މި އަހަރު ނިމުމުގެ ކުރިން ޖަރުމަނުން ރަޝިއާގެ ތެޔޮ އެތެރެ ކުރުން ހުއްޓާލާނެ ކަމަށް އިއުލާންކޮށްފި އެވެ.
"ހޫނު މޫސުން އައުމުގެ ކުރިން ރަޝިއާގެ ތެލުގެ އިމްޕޯޓްތައް 50 ޕަސެންޓު މަދުކޮށް، މި އަހަރު ނިމުމުގެ ކުރިން އެއްކޮށް ހުއްޓާލާނަން. އޭގެ ފަހުން ގޭސް ވެސް އެތެރެ ކުރުން ހުއްޓާލާނަން،" ފޮރިން މިނިސްޓަރު އަނަލީނާ ބެއާބޮކް ވިދާޅުވި އެވެ.
މިހާރު ޖަރުމަނަށް ބޭނުންވާ ތެލުގެ 25 ޕަސެންޓު އަދި ގޭހުގެ 40 ޕަސެންޓު އެތެރެ ކުރަނީ ރަޝިއާއިންނެވެ. ކުއްލިއަކަށް ސަޕްލައި ހުއްޓިއްޖެ ނަމަ އިގްތިސާދު އިނދަޖެހުމުގެ ނުރައްކާ ބޮޑެވެ.
އެމެރިކާއިން ވެސް ރަޝިއާގެ ތެޔޮ އިމްޕޯޓް ކުރުން ހުއްޓާލާފައިވާ އިރު، މީގެ ކުރިން އިނގިރޭސިވިލާތުން ވެސް ބުނީ މި އަހަރު ނިމުމުގެ ކުރިން ހުއްޓާލާނެ ކަމަށެވެ.
ޖަރުމަނު ފޮރިން މިނިސްޓަރު ވިދާޅުވީ ރަޝިއާގެ ގޭހާއި ތެލަށް ބަރޯސާވުން ހުއްޓަން އެ ގައުމުން އަމަލު ކުރާނީ "ޔޫރަޕްގެ މަގުޗާޓާ" އެއް ގޮތަށް ކަމަށެވެ.
ޔޫރަޕިއަން ޔޫނިއަން (އީޔޫ) ގެ އަމާޒަކީ 2030 ވަނަ އަހަރުގެ ކުރިން ޔޫރަޕް ގައުމުތަކުން ހަކަތަ ހޯދުމަށް ރަޝިއާއަށް ބަރޯސާވުން ހުއްޓުވުމެވެ.
ހުޅަނގުގެ ގައުމުތަކުން ރަޝިއާގެ ތެލާއި ގޭހާ ދުރަށް ޖެހެން ނިންމީ ޔޫކްރެއިން ހަނގުރާމައާ ގުޅިގެންނެވެ. މީގެ ކުރިން ޖަރުމަނުން ބުނީ އެއީ އަމަލު ކުރަން އުނދަގޫ ނިންމުމެއް ކަމަށެވެ.
އެހެންވެ، ޔޫކްރެއިންގެ ރައީސް ވޮލޮޑިމިރް ޒެލެންސްކީގެ ފާޑުކިޔުން ވަރަށް ބޮޑަށް އަމާޒުވި އެވެ. ރަޝިއާގެ ހަތަކަ އެއްކޮށް މަނާ ނުކުރެވެނީ ޖަރުމަނާއި ހަންގޭރީއާ ހެދި ކަމަށް ޒެލެންސްކީ ތުހުމަތު ކުރެއްވި އެވެ.
