ކުޑަކުދިންގެ ފުރަމާ ފެއިލްވާ ގޮތް ނޭނގޭ ބައްޔާއި ކުއްތާއާ އެއްވެސް ގުޅުމެއް އޮތްތޯ އިނގިރޭސިވިލާތުގައި ބަލަން ފަށައިފި އެވެ.
ޔޫކޭ ހެލްތު ސެކިއުރިޓީ އެޖެންސީ (ޔޫކޭއެޗްއެސްއޭ) އިން މިދިޔަ ހުކުރު ދުވަހު ބުނީ އިތުރު 18 ކުދިންނަށް ސީރިއަސް ހެޕަޓައިޓިސް ދިމާވެފައިވާ ކަމަށެވެ. އެއާ އެކު އިނގިރޭސިވިލާތުން ފެނުނު ކޭސްތަކުގެ ޖުމްލަ އަދަދު ވަނީ 163 އަށް އަރާފަ އެވެ.
ބަލިވި ކުދިންގެ އާއިލާތަކާ ސުވާލުކޮށް ހޯދި ހޯދުންތަކުން އެނގުނު ގޮތުގައި ގިނަ އަދަދެއްގެ އާއިލާތަކަކީ ކުއްތާ ގެންގުޅޭ ނުވަތަ ކުއްތާއާ ވަރަށް ގިނައިން ބައްދަލުވާ އާއިލާތަކެވެ. އެގޮތުން ސުވާލު ކުރި 92 އާއިލާގެ ތެރެއިން 64 އާއިލާއިން ބުނީ ކުއްތާއަށް އެކްޒްޕޯޒްވާ ކަމަށެވެ.
"މި ހޯދުމުގެ މުހިއްމުކަން އިތުރަށް ދިރާސާ ކުރަމުން ދަނީ. ނަމަވެސް ގޭގައި އޮޅުކޮށްގެން ކުއްތާ ގެންގުޅުމަކީ އިނގިރޭސިވިލާތުގައި އާއްމު ކަމެއްކަން ވެސް ފާހަގަކުރަން،" ޔޫކޭއެޗްއެސްއޭއިން ބުންޏެވެ.
ކުއްތާއަށް އެކްޒްޕޯޓްވާ ކަމަށް ބުނި އާއިލާއެއްގެ އެއްވެސް ކުއްޖަކު ބަލީގައި މަރުވެފައެއް ނުވެ އެވެ. ނަމަވެސް މި ބަލީގައި މިހާތަނަށް އިނގިރޭސިވިލާތުން އެއް ކުއްޖަކު ވަނީ މަރުވެފަ އެވެ.
ޔޫކޭއެޗްއެސްއޭއިން ބުނީ ކުޑަކުދިންގެ މެދުގައި ހެޕަޓައިޓިސް އިތުރު ވަނީ ވަރަށް އާއްމުކޮށް ފެންނަ އެޑެނޯވައިރަސްގެ ސަބަބުން ކަމަށް ކަމަށް ބެލެވޭ ކަމަށެވެ.
މިހާތަނަށް ޓެސްޓު ކުރި އެންމެ ގިނަ ސާމްޕަލުން ފެނުނީ އެ ވައިރަހެވެ. ނަމަވެސް އެޑެނޯވައިރަސް ކުރިމަތިވާ ސިއްހަތު ރަނގަޅު ކުދިންނަށް ހެޕަޓައިޓިސް ނުވަތަ ފުރަމޭގެ މައްސަލަ ދިމާވުމަކީ މީގެ ކުރިން ފެނިފައިވާ ކަމެއް ނޫނެވެ.
އެހެންކަމުން، ބައްޔާ ގުޅޭ އިތުރު ދިރާސާތައް ގިނަ ގައުމުތަކެއްގައި ދަނީ ކުރަމުންނެވެ. އެގޮތުން އެޑެނޯވައިރަސްއަށް ބަދަލެއް އައިސްފައިވޭތޯ ބެލުމާއި، ކޮވިޑާ ހެޕަޓައިޓިސްއާ އޮތް ގުޅުން ވެސް ދަނީ ދިރާސާ ކުރަމުންނެވެ.
