި އެވެ. އަދި ހުއްދަ ނޫން ތަނަކަށް ވަނުމުގެ ދައުވާއަށް އެއް މަހާއި ހަ ދުވަހުގެ ޖަލު ހުކުމެއް ކޯޓުން އިއްވި އެވެ.
