މޮސްކޯ، ރަޝިއާ (މޭ 3) - ހުޅަނގުގެ ގައުމުތަކުން ޔޫކްރެއިނަށް ހަތިޔާރު ދިނުން ހުއްޓާލުމަށް ރަޝިއާގެ ރައީސް ލެޑިމިއަ ޕުޓިން ގޮވާލައްވައިފި އެވެ.
ފްރާންސްގެ ރައީސް އިމޭނުއެލް މެކްރޯންއާ އެކު ބޭއްވި މަޝްވަރާގައި ޕުޓިން ވިދާޅުވީ ހަމަނުޖެހުން ނިންމަން ޔޫކްރެއިނުން މަޝްވަރާގައި "ސީރިއަސްކޮށް" ބައިވެރި ނުވާ ކަމަށެވެ.
ޔޫކްރެއިންގެ ސިފައިން ހަނގުރާމައިގެ ޖަރީމާ ހިންގާ ކަމަށް ތުހުމަތު ކުރައްވަމުން ޕުޓިން ވިދާޅުވީ ޔޫރަޕިއަން ޔޫނިއަން (އީޔޫ) އިން އެ މަންޒަރު ނުފެންނަ ކަމަށް ހަދައިގެން އުޅޭ ކަމަށެވެ.
ޕުޓިން ވިދާޅުވީ "ޖަރީމާތައް ހުއްޓުވުމުގެ ގޮތުން ހުޅަނގުން ހަތިޔާރު ފޯރުކޮށްދިނުން ހުއްޓާލައި ޔޫކްރެއިން ސަރުކާރަށް ޕްރެޝަރު ކުރެވޭނެ" ކަމަށެވެ.
އޭގެ އިތުރުން ހަމަނުޖެހުން ނިމުމަކަށް ގެންނަން "ސީރިއަސް މަސައްކަތެއް" ކުރަން ޔޫކްރެއިން ސަރުކާރުން ތައްޔާރު ނޫން ކަމަށް ވެސް ޕުޓިން ތުހުމަތު ކުރެއްވި އެވެ.
"ރަޝިއާގެ ފަޅި އަދިވެސް މި އޮތީ މަޝްވަރާއަށް ހުޅުވިފައި،" މެކްރޯންއާ އެކު ކުރެއްވި މަޝްވަރާގައި ޕުޓިން ވިދާޅުވި ކަމަށް ރަޝިއާ ސަރުކާރުން ބުންޏެވެ.
މެކްރޯން ވިދާޅުވީ ޔޫކްރެއިން ހަނގުރާމައިގެ ސަބަބުން ދުނިޔޭގެ ކާބޯތަކެތީގެ ރައްކާތެރިކަން ވަރަށް ބޮޑު ނުރައްކަލަށް ހުށަހެޅިފައިވާ ކަމަށެވެ.
ފެބްރުއަރީ 24 ވަނަ ދުވަހު ރަޝިއާގެ ސިފައިން ޔޫކްރެއިނަށް އަރައި ހަނގުރާމަ ފެށި ފަހުން، ޕުޓިންއާ ސީދާ މަޝްވަރާ ކުރިއަށް ގެންދާ މަދު ހުޅަނގުގެ ވެރިންގެ ތެރޭގައި މެކްރޯން ހިމެނިވަޑައިގަންނަވަ އެވެ.
އެގޮތުން ހަމަނުޖެހުން ނިމުމަކަށް ގެނައުމަށް މެކްރޯން އާއި ޕުޓިން ގިނަ ވަގުތުތަކެއް ފޯން ކޯލް މެދުވެރިކޮށް މަޝްވަރާ ކުރައްވަ އެވެ.
ޔޫކްރެއިން ހަނގުރާމައިގައި އެތައް ހާސް ބަޔަކު މަރުވެފައިވާ އިރު 13 މިލިއަނަށް ވުރެ ގިނަ މީހުންގެ ގެދޮރު ވަނީ ގެއްލިފަ އެވެ. މިއީ ދެ ވަނަ ބޮޑު ހަނގުރާމައަށް ފަހު ޔޫރަޕްގައި އުފެދުނު އެންމެ ބޮޑު ރެފިއުޖީންގެ ކާރިސާ އެވެ.
