އިރުމަތީ ޔޫކްރެއިންގެ ސްކޫލަކަށް ބޮން އެޅުމުން 60 މީހުން މަރުވެފައިވާ ކަމަށް އެ ގައުމުގެ ރައީސް ވޮލޮޑިމިރް ޒެލެންސްކީ ވިދާޅުވެއްޖެ އެވެ.
ލުހާންސްކް ސަރަހައްދުގެ ގަވަރުނަރު ސެރްހީ ހައިދައި ކުރިން ވިދާޅުވީ ބޮން އެޅީ ބިލޮހޮރިވްކާގައި ހުރި ސްކޫލަކަށް ކަމަށާއި އެ ވަގުތު އެ ތަނުގައި 90 މީހުން ތިބި ކަމަށެވެ. އޭގެ ތެރެއިން 30 މީހުން ވަނީ ސަލާމަތްކޮށްފަ އެވެ.
ހައިދައި ވިދާޅުވީ ހޮނިހިރު ދުވަހު ސްކޫލަށް ބޮން އެޅީ ރަޝިއާގެ މަތިންދާ ބޯޓަކުން ކަމަށެވެ. ރަޝިއާއިން އެކަމާ ގުޅޭ ގޮތުން ވަކި އެއްޗެއް ނުބުނެ އެވެ.
އިރުމަތީ ޔޫކްރެއިންގައި ވަރުގަދައަށް ހަމަލާ ބަދަލު ކުރުންތައް ކުރިއަށްދާ އިރު، ރަޝިއާ ސިފައިން މަސައްކަތް ކުރަނީ ޔޫކްރެއިންގެ ފައުޖުތައް ވަށާލައި އަމާން ދޭން މަޖުބޫރު ކުރުމަށެވެ.
ފާއިތުވި އަށް އަހަރު އިރުމަތީ ޔޫކްރެއިންގެ ބޮޑު ބަޔެއް ކޮންޓްރޯލް ކުރަމުން ދިޔައީ ރަޝިއާއަށް ތާއީދު ކުރާ ޔޫކްރެއިންގެ ގްރޫޕްތަކުންނެވެ.
އދ. ގެ ސެކެޓްރީ ޖެނެރަލް އެންޓޯނިއޯ ގުޓެރޭޒް ވަނީ އިރުމަތީ ޔޫކްރެއިންގައި ދެމުންދާ "ނުރައްކާތެރި ހަމަލާތަކާ" މެދު ކަންބޮޑުވުން ފާޅުކޮށް، އާއްމުންނަށް އަމާޒު ނުކުރުމަށް ގޮވާލައްވާފަ އެވެ.
ފެބްރުއަރީ 24 ވަނަ ދުވަހު ރަޝިއާ ސިފައިން ޔޫކްރެއިނަށް އަރައި ހަނގުރާމަ ފެށި ފަހުން، 2،345 އާއްމުން މަރުވެ، 2،929 އާއްމުންނަށް އަނިޔާވެފައިވާ ކަމަށް އދ. ގެ ރިކޯޑްތަކުން ދައްކަ އެވެ.
ހަނގުރާމައާ ހެދި 12 މިލިއަން މީހުން ގެތައް ދޫކޮށް ގޮސްފައިވާ އިރު، އޭގެ ތެރެއިން 5.7 މިލިއަން މީހުން ވަނީ ކައިރި ގައުމުތަކަށް ހިޖުރަކޮށްފަ އެވެ.
