ރާއްޖޭގައި ހުރި ބުދު ދީނުގެ އާސާރީ ތަންތަން އިންޑިއާގެ އެހީތެރިކަމާއެކު މަރާމާތުކުރަން އުޅޭކަމަށް ދެކެވޭ ވާހަކަތައް ސަގާފީ ތަރިކަ ރައްކާތެރިކުރާ ގައުމީ މަރުކަޒުން ދޮގުކޮށްފި އެވެ.
ދިވެހި ސަރުކާރުން އިންޑިއާގެ އެހީތެރިކަމާއެކު ރާއްޖޭގެ އެކި ސަރަހައްދުތަކުގައި ހުރި ބުދު ދީނުގެ އާސާރީ ތަންތަން މަރާމާތުކުރަން އުޅޭކަމަށް ބުނެ ބައެއް ނޫސްތަކުން ވަނީ މިފަހުން ރިޕޯޓުކޮށްފަ އެވެ.
އެކަމާ ގުޅިގެން ސަގާފީ ތަރިކަ ރައްކާތެރިކުރާ މަރުކަޒުން ނެރުނު ނޫސް ބަޔާނެއްގައި ބުނީ އެއީ ދިވެހިންގެ އެއްބައިވަންތަކަން ނަގާލައި މުޖުތަމައުގެ ތެރޭގައި ހަމަނުޖެހުމާއި ބައިބައިވުން އުފައްދަން ފަތުރާ ދޮގު ހަބަރެއް ކަމަށެވެ.
އެެ މަރުކަޒުން ބުނީ އިންޑިއާގެ އެހީތެރިކަމާއެކު މިހާރު ރާއްޖޭގައި އާސާރީ ތަންތަނާއި ގުޅުވައި ކުރާ މަސައްކަތްތަކަކީ ހުކުރު މިސްކިތުގެ އާބާތުރަ ފިލުވުމާއި، ތ. ދިޔަމިގިލި ގަނޑުވަރުގެ އާބަތުރަ ފިލުވުމާއި ނ. ލަންދޫގައި ހުންނަ މާބުދުގެ ސަރަހައްދުގައި ދާރުލްއާސާރަކާއި ހެރިޓޭޖް ޕާކެއް ތަރައްގީކުރުން ކަމަށެވެ.
އެ މަރުކަޒުން ބުނީ ދިވެހިންގެ ތާރީހާއި ފަންނުވެރިކަން އަދި ދީނީ ލޯބި ދައްކުވައިދޭ ހުކުރު މިސްކިތުގެ އާބާތުރަ ފިލުވުމުގެ މަސައްކަތް މީގެ ކުރިން ވެސް އިންޑިއާގެ އެހީތެރިކަމާއެކު ކުރިޔަށް ގެންގޮސްފައިވާ ކަމަށެވެ. އަދި ހަމަ އެގޮތަށް ރާއްޖޭގެ އެހެން ބައެއް މިސްކިތްތަކުގެ ވެސް ހަމަ އެފަދަ މަސައްކަތްތަކެއް އިންޑިއާގެ އެހީތެރިކަމާއެކު ކުރިޔަށް ގެންގޮސްފައިވާ ކަމަށް އެ މަރުކަޒުން ބުނެ އެވެ.
ސަގާފީ ތަރިކަ ރައްކާތެރިކުރާ މަރުކަޒުން ވަނީ މާބުދުގެ ސަރަހައްދުގެ ފޮޓޯ ބޭނުން ކޮށްގެން ދޮގު ހަބަރު ފަތުރާއިރު، އެ ތަނުގައި ތަރައްގީކުރަން ނިންމާފައިވަނީ ހެރިޓޭޖް ޕާކަކާއި ދާރުލް އާސާރެއް ކަމަށް ފާހަގަކޮށްފަ އެވެ. އަދި އެއީ ސަރުކާރުން ހުށަހެޅި ޕްރޮޕޯޒަލަކަށް އިންޑިއާގެ ހަތަރު މިލިއަން ރުފިޔާގެ ހިލޭ އެހީގައި ކުރިޔަށްގެންދާ މަޝްރޫއެއް ކަމަށް އެ މަރުކަޒުން އިތުރަށް ބުނެ އެވެ.
އެ މަރުކަޒުން އިތުރަށް ބުނީ ބުދު ދީނުގެ އެއްވެސް ތަނެއް މަރާމާތު ކުރުމުގެ މަސައްކަތް ނުކުރާ ކަމަށެވެ. އަދި ދިވެހިން ދީނީ އެއްބައިވަންތަކަން ނަގާލައި ސިޔާސީ ބޭނުމަށް އެފަދަ ހަބަރުތައް ފެތުރުން ހުއްޓާލަން އެ މަރުކަޒުން ގޮވާލި އެވެ.
