ފާއިތުވި 59 އަހަރުގެ ތެރޭގައި ފުރަތަމަ ފަހަރަށް، ޔޫކޭ ޕާލިމެންޓް ހުޅުވުމުގެ ޖަލްސާގައި، ރާނީ އެލިޒަބަތު ބައިވެރިވެވަޑައިނުގަންނަވާނެ ކަމަށް ބަކިންހަމް ޕެލެސްއިން ބުނެފި އެވެ.
ރާނީގެ ބަދަލުގައި ޖަލްސާގައި ބައިވެރިވެވަޑައިގަންނަވާނީ ވަލީ އަހުދު، ޕްރިންސް އޮފް ވޭލްސް، ޗާލްސް އެވެ. ޖަލްސާގައި ޑިއުކް އޮފް ކެމްބްރިޖް، ވިލިއަމް ވެސް ބައިވެރިވެވަޑައިގަންނަވާނެ އެވެ.
ބަކިންހަމް ޕެލެސްއިން ބުނީ "މޮބިލިޓީ" ނުވަތަ ހަރަކާތްތެރިވެ އުޅުމުގެ މައްސަލަތަކެއް ރާނީއަށް ކުރިމަތިވަމުންދާ ކަމަށާއި ޑޮކްޓަރުންގެ ލަފާގެ މަތިން، އަންގާރަ ދުވަހުގެ ޖަލްސާގައި ބައިވެރިވެޑައިނުގަންނަވާނެ ކަމަށެވެ.
އެ ޖަލްސާއަކީ ކުރިއަށް އޮތް އަހަރަށް ސަރުކާރުގެ ރޭވުންތައް ހާމަކުރާ ޖަލްސާ އެވެ. އެކަން ހާމަކުރާނީ ރާނީ ނުވަތަ ރަސްގެފާނު ދެއްވާ ހިތާބުގަ އެވެ.
މިއީ ރާނީ އެލިޒަބަތު ތަހުތަށް ވަޑައިގެންނެވި ފަހުން، ޕާލިމެންޓް ހުޅުވުމުގެ ޖަލްސާގައި ބައިވެރިވެވަޑައިނުގެންނެވޭ ތިން ވަނަ ފަހަރެވެ.
ކުރިން 1959 އަދި 1963 ގައި ޖަލްސާގައި ބައިވެރިވެވަޑައިނުގެންނެވުނީ އެކަމަނާ ބަލިވެ އިންނެވުމުންނެވެ. ފަހަކަށް އައިސް ގިނަ ހަރަކާތްތަކެއްގައި އުމުރުފުޅުން 96 އަހަރުގެ ރާނީ ބައިވެރިވެވަޑައިނުގަންނަވަ އެވެ.
