ޔޫރަޕްގެ ނަން މަޝްހޫރު ކްލަބްތަކަށް ކުޅެފައިވާ ފޯވާޑް ޑިއޭގޯ ކޮސްޓާ، އިންޑިއާގެ އޭޓީކޭ މޯހަން ބަގާން އަށް ކުޅެން ލިބުނު ހުށަހެޅުން ދޫކޮށްލައިފި އެވެ.
މީޑިއާ ރިޕޯޓްތައް ބުނާގޮތުން ކޮސްޓާ، 33، އަށް އޭޓީކޭ އިން ހުށަހެޅީ ހަ މަސް ދުވަހުގެ ކޮންޓްރެކްޓެކެވެ. އެއީ މަހަކު 140،000 ޑޮލަރަށެވެ. އެކަމަކު، ކޮސްޓާ އެ ހުށަހެޅުން ދޫކޮށްލަން ނިންމީ އަލުން ޔޫރަޕްގެ ކްލަބަކާ ގުޅެން ބޭނުންވާތީ އެވެ. ކޮސްޓާ ގެންނަން އޭޓީކޭ އިން ބޭނުންވީ ކުރިއަށް އޮތް އޭއެފްސީ ކަޕާއި އިންޑިއަން ސުޕަ ލީގަށެވެ.
"ކޮސްޓާ ބުނީ އިންޑިއާގެ ކްލަބަކާ ގުޅެން މި ވަގުތު ޝައުގުވެރިކަމެއް ނެތް ކަމަށް،" އޭޓީކޭގެ އޮފިޝަލަކާ ހަވާލާދީ އިންޑިއާ ނޫހަކުން ރިޕޯޓްކޮށްފައިވެ އެވެ.
ކޮސްޓާ އެންމެ ފަހުން ކުޅެފައިވަނީ ބްރެޒިލްގެ އެތުލެޓިކޯ މިނެއިރޯ އަށެވެ. އެތުލެޓިކޯ މިނެއިރޯ އިން 50 އަހަރު ތެރޭ ފުރަތަމަ ފަހަރަށް ބްރެޒިލްގެ ލީގު ކާމިޔާބުކޮށްދޭން އެހީތެރިވި ކޮސްޓާ ވަނީ މިދިޔަ ޖެނުއަރީ މަހު އެ ކްލަބާ އެކު ހަދާފައިވާ ކޮންޓްރެކްޓް އުވާލައިފަ އެވެ. ކޮސްޓާ، އެތުލެޓިކޯ މިނެއިރޯއާ އެކު ކޮންޓްރެކްޓްގައި ހުރީ މި އަހަރު ޑިސެމްބަރު މަހުގެ ނިޔަލަށެެވެ.
ސްޕެއިންގެ މީޑިއާ ރިޕޯޓްތައް ބުނާގޮތުން ކޮސްޓާގެ ވިސްނުން ހުރީ ޔޫރަޕްގެ ކްލަބަކާ ގުޅި މި އަހަރު ފަހު ކޮޅު ގަތަރުގައި ބާއްވާ ފީފާ ވޯލްޑް ކަޕްގައި ކުޅޭ ސްޕެއިން ސްކޮޑުން ފުރުސަތު ލިބޭތޯ މަސައްކަތް ކުރުމަށެވެ.
ޕޯޗުގަލްގެ ސްޕޯޓިން ބްރާގާ އިން 2006 ވަނަ އަހަރު ކެރިއަރު ފެށި ކޮސްޓާގެ ކުޅުން އެންމެ ބޮޑަށް ފާހަގަވާން ފެށީ 2010 ވަަނަ އަހަރު އެތުލެޓިކޯ މެޑްރިޑްގައި ދައްކަން ފެށި ކުޅުމުގެ ސަބަބުންނެވެ. އޭގެ ފަހުން 2014 އިން 2017 އަށް އިންގްލެންޑްގެ ޗެލްސީގައި ވެސް ކޮސްޓާ ވަނީ ގިނަ ކާމިޔާބީތަކެއް ހޯދައިފަ އެވެ.
ޗެލްސީ އިން ވަކިވެ، 2017 ވަނަ އަހަރު އެތުލެޓިކޯ އަށް އަލުން ބަދަލުވުމަށް ފަހު އެ ޓީމަށް 2020 ވަނަ އަހަރުގެ ނިޔަލަށް ކުޅުނެވެ. އެތުލެޓިކޯ ދޫކޮށްލައި، ހަތް މަސް ދުވަހު ކްލަބަކާ ނުގުޅި ހުރުމަށް ފަހު އެތުލެޓިކޯ މިނެއިރޯ އަށް ސޮއިކުރީ މިދިިޔަ އަހަރުގެ އޮގަސްޓް މަހުގަ އެެވެ. އަދި މިހާރު ވަނީ އެ ހަ މަސް ދުވަސް ފަހުން އެ ޓީމުގެ ކޮންޓްރެކްޓް އުވާލައިފަ އެވެ.
