ރަށު ނޯޓު: ތ. ބުރުނި

ރަށު ނޯޓު: ތ. ބުރުނި

މަލިމް މޫސާއާއި އޭނާގެ އަނބި ދޮންއައިސައަށް ލިބުނު ފަތްމިނި، ދޮންހިޔަލަ އުފަންވީ ބުނެވޭ ގޮތުގައި ބުރުންޏަށެވެ. ދުނިޔޭގެ ލޯތަކަށް ފޮރުވައިގެން މަލިމް މޫސާގެ ދެމަފިރިން މި ރީތި ފަތްމިނި ގެންގުޅުނީ ވަލުތެރޭގައި، ބިންގަރާހެއްގައި ފޮރުވައިގެންނެވެ. އެރަށާ މާދުރުގައި އޮތް ދ. ހުޅުދެލީ އަލީފުޅަށް މި ފަތްމިންޏަކީ އޭނާގެ އަލަތު އަނބިމީހާ ކަމަށް ހުވަފެނުގައި ފެނެ އެވެ. އެންދެރިން އޮޑިއެއް ބަނދެގެން އެ އޮޑީގައި ބުރުންޏަށް މިސްރާބުޖެހީ އޭނާއަށް ހުވަފެނުގައި ފެނުނު ފަތްމިނި ހޯދުމަށެވެ.

އެ ވާހަކަ އިހަށް ބާއްވާފައި މިހާރު ފެންނަން އޮތް ބުރުންޏަށް ބަލާލަމާ ހިނގާށެވެ. ކޮޅުމަޑުލު ބުރުނީގެ ބޮޑުމިނަކީ 35 ހެކްޓަރެވެ. ރަށަށް ދެވިފައިވާ އިނގިރޭސި އަކުރާއި ނަންބަރަކީ އެން-1 އެވެ.

ރަށުގެ ބޮޑުމިނާ އަޅާބަލާއިރު މިއީ އާބާދީ ބޮޑު ރަށެއް ނޫނެވެ. ރަށުގައި މިހާރު ދިރިއުޅޭ މީހުންގެ އަދަދަކީ 423 އެވެ. ދެހާސް ސަތާރައިގެ ބޯހިމެނުމުގެ ހިސާބަށް ބަލާއިރު މިރަށުގެ އާބާދީއަކީ 322 އަންހެނުންނާއި 285 ފިރިހެނުންނާއެކު ޖުމުލަ 607 މީހުންނެވެ. ފެބުރުއަރީ 2022 ގެ ނިޔަލަށް ބަލާއިރު އާބާދީއަކީ 331 އަންހެނުންނާއި 301 ފިރިހެނުންނާއެކު ޖުމުލަ 632 މީހުންނެވެ. އެހެންވީމާ ވެއަތުވެދިޔަ ފަސް އަހަރު ދުވަހުގެ ތެރޭގައި އާބާދީއަށް އިތުރުވީ 25 ބޮލެވެ.

Advertisement

ބުރުންޏަކީ މަސްވެރި ރަށެކެވެ. ފަރުމަހުގެ މަސްވެރިކަމަކީ މިރަށުގެ އިގްތިސާދުގެ މުހިންމު ބައެކެވެ. ލޮނުމަސް އެޅުމާއި، ދަނޑުވެރިކަމާއި ފަންގިވިނުމަކީވެސް އާމްދަނީ ހޯދުމަށްޓަކައި މިރަށުގައި ކޮށްއުޅޭ މަސައްކަތްތަކެވެ.

ބުރުނި: ހިތްގައިމު މި ރަށަށް ދިމާވެފައިވާ ރަށް ގިރުމުގެ މައްސަލަ ހައްލުކުރުމުގެ މަސައްކަތް މިހާރު ވަނީ ފަށާފައި.
ބުރުނި: ހިތްގައިމު މި ރަށަށް ދިމާވެފައިވާ ރަށް ގިރުމުގެ މައްސަލަ ހައްލުކުރުމުގެ މަސައްކަތް މިހާރު ވަނީ ފަށާފައި.

ބުރުނި: ހިތްގައިމު މި ރަށަށް ދިމާވެފައިވާ ރަށް ގިރުމުގެ މައްސަލަ ހައްލުކުރުމުގެ މަސައްކަތް މިހާރު ވަނީ ފަށާފައި.

އާންމު ވިޔަފާރިކުރާ ހަތަރު ފިހާރައެއް މިރަށުގައި ހުރެ އެވެ. ކާބޯތަކެތީގެ ހިދުމަތް ދޭ ދެ ތަނެއް ހުންނައިރު، މިވަގުތު ހުރީ އެންމެ ގެސްޓްހައުސްއެކެވެ.

ރަށަށް ދިމާވެފައިވާ މައްސަލަތައް ގިނަ އެވެ. ކުނި ނައްތާލެވޭނޭ އެކަށީގެންވާ ގޮތެއް މިރަށުގައި ހަމަޖެހިފައެއް ނެތެވެ. ރަށް ގިރުމުގެ މައްސަލަ އޮތީ ކުރިމަތިވެފަ އެވެ. ރަށުގެ ބަނދަރު ހެދިފައި އޮތްނަމަވެސް ބަނދަރު ތޮށި އޮތީ ބޭނުންނުކުރެވޭ މިންވަރަށް ހަލާކުވެފަ އެވެ. ބަނދަރު އެހާ ތިލަ އެވެ. އެކަށީގެންވާ ސިއްހީ ހިދުމަތް ލިބޭކަށް ނެތެވެ. އެ ހިދުމަތް ހޯދުމަށް އެހެން ރަށަކަށް ދާން ބަލާއިރު ދަތުރުފަތުރުގެ ދަތިކަން އިންތިހާ އެވެ.

ބުރުނީގެ ގިރާ ސަރަހައްދު ހިމާޔަތްކުރުމުގެ މަސައްކަތް މިހާރު ދަނީ ހިނގަމުންނެވެ. ޖޫން 2022 ގެ ނިޔަލަށް އެ މަސައްކަތް ނިންމާލެވޭނޭ ކަމަށް ސަރުކާރުން އޮތީ ލަފާކޮށްފަ އެވެ. ބުރުނީގެ ރައްޔިތުންނަށް ސާފު ބޯފެން ފޯރުކޮށްދިނުމަށްޓަކައި ފެން އުފައްދާ ނިޒާމު ގާއިމުކުރުމުގެ މަސައްކަތްވެސް ދަނީ ހިނގަމުންނެވެ. ފެނަކަ އޮފީސް އިމާރާތާއި، ރަށު ސުކޫލުގެ ސްޓާފްރޫމް އަދި އޮފީސް އިމާރާތްކުރުމާއި ސުކޫލުގެ ޖާގައިގެ ދަތިކަން ހައްލުކުރުމަށް އިތުރު 6 ކްލާސް ރޫމް އިމާރާތްކުރުމުގެ މަސައްކަތްވެސް ކުރިއަށް އެބަ ދެއެވެ. މިރަށުގެ ވެސް ދަތުރުފަތުރުގެ ދަތިކަމަށް ހައްލެއް ގެނެވޭނީ ގައުމީ ދަތުރުފަތުރުގެ ނިޒާމު ހިނގައިގަތުމުންނެވެ.

ބުރުނި ރައްޔިތުން ރާގޮނޑި ހިފަނީ: ރާގޮނޑި ހިފުމަކީ އަބަދުވެސް ރަށް އެއްބައިވަންތަ ކުރުވާ ކަމެއް
ބުރުނި ރައްޔިތުން ރާގޮނޑި ހިފަނީ: ރާގޮނޑި ހިފުމަކީ އަބަދުވެސް ރަށް އެއްބައިވަންތަ ކުރުވާ ކަމެއް

ބުރުނި ރައްޔިތުން ރާގޮނޑި ހިފަނީ: ރާގޮނޑި ހިފުމަކީ އަބަދުވެސް ރަށް އެއްބައިވަންތަ ކުރުވާ ކަމެއް

ކޮންމެ އަހަރެއްގެ ހުޅަނގު މޫސުމުގައި ބުރުނީ ފަޅަށް ވަންނަ ރާގޮނޑި އައިނާއެކު އެރަށަށް އަންނަނީ އީދެކެވެ. ރަށުގެ ކުދި ބޮޑު އެންމެން އެކީ އެ މަސައްކަތުގައި ބައިވެރިވާނެ އެވެ. ކޮންމެ ދުވަހަކުވެސް ހިފާ ރާގޮނޑިތައް ރައްޔިތުންގެ މެދުގައި ހަމަހަމަ އުސޫލަކުން ބަހާލަނީ އެވެ. ރަށު ކައުންސިލް އުފެދުނުފަހުން މި ކަން ރާވައި ހިންގާ ފަރާތަކީ ކައުންސިލް އެވެ. ރާގޮނޑި ލިބުމުން އެ ކައްކައި ހިއްކުމާއި ރިހާކުރު ތައްޔާރުކޮށް ލާރިއަށް ހެދުމުގައި މައިގަނޑު ގޮތެއްގައި ހަރަކާތްތެރިވާނީ ރަށުގެ އަންހެނުންނެވެ. މިއީ ބުރުނީ ރައްޔިތުންގެ އެކުވެރިކަން ދައްކުވައިދޭ ލޯބި ކަމެކެވެ.

ދޮންހިޔަލައާއި އަލިފުޅުގެ ވާހަކައަށް އެނބުރި ދާނަމެވެ. ބުރުންޏަށް ގޮސް ތިލަފިހިގެއެއް އަޅައިގެން އަލީފުޅު ދިރިއުޅެން ފެށީ ވަލުތެރޭގަ އެވެ. ފަތްމިނި ދޮންހިޔަލައާއި އަލީފުޅު ބައްދަލުވީ މިހެން އުޅުމުގެ ތެރޭގަ އެވެ. އެކަކަށްޓަކައި ހެއްދެވުނު އަނެކަކު ފަދައިން ފުރަތަމަ ފެނިލުމުންވެސް ދެމީހުންނަށް އެކަކު އަނެކަކު ދެކެ ނިހާއީ އިޝްގުވެވުނެވެ. އިސާހިތަކު މި ހަބަރު ރަށު ތެރޭގައި ފެތުރިއްޖެ އެވެ. ބުރުންޏަށް އަރުވާލެވިފައި ހުރި ޅައިމަގު މީހަކަށް ހިޔަލަ ފެނި، ރަދުންގެ މައާފެއް ހޯދުމަށް އޭނާގެ ފަރާތުން އަރުވާ ވެދުމަކީ ބުރުނީގައި ފަތްމިންޏެއް ދިރިއުޅޭ ހަބަރު ކަމުގައި ހަދައިފި އެވެ. އެ ޒަމާނުގައި ހުރިހާ މޮޅަކާއި ހުރިހާ ރީއްޗެއްގެ ވެރިޔަކީ ރަދުންނެވެ. ރައްޔިތުންނަކީ އަޅުންނެވެ. ރަދުން ގަދަ ބާރުން ދޮންހިޔަލަ އަތުލައްވައި އޭނާގެ އަތްނބަކަށް ހަދަން މަސައްކަތްކުރި އެވެ. ދޮންހިޔަލަ އެކަމާމެދު ވީ ނުރުހުމާއި ނުގަބޫލާއެކުވެސް އެކަމުން މިންޖުވުމަށް ބާރެއް އިހްތިޔާރެއް ނެތުމުގެ ނަތީޖާއަކަށްވީ އޭނާގެ ފުރާނަ ފުންކަނޑާ ހަވާލުކުރުމެވެ. އަލީފުޅުގެ ލޭފަވެތި ހިތް އޭނާއަށް އަމުރުކުރީ ދޮންހިޔަލަ ނެތް ދުނިޔެއަކަށް ނޭވާ ނުލުމަށެވެ. ދޮންހިޔަލަ ނިމިދިޔަ މަގުން އަލީފުޅުވެސް ކަނޑަށް ޣަރަގުވެ ނިމިދިޔައީ އެވެ.

ކަމަނާ މިސްކަތް
ކަމަނާ މިސްކަތް

ކަމަނާ މިސްކަތް

ރާއްޖޭގެ ތާރީހުގެ މި މަޝްހޫރު ފޯކްލޯރު، ދޮންހިޔަލަ އާއި އަލީފުޅު ވާހަކައިގެ އަސްލަކީ ބުރުނީގައި ކިޔައިއުޅުނު ރައިވަރެކެވެ. ހަގީގަތެއްތޯ ހުރާފާތެއްތޯ ކަށަވަރުކުރެވޭނޭ އެއްވެސް ގޮތެއް ނެތެވެ. އެވާހަކައިގެ ތެދުކަމުގެ މައްޗަށް ބާރުދޭ ހެކިތަކަށް ހުރީ ބުރުނީގައި ދޮންހިޔަލަ ކަމަނާ ދިރިއުޅުނުކަމަށް ބުނާ ވަޅުގަނޑުވަރު ހުރި ތަނުގެ ގާގަނޑާއި އަދި ކަމަނަ އޮޅޭކިޔާތަނާއި ކަމަނާ މިސްކިތޭކިޔާ މިސްކިތެކެވެ. މިތަންތަން ބެލެހެއްޓިފައިވާ ގޮތާއި، އެ މިންވަރުގެ ދިރާސާތައް ހެދިފައި ނެތުމުގެ ސަބަބުން މިކަމާމެދު މުޖައްރިބު އެއްޗެއް ބުނަން އެކަކަށް ވެސް ނޭނގޭނެ އެވެ. އެހެނަސް ދޮންހިޔަލައާއި އަލިފުޅުގެ ލޯބި ފެށިގެން އައި ބުރުންޏަކީ އަދިވެސް ލޯބީގެ މަންޒިލެކެވެ. އެ ޖައްވުން އިހުސާސުކުރެވޭނޭ ހަމަހިމޭންކަމާއި، ރީތިކަމުގެ ކޮންމެ ޒައްރާއަކުން ވެސް ކިޔައިދެނީ ބުރުނީ ލޯބީގެ ވާހަކަ އެވެ. ހަގީގީ އިޝްގުގެ ވާހަކަ އެވެ.

ކޮމެންޓް

ފަހުގެ ޚަބަރު

އުމުރުން 70 އަށް ދުޅަހެޔޮކޮށް ދިއުމަށް ސައިންސްވެރިން އިރުޝާދު

އުމުރުން 30 ގެ އަހަރުތަކަކީ ހަށިގަނޑަށް ބަދަލުތައް އަންނަ ދުވަސްވަރަކަށް ވުމުން، މި އުމުރުގައި ކަސްރަތުކުރުމާއި ނިދުމުގެ އާދަތައް ރަނގަޅުކުރުމަކީ އުމުރުން ދުވަސްވާއިރު ދުޅަހެޔޮކަންމަތީ ހުރުމަށް އެޅޭ މުހިންމު ފިޔަވަޅެކެވެ. މީގެ އިތުރުން، އަނގަޔާއި ދަތްތަކުގެ ސިއްހަތަށް ސަމާލުކަން ދިނުމާއި ނުރަނގަޅު އާދަތަކާ ދުރުހެލިވުމަކީ މުސްކުޅިވުމުން ކުރިމަތިވާ ބަލިތަކުން ރައްކާތެރިކޮށްދީ އުމުރު ދިގުކޮށްދޭނެ ކަންކަމެވެ.

ޖީޓީއޭ 6 ރެކޯޑް މާކްސްއަކާއެކު ނެރެފި

ތޭރަ އަހަރުގެ ދިގު އިންތިޒާރަކަށްފަހު ނެރުނު ޖީޓީއޭ 6 އަށް ރެކޯޑް މާކްސްއެއް ލިބި، ގޭމިން ދާއިރާއަށް އިންގިލާބީ ބަދަލެއް ގެނުވައިފިއެވެ. މި ގޭމުގެ ގްރެފިކްސް އާއި ވާހަކަ ކިޔައިދޭ ގޮތް ފުރިހަމަވުމުގެ އިތުރުން، މިއީ މި ސިލްސިލާގައި އަންހެން ކެރެކްޓަރަކަށް މައިގަނޑު ދައުރެއް ދިން ފުރަތަމަ ފަހަރެވެ.

މަސް ނުކައިވެސް ހަށިގަނޑަށް ބޭނުންވާ ދަގަނޑު ހޯދިދާނެ!

މަހުގެ ބާވަތްތަކުގެ އިތުރުން ފަތްޕިލާވެއްޔާއި ގޮވާމުގެ ބާވަތްތަކުން ވެސް ހަށިގަނޑަށް ބޭނުންވާ ދަގަނޑުގެ މާއްދާ ހޯދިދާނެކަން ސިއްހީ މާހިރުން ފާހަގަކުރެއެވެ. މިގޮތުން ކާނާ ތައްޔާރުކުރާ ގޮތަށް ބަދަލު ގެނައުމާއި، ވިޓަމިން ސީ އެކުލެވޭ ތަކެއްޗާއެކު ކެއުމަކީ ގަސްގަހާގެހިން ލިބޭ ދަގަނޑު ހަށިގަނޑަށް ދަމައިގަންނަ މިންވަރު އިތުރުކޮށްދޭނެ ކަންކަމެވެ.

އާ ޖޭމްސް ބޮންޑަކަށް ރޮބަޓް ޕެޓިންސަން

ޖޭމްސް ބޮންޑުގެ ރޯލު ކުޅޭނެ އާ އެކްޓަރަކަށް އިނގިރޭސި އެކްޓަރު ރޮބަޓް ޕެޓިންސަން ހަމަޖައްސައި، 2028 ވަނަ އަހަރު ރިލީޒްކުރާ ބޮންޑު ސިލްސިލާގެ 26 ވަނަ ފިލްމު ޑެނިސް ވިލެނޫވް ޑައިރެކްޓްކުރާ ގޮތަށް އެމެޒޯން އެމްޖީއެމް އިން ވަނީ އިއުލާންކޮށްފައެވެ. މި ރޯލު ލިބުމަކީ ބޮޑު ޝަރަފެއް ކަމަށް ޕެޓިންސަން ބުނެފައިވާއިރު، މިއީ ޑެނިއަލް ކްރެއިގަށް ފަހު މި މަޝްހޫރު ޖާސޫސީ ރޯލުން ފެންނާނެ ހަތްވަނަ އެކްޓަރެވެ.

އަނދިރީގައި ފެންވެރުން ނިދި އައުން ފަސޭހަވޭތަ؟

ނިދުމުގެ ކުރިން އަނދިރީގައި ފެންވެރުމަކީ ހަށިގަނޑުން މެލަޓޯނިން އުފައްދައިދީ، ސިކުނޑި ހަމަޖައްސައިދީ އަވަހަށް ނިދި އައުމަށް އެހީތެރިވެދޭ ކަމެއް ކަމަށް ސިއްހީ މާހިރުން ބުނެއެވެ. މިގޮތަށް ފެންވެރުމުން ހަށިގަނޑުގެ ފިނިހޫނުމިން ދަށްވެ، ދުވަހުގެ ސްޓްރެސް ކުޑަކޮށްދީ ނަފްސާނީ ގޮތުން އަރާމު ލިބިގެންދެއެވެ. ނަމަވެސް މިއީ ނިދުމުގެ ބޮޑެތި ބަލިތަކަށް އޮތް ދާއިމީ ހައްލެއް ނޫންކަމަށް މާހިރުން ފާހަގަކުރެއެވެ.

ޕްރޮސްޓޭޓް ކެންސަރަށް ގަވާއިދުން ސްކްރީން ކުރަން ބުނެފި

ޕްރޮސްޓޭޓް ކެންސަރު ޖެހޭ މިންވަރު އިތުރުވަމުންދާތީ، އެމެރިކަން ކެންސަރ ސޮސައިޓީން ވަނީ އުމުރުން 50 އަހަރާއި 69 އަހަރާ ދެމެދުގެ ފިރިހެނުން ގަވާއިދުން ސްކްރީން ކުރުމަށް އާ އިރުޝާދުތަކެއް ނެރެފައެވެ. މި ބަދަލުގެ ދަށުން ބަލީގެ ނުރައްކާ ބޮޑު މީހުން އުމުރުން 45 އަހަރުން ފެށިގެން ކޮންމެ އަހަރަކު ޓެސްޓުކުރަން ލަފާދީފައިވާއިރު، މީގެ މަގުސަދަކީ ބަލި ކުރީކޮޅު ދެނެގަނެ މަރުވާ މިންވަރު މަދުކުރުމެވެ.

ޓޭލާ ސުވިފްޓަކީ ފޭކު ސަޕޯޓަރެއް ކަމަށް ކުޅުންތެރިން ބުނެފި

ނިއުޔޯކް ނިކްސްގެ ބައެއް ކުޅުންތެރިން ޓޭލާ ސުވިފްޓަކީ ދެއްކުންތެރިކަމަށް މެޗުތަކަށް އަންނަ "ފޭކު" ސަޕޯޓަރެއް ކަމަށް ބުނުމުން، އެ ޓީމުން އޭނާގެ ދިފާއުގައި ވާހަކަދައްކައިފިއެވެ. ޓީމުގެ ތަރުޖަމާނު ވަނީ ސުވިފްޓަކީ ގިނަ ދުވަސްތަކެއް ވަންދެން ޓީމަށް ސަޕޯޓްކުރާ ވަފާތެރިއެއްކަން ފާހަގަކޮށް، ކުޅުންތެރިންގެ ވާހަކަތައް ދޮގުކޮށްފައެވެ.

Newsletter

Get the latest news delivered straight to your inbox