ރަޝިއާގެ ރައީސް ލެޑިމިއަ ޕުޓިން އާއި އދ. ގެ ސެކެޓްރީ ޖެނެރަލް އެންޓޯނިއޯ ގުޓެރޭޒް އަންނަ ހަފްތާގައި ބައްދަލުކުރަން ހަމަޖެހިއްޖެ އެވެ.
ރަޝިއާގެ ސިފައިން ޔޫކްރެއިނަށް އަރައި ހަނގުރާމަ ކުރާތާ 58 ދުވަސް ފާއިތުވެފައިވާ އިރު، އެތައް ހާސް ބަޔަކު މަރުވެ، 12 މިލިއަނަށް ވުރެ ގިނަ މީހުންގެ ގެދޮރު ވަނީ ގެއްލިފަ އެވެ.
"އެޕްރީލް 26 ވާ އަންގާރަ ދުވަހު، އދ. ގެ ސެކެޓްރީ ޖެނެރަލް އެންޓޯނިއޯ ގުޓެރޭޒް މޮސްކޯއަށް ވަޑައިގެން، ރަޝިއާގެ ފޮރިން މިނިސްޓަރު ސާގެއި ލެވްރޯވްއާ އެކު މަޝްވަރާ ކުރައްވާނެ،" ރަޝިއާ ސަރުކާރުގެ ތަރުޖަމާނު ޑިމިޓްރީ ޕެސްކޯވް ވިދާޅުވި އެވެ.
"ރަޝިއާގެ ރައީސް ލެޑިމިއަ ޕުޓިން އާއި ގުޓެރޭޒް ބައްދަލުކުރައްވާނެ."
އދ. ގެ ތަރުޖަމާނަކު މިދިޔަ ބުދަ ދުވަހު ވިދާޅުވީ ރަޝިއާ އާއި ޔޫކްރެއިނުގެ ރައީސުން، އދ. ގެ ސެކެޓްރީ ޖެނެރަލް ބައްދަލުކުރަން އެދި ހުށަހަޅާފައިވާ ކަމަށެވެ.
އދ. އިން ބުނީ ގުޓެރޭޒް މަސައްކަތް ކުރައްވަނީ ހަނގުރާމަ ނިންމަން ބޭނުންވާ މަޝްވަރާއަށް މަގުފަހި ކުރުމަށް ކަމަށެވެ.
ރަޝިއާއިން ޔޫކްރެއިންގައި ކުރާ ހަނގުރާމައަކީ އދ. ގެ ޗާޓަރާ ހިލާފު އަމަލެއް ކަމަށް ގުޓެރޭޒް ސިފަކުރެއްވި ފަހުން، ޕުޓިން އާއި ގުޓެރޭޒްއާ ދެމެދު އެއްވެސް މަޝްވަރާއެއް ކުރެވިފައެއް ނުވެ އެވެ. ރިޕޯޓުތައް ބުނާ ގޮތުން ޕުޓިން ވަނީ ގުޓެރޭޒްގެ ފޯނު ކޯލްތަކަށް ޖަވާބު ނުދެއްވާނެ ކަމަށް ވިދާޅުވެފަ އެވެ.
އދ. ގެ އިންސާނީ ހައްގުތަކާ ބެހޭ ހައި ކޮމިޝަނަރު މިޝޭލް ބެޝެލެޓް ހުކުރު ދުވަހު ވިދާޅުވީ ރަޝިއާއިން ޔޫކްރެއިންގައި ހިންގަމުންދާ ބައެއް އަމަލުތަކަކީ ހަނގުރާމައިގެ ޖަރީމާގެ ގޮތުގައި ބެލިދާނެ ކަމަށެވެ.
