ރަޝިއާއިން ސަޕްލައި ކުރާ ގޭހަށް ރޫބްލްސްއިން އަގު ދައްކަމުން ނުދާތީ، ޕޮލޭންޑާއި ބަލްގޭރިއާއަށް ގޭސް ފޯރުކޮށްދިނުން ހުއްޓާލައިފި އެވެ.
ޔޫރަޕަށް ގޭސް ފޯރުކޮށްދޭ މައި ކުންފުންޏަކީ ރަޝިއާގެ ގޭޒްޕްރޮމް އެވެ. އެ ކުންފުނިން ސަޕްލައި މެދުކަނޑާލި ފުރަތަމަ ދެ ގައުމަކީ ޕޮލޭންޑާއި ބަލްގޭރިއާ އެވެ.
ރަޝިއާ ސިފައިން ޔޫކްރެއިނަށް އަރައި ހަނގުރާމަ ފެށުމުން، ހުޅަނގުން އެޅި ފިޔަވަޅުތަކަށް ރައްދެއްގެ ގޮތުން ރަޝިއާއިން ޑިމާންޑް ކުރީ ގޭހަށް ރޫބްލްސްއިން ފައިސާ ދެއްކުމަށެވެ.
"ރޫބްލްސްއިން ފައިސާ ދައްކަމުން ނުދާތީ ގޭސްޕްރޮމްއިން ވާނީ ބަލްގޭރިއާ އާއި ޕޮލޭންޑަށް ސަޕްލައި ކުރުން ހުއްޓާލާފައި،" ކުންފުނިން ނެރުނު ބަޔާނެއްގައި ބުންޏެވެ.
ޕޮލޭންޑާރި ބަލްގޭރިއާއިން ބުނީ ގޭޒްޕްރޮމްއިން އަމަލު ކުރީ އެއްބަސްވުމާ ހިލާފަށް ކަމަށެވެ. ގޭޒްޕްރޮމްއަކީ ދުނިޔޭގެ އެންމެ ބޮޑު ގޭސް ކުންފުންޏެވެ.
"އެކުވެރި ނޫން" ގައުމުތަކުން ރޫބްލްސްއިން އަގު ނުދައްކާ ނަމަ ގޭސް ސަޕްލައި ކަނޑާލާނެކަމުގެ އިންޒާރު ރަޝިއާއިން ދިނީ މި މަހުގެ އެއް ވަނަ ދުވަހު އެވެ.
"އެއްވެސް ބަޔަކު އަޅުގަނޑުމެންނަށް ވެސް ހިލޭ އެއްވެސް އެއްޗެއް ނުވިއްކާ. އެހެންވީމާ އަޅުގަނޑުމެން ވެސް ހިލޭ ސާބަހަށް އެއްޗެހި ބަހާކަށް ނޫޅެން. އޭގެ މާނައަކީ މިހާރު ހުރި ކޮންޓްރެކްޓުތައް ހުއްޓާލެވޭނެއޭ،" ރައީސް ލެޑިމިއަ ޕުޓިން އޭރު ވިދާޅުވި އެވެ.
ހުޅަނގުގެ ގައުމުތަކާއި ކުންފުނިތަކުން ބުނީ ރޫބްލްސްއިން އަގު ދައްކަން ޑިމާންޑް ކުރުމަކީ ރަޝިއާއިން ސޮއިކޮށްފައިވާ އެއްބަސްވުންތަކާ ހިލާފު ޑިމާންޑެއް ކަމަށެވެ. އެއްބަސްވުންތަކުގެ ދަށުން އަގު ދައްކަން ކަނޑައަޅާފައި އޮންނަނީ ޔޫރޯ ނުވަތަ އެމެރިކާ ޑޮލަރުންނެވެ.
އެމެރިކާ އާއި ކެނެޑާއިން ރަޝިއާގެ ގޭހާއި ތެޔޮ ބޭނުން ކުރުން ހުއްޓާލި ނަމަވެސް، ޔޫރަޕިއަން ޔޫނިއަން (އީޔޫ) އިން އެ ފިޔަވަޅެއް ނާޅަ އެވެ. އީޔޫގެ ގައުމުތަކަށް ބޭނުންވާ ހަކަތަ އުފައްދަން ރަޝިއާގެ ގޭހާއި ތެލުގެ ސަޕްލައިއަށް ވަރަށް ބޮޑަށް ބަރޯސާވެ އެވެ.
އީޔޫއިން ބޭނުން ކުރާ ގޭހުގެ 40 ޕަސެންޓު އަދި ތެލުގެ 30 ޕަސެންޓު ލިބެނީ ރަޝިއާއިންނެވެ. ސަޕްލައި ހުއްޓިއްޖެ ނަމަ، ފަސޭހަކޮށް އެހެން ދިމާލަކުން އެ ތަކެތި ލިބޭނެ ގޮތެއް ވެސް ނެތެވެ. އީޔޫއަށް ގޭސް ފޯރުކޮށްދީގެން ރަޝިއާއިން ކޮންމެ ދުވަހަކު ވެސް 400 މިލިއަން ޔޫރޯ ލިބެ އެވެ.
