ކޮވިޑާ ގުޅިގެން ބޯޑަރު ކޮންޓްރޯލް ކުރަން ނިއުޒީލޭންޑް ސަރުކާރުން އަމަލު ކުރީ ގާނޫނާ ހިލާފަށް ކަމަށް އެ ގައުމުގެ ކޯޓަކުން ކަނޑައަޅައިފި އެވެ.
ފަނޑިޔާރު ޖިލިއަން މެލަން ނެރުއްވި 140 ސަފްހާގެ ނިންމުމުގައިވާ ގޮތުން އައިސޮލޭޝަނާއި ކަރަންޓީން ކުރިއަށް ގެންދިޔަ ގޮތުން ވަކިވަކި ހާލަތްތަކަށް ބަލައި އިސްކަން ދީ އަދި ލުއި ދީފައެއް ނުވެ އެވެ.
ކޮވިޑް ބަލި ފެތުރުން ކޮންޓްރޯލް ކުރެވުނީ އެ ފިޔަވަޅުތަކުގެ ސަބަބުން ނަމަވެސް، ފަރުދުންގެ ހާލަތަށް ބަލާފައި ނުވާތީ ހައްގުތަކަށް އުނިކަން ލިބިފައިވާ ކަމަށް ނިންމުމުގައިވެ އެވެ.
ސަރުކާރުން އަމަލު ކުރީ "ގާނޫނާ ހިލާފަށް" ކަމަށާއި ނިއުޒީލޭންޑްގެ ކޮންމެ ރައްޔިތަކަށް ވެސް ގައުމަށް އެތެރެވުމުގެ ހައްގު އޮންނަ ކަމަށް ފަނޑިޔާރު މެލަންގެ ނިންމުމުގައިވެ އެވެ.
ކޮވިޑާ ގުޅިގެން ސަރުކާރުން ގެންގުޅުނު ބޯޑަރު ފިޔަވަޅުތަކާ ދެކޮޅަށް ވެލިންގްޓަންގެ ހައި ކޯޓަށް މައްސަލަ ހުށަހެޅީ މިދިޔަ ފެބްރުއަރީ މަހު "ގްރައުންޑަޑް ކިވީޒް" ގްރޫޕުންނެވެ.
އެ ގްރޫޕަކީ ކޮވިޑް ފިޔަވަޅުތަކަށް ލުއި ދިނުމަށް ވަކާލާތު ކުރާ ގްރޫޕެކެވެ. އެ މީހުން ބުނީ ގައުމުން ބޭރުގައި ތިބި ނިއުޒީލޭންޑް ރައްޔިތުންގެ ހައްގުތަކަށް އުނިކަން ލިބިފައިވާ ކަމަށާއި ގައުމަށް އެނބުރި އަންނަން އުޅެ، ތަކުރާރުކޮށް ނާދެވުމުން ރައްޔިތުންނަށް ނަފްސާނީ ގޮތުން އަސަރުކޮށްފައިވާ ކަމަށެވެ.
ކޯޓަށް ހުށަހެޅި މައްސަލައިގައި ވަކިން ހާއްސަކޮށް ފާހަގަކުރީ 2021 ވަނަ އަހަރުގެ ސެޕްޓެމްބަރު އެއް ވަނަ ދުވަހުން ޑިސެމްބަރު 17 ވަނަ ދުވަހާ ހަމައަށް ތަންފީޒު ކުރި އުސޫލުތަކަށެވެ.
އެ މުއްދަތުގައި އައިސޮލޭޝަނާއި ކަރަންޓީނުވުމަށް ސަރުކާރުން ކަނޑައެޅި ކޮޓަރިތައް ފުރި، އެތައް ހާސް ބަޔަކަށް ގައުމަށް އެނބުރި ނާދެވި ތިބެން ޖެހުނެވެ.
އެގޮތުން ހުރި ހަމައެކަނި ފިރިހެން ދަރިފުޅު މަރުވުމުން، ޖަނާޒާގައި ބައިވެރިވާން ނިއުޒީލޭންޑަށް އެތެރެ ވާން މަސައްކަތް ކުރި މަންމައަކަށް، އެ ހުއްދަ ނުލިބުނު ކަމަށް ކޯޓަށް ވެއްދި މައްސަލައިގައި ފާހަގަކޮށްފައިވެ އެވެ.
އޭގެ އިތުރުން ފިރިހެން ދަރިފުޅު ކެންސަރަށް ފަރުވާ ކުރަން ފެށުމުން، އެހީވުމަށް ނިއުޒީލޭންޑަށް ދާން މަސައްކަތް ކުރި މަންމައަކަށް ވެސް ހުއްދަ ދީފައެއް ނުވެ އެވެ.
ނިއުޒީލޭންޑަށް އެތެރެވާ އެ ގައުމުގެ ރައްޔިތުން އައިސޮލޭޓް ކުރުމާއި ކަރަންޓީން ކުރުން ހުއްޓާލީ މިދިޔަ މާޗް މަހުގެ މެދު ތެރޭގަ އެވެ.
