ޔޫކްރެއިންގެ މަރިޔުޕޯލް ސިޓީއިން އެކަކަށް ވެސް ނުނިކުމެވޭނެހެން ބަންދު ކުރަން ރަޝިއާގެ ރައީސް ލެޑިމިއަ ޕުޓިން ރަޝިއާގެ ސިފައިންނަށް އަންވަގައިފި އެވެ.
މަރިޔުޕޯލް ސިޓީއިން ރަޝިއާ ސިފައިންނަށް ކޮންޓްރޯލް ނުކުރެވޭ ހަމައެކަނި ތަނަކަށް މިހާރު އޮތީ އަޒޮވްސްޓަލް ދަގަނޑު ފެކްޓްރީ އެވެ.
ރިޕޯޓުތައް ބުނާ ގޮތުން ޕުޓިން ސިފައިންނަށް އެންގެވީ އެތަން ހިފުމުގެ މަސައްކަތް ހުއްޓާލުމަށް ފަހު، މުޅި އެ ސަރަހައްދުން "މެއްސަކަށް ވެސް ނުނިކުމެވޭނެ ގޮތަށް" ބަންދު ކުރުމަށެވެ.
އެ ފެކްޓްރީއަކީ ސިޓީގެ އިރު ދެކުނުގައި އޮންނަ ހަތަރު އަކަ މޭލުގެ ބޮޑު ސަރަހައްދެއްގައި ހުންނަ ފެކްޓްރީއެކެވެ. އާއްމުންނާއި ޔޫކްރެއިން ސިފައިން ވެސް މިހާރު ތިބީ އެ ތަނުގެ ތެރޭގަ އެވެ.
އެ ސިޓީ ހިފުމަކީ ހަނގުރާމައިގައި ރަޝިއާގެ ބޮޑު ލަނޑުދަނޑިއެކެވެ. މަރިޔުޕޯލްގައި ތިބި ޔޫކްރެއިން ސިފައިން އަމާން ދިނުމަށް މީގެ ކުރިން އެތައް ފަހަރަކު ރަޝިއާއިން އިންޒާރު ދިނެވެ.
ނަމަވެސް ޔޫކްރެއިނުން ތަކުރާރުކޮށް ބުނަމުން ދަނީ އަމާން ނުދޭނެ ކަމަށާޢި އެންމެ ފަހު ވަގުތާ ހަމައަށް ވެސް ގައުމުގެ ބިން ދިފާއު ކުރާނެ ކަމަށެވެ.
