ރައްޔިތުންގެ މަޖިލީހުގައި ވެރިކަން ކުރާ ކޯލިޝަނުގެ މައި ޕާޓީ އެމްޑީޕީގެ ސުޕާ މެޖޯރިޓީ ބޭނުންކޮށްގެން ތަޅުމުގައި އިދިކޮޅުގެ އަޑުކަނޑުވާލައި، ރަނގަޅަށް ބަހުސްކުރަން ޖާގަ ނުދޭ ކަމަށް ވިދާޅުވެ, މަޖިލީހުގެ މައިނޯރިޓީ ލީޑަރު އަދި އޭދަފުށި ދާއިރާގެ މެމްބަރު އަހުމަދު ސަލީމް މިއަދު ނުރުހުން ފާޅު ކުރައްވައިފި އެވެ.
ރާއްޖޭގައި މުވަައްޒަފަކަށް ދެވޭނެ އެންމެ ކުޑަ އުޖޫރަ ކަނއެޅުމަށް ފަހު، އެއާ ގުޅުވައި، ޓޫރިޒަމަށް ދޫކުރާ ބިންތަކުގެ ކުލިކުޑަކުރަން ސަރުކާރުން ހުށަހަޅާފައިވާ ބިލަށް މިއަދު ކުރިއަށް ދިޔަ ބަހުސްގައި މާވަށު ދާއިރާގެ އިދިކޮޅު މެމްބަރު މުހައްމަދު ސައީދު ވަނީ ސަރުކާރުގެ ސިޔާސަތުތަކަށް ވަރަށް ބޮޑަށް ފާޑުވިދާޅުވެފަ އެވެ.
މިގޮތުން، ރާއްޖޭގެ އިގުތިސޯދީ ހާލަތާ ގުޅޭގޮތުން ވާލްޑް ބޭންކުން ދާދި ފަހުން ނެރުނު ރިޕޯޓާ ހަވާލާ ދެއްވައި ސައީދު ވަނީ ކަންބޮޑުވުންފާޅު ކުރައްވައިފަ އެވެ.
ސައީދު ވާހަކަ ދައްކަވަމުން ގެންދެވިއިރު، އެމްޑީޕީގެ ބައެއް މެމްބަރުން ވަނީ ނިޒާމީ ނުކުތާތައް ނަންގަވައި އެ ވާހަކަ އަށް ހުރަސްއަޅަން މަސައްކަތް ކުރައްވައިފަ އެވެ. އިދިކޮޅު މެމްބަރުން ބަހުސް ކުރައްވާއިރު، އެމްޑީޕީގެ މެމްބަރުން ފުލުފުލުގައި ނިޒާމީ ނުކުތާ ނެގުން މިހާރު ވަނީ އާންމު ކަމަކަށް ވެފަ އެވެ.
ސައީދުގެ ވާހަކަ ނިންމާލެވުމާއެކު، ސަލީމް މިއަދު ވަނީ އެކަމާ ދެކޮޅަށް ތެދުވެވަޑައިގެންފަ އެވެ. އޭނާ ވިދާޅުވި ގޮތުގައި މަޖިލީހުގައި އިދިކޮޅު ތަމްސީލުކުރާ ނުވަ މެމްބަރުން ތިބޭއިރު، މައިނޯރިޓީއަށް މިހާރަށްވުރެ ބޮޑަށް އިހުތިރާމް ކުރަންޖެހެ އެވެ.
"މައިނޯރިޓީގެ ހައެއްކަ މީހުން ތިބޭއިރު، އެ މީހުން ވާހަކަ ދައްކަން ފަށާއިރަށް 65 މީހުން ނުކުމެ ނިޒާމީ ނުކުތާ ނަގައިގެން ވާހަކަ ހުއްޓުވުމަކީ ވަރަށް ނިކަމެތި ކަމެއް،" ވަރަށް ބޮޑަށް ހިތްހަމަނުޖެހިވަޑައިގެން ހުންނަވާ ސަލީމް ވިދާޅުވި އެވެ.
އެ ހިސާބުން ނިންމާ ނުލައްވައި، ރިސޯޓު ހިންގާ ފަރާތްތަކުން އެދުމުގެ ކުރިން މިނިމަމް ވޭޖާ ގުޅުވައި ރިސޯޓު ކުލި ކުޑަކުރަން އުޅެނީ ކޮންމެވެސް ޑީލެއްގެ ދަށުން ކަމަށް ސައީދު ކުރެއްވި ތުހުމަތު ސަލީމް ވެސް ނުސީދާކޮށް ތަކުރާރު ކުރެއްވި އެވެ.
"ދިވެހި ސަރުކާރު ވިޔަފާރިވެރިންގެ އަތްދަށުވެފައި އޮވެގެން ނުވާނެ. އެހެންވެއްޖެއްޔާ ސަރުކާރު އިސްތިއުފާ ދީފަ ގެއަށްދޭ،" ސަލީމް ވިދާޅުވި އެވެ.
ނިޒާމީ ނުކުތާތައް ނަގައިގެން އިދިކޮޅުގެ ވާހަކަތައް ހުރަސް ނޭޅުމަށް މަޖިލީހުގެ ރިޔާސަތުން ވެސް މީގެ ކުރިން ވަނީ އެމްޑީޕީގެ މެމްބަރުންނަށް އިލްތިމާސްކޮށްފަ އެވެ.
