މި މަހު 9-11 އަށް މާލޭގައި ކުރިއަށްގެންދާ ސައުތު އޭޝިއަން ޖޫނިއާ އެންޑް ކެޑޭޓް ޓޭބަލް ޓެނިސް ޗެމްޕިއަންޝިޕްގެ މެޗުތައް ކުޅެން ސޯޝަލް ސެންޓަރު އިންޑޯ ހޯލުގައި ކުރެވޭ މަރާމާތުގެ މަސައްކަތުގެ ތެރެއިން އޭސީ ހަރުކުރާނެ ކަމަށާއި އޭގެ ސަބަބުން ތަފާތު ފެންނާނެ ކަމަށް ކުޅިވަރާބެހޭ ވަޒީރު އަހުމަދު މަހުލޫފް ވިދާޅުވެއްޖެ އެވެ.
ސޯޝަލް ސެންޓަރު އިންޑޯ ހޯލަކީ ގިނަ ކުޅިވަރުތަކެއް ބަރޯސާވެފައި އޮތް ފެސިލިޓީ އެކެވެ. ރާއްޖޭގެ ވޮލީބޯޅަ ސީޒަނާއި ބާސްކެޓްބޯޅަ ސީޒަންގެ މެޗުތައް ސޯޝަލް އިންޑޯ ހޯލުގައި ކުޅޭއިރު، އެ ދެ ކުޅިވަރުގެ ބައިނަލްއަގުވާމީ މުބާރާތްތައް ވެސް ވަނީ އެ ތަނުގައި ހޯސްޓްކޮށްފަ އެވެ. އެ ފަހަރުތަކުގައި ބައިނަލްއަގުވާމީ މުބާރާތްތައް ބޭއްވުމުގެ ކުރިން ކުރެވޭ މަރާމާތުގެ އެކި މަސައްކަތްތަކުގެ ތެރެއިން ސޯޝަލް ސެންޓަރު އިންޑޯގައި ހޫނުގަދަ ވުމުގެ މަސައްކަތް ހައްލުކުރަން ގިނަ ކަންކަން ކުރެވެ އެވެ.
ގައުމީ ވޮލީ އާއި ބާސްކެޓްބޯޅަ ޓީމުތައް ޕްރެކްޓިސްތައް ބާއްވަނީ ވެސް ސޯޝަލް ސެންޓަރު އިންޑޯގަ އެވެ. އެ ތަނުގައި ހޫނުގަދަވުމުގެ ޝަކުވާ ކޮންމެ ކުޅިވަރު ކުޅުންތެރިއަކު ކަހަލަަ ގޮތަކަށް އަންނަނީ ކުރަމުންނެވެ. އަދި އެ ތަނުގެ ހޫނުމިން ހުންނަ މިންވަރުގެ ސަބަބުން ޓީމުތަކުން މުބާރާތްތަކަށް ޖޯޒީ ހަދަނީ ވެސް އެ ކަމަށް ސަމާލުވެގެންނެވެ.
މިނިސްޓަރު މަހުލޫފް ވިދާޅުވީ ސައުތު އޭޝިއަން ޖޫނިއާ އެންޑް ކެޑޭޓް ޓޭބަލް ޓެނިސް ޗެމްޕިއަންޝިޕްގެ މި ތައްޔާރީތަކުގެ ތެރެއިން ސޯޝަލް ސެންޓަރު އިންޑޯގައި ހޫނުގަދަވުމުގެ މައްސަލަ އަށް ހައްލު ލިބޭނެ ކަމަށެވެ.
"30 އަހަރަށް ފަހު މާލޭ ސޯޝަލް ސެންޓަރުގެ އިންޑޯ ހޯލް އޭސީ ކުރުމުގެ މަސައްކަތް މިހާރު ދަނީ ބާރަށް ކުރިއަށް. އިރާދަފުޅާ އެކު ސައުތު އޭޝިއަން ޖޫނިއާ އެންޑް ކެޑޭޓް ޓޭބަލް ޓެނިސް ޗެމްޕިއަންޝިޕް މުބާރާތަށް ބޮޑު ބަދަލެއް އިހުސާސް ކުރެވޭނެ. ގައުމީ ޓީޓީ ޓީމަށް ސަޕޯޓު ކޮށްދޭން ވަޑައިގެން ދެއްވާތި،" މިނިސްޓަރު ކުރެއްވި ޓްވީޓްގައި ވިދާޅުވެފައިވެ އެވެ. "30 އަހަރަށް ފަހު އިނގޭތޯ"
ސައުތު އޭޝިއާ ޖޫނިއާ ޓީޓީ މުބާރާތުގެ މެޗުތައް ބަލަން ޒުވާނުންގެ މަރުކަޒު އެތެރެ ކޯޓަށް ގިނަ ސަޕޯޓަރުން ވެއްދުމުގެ ގޮތުން ހަރަކާތްތައް ރޭވުމަށް ޓީޓީގެ އިސް އޮފިޝަލުންނާއި ޔޫތު މިނިސްޓްރީން އަންނަނީ ސަރުކާރުގެ އެކި މިނިސްޓްރީތަކުގެ ރެކްރިއޭޝަން ކްލަބްތަކާއި ސަރުކާރު ހިއްސާވާ ކުންފުނިތަކާ ބައްދަލުކުރަމުންނެވެ.
މި ފަހަރުގެ ސަރަހައްދީ ޖޫނިއާ މުބާރާތުގައި ސާކްގެ ހަ ގައުމަކުން 85 ކުޅުންތެރިން ވާދަކުރާނެ އެވެ. މިއީ 2018 ގައި ބޭއްވި ޖޫނިއާ މުބާރާތަށް ފަހު ބާއްވާ ފުރަތަމަ މުބާރާތެވެ. މުބާރާތުގެ ޖޫނިއާ ކެޓަގަރީގައި ވާދަކުރާނީ 19 އަހަރުން ދަށުގެ ކުޅުންތެރިންނެވެ. އަދި ކެޑޭޓް ކެޓަގަރީގައި ވާދަކުރާނީ 15 އަހަރުން ދަށުގެ ކުޅުންތެރިންނެވެ.
މި މުބާރާތުގައި ރާއްޖޭގެ އިތުރުން އިންޑިއާ އާއި ސްރީ ލަންކާ އާއި ނޭޕާލާއި ބޫޓާނާއި ބަންގްލަދޭޝް އާއި ޕާކިސްތާން ބައިވެރިވެ އެވެ. މި މުބާރާތަކީ ގައުމުތަކުގެ ޓޭބަލް ޓެނިސްގެ މުސްތަގުބަލު ބިނާކުރަން އިސް ރޯލެއް އަދާކުރާ މުބާރާތެކެވެ.
