ޔޫކްރެއިންގެ އިރުމަތި ނުވަތަ ޑޮންބަސް ސަރަހައްދު ހިފުމަށް ރަޝިއާއިން ބޮޑު އޮޕަރޭޝަނެއް ފަށާފައިވާ ކަމަށް ޔޫކްރެއިންގެ ރައީސް ވޮލޮޑިމިރް ޒެލެންސްކީ ވިދާޅުވެއްޖެ އެވެ.
"ޑޮންބަސް ހިފުމަށް ކުރާ ހަނގުރާމަ ރަޝިއާ ސިފައިން ފަށައިފި. މިކަމަށް އެ މީހުން ތައްޔާރު ވާތާ ވަރަށް ދުވަސް ވެއްޖެ. ރަޝިއާ ސިފައިންގެ ބޮޑު ބަޔެއްގެ މިހާރުގެ އަމާޒަކީ މި އޮޕަރޭޝަން،" ޓެލެގްރާމްގައި ޒެލެންސްކީ ވިދާޅުވި އެވެ.
"ރަޝިއާގެ ކިތައްމެ ގިނަ އަދަދެއްގެ ސިފައިން ހަނގުރާމައިގައި ބައިވެރިވި ނަމަވެސް އަޅުގަނޑުމެން ދުލެއް ނުދޭނަން. އަޅުގަނޑުމެން ދިފާއުގައި މަސައްކަތް ކުރާނަން."
ޔޫކްރެއިންގެ ވެރިރަށް ކިޔެވް ވަށައިގެންވާ ސަރަހައްދުން ރަޝިއާ ސިފައިން ދިޔަ ފަހުން، މިހާރު އެންމެ ބޮޑަށް ހަނގުރާމަ ކުރިއަށް ދަނީ އިރުމަތީ ޔޫކްރެއިންގަ އެވެ.
އިރުމަތީ ޔޫކްރެއިން ނުވަތަ ޑޮންބަސް ސަރަހައްދުގައި 2014 ވަނަ އަހަރުން ފެށިގެން ވެރިކަން ކުރަނީ ރަޝިއާއަށް ތާއީދު ކުރާ ޔޫކްރެއިންގެ ގްރޫޕުތަކުންނެވެ. ނަމަވެސް ޔޫކްރެއިންގެ ސަރުކާރުން އެ ތަނުގެ ބައެއް ކަންކަން އަދިވެސް ކޮންޓްރޯލް ކުރެ އެވެ.
ހޯމަ ދުވަހު އިރުމަތީ ޔޫކްރެއިންގައި ރަޝިއާއިން ދިން ހަމަލާތަކުގައި އާއްމުންގެ އަށް މީހުން މަރުވި އެވެ.
ފެބްރުއަރީ 24 ވަނަ ދުވަހު ރަޝިއާގެ ސިފައިން ޔޫކްރެއިނަށް އެރުމުގެ ކުރިން ރަޝިއާގެ ރައީސް ލެޑިމިއަ ޕުޓިން ވަނީ އިރުމަތީ ޔޫކްރެއިންގެ ޑޮނެސްކް އަދި ލުހާންސްކް މިނިވަން ދައުލަތްތަކެއްގެ ގޮތުގައި ބަލައިގަންނަން ނިންމަވާފަ އެވެ.
ރަޝިއާއިން ބުނާ ގޮތުގައި ޔޫކްރެއިންގައި ހަނގުރާމަ ކުރަނީ ޔޫކްރެއިން ސިފައިންގެ އަޅުވެތިކަމުންނާއި އަނިޔާވެރިކަމުން ޑޮނެސްކް އަދި ލުހާންސްކް މިނިވަން ކުރުމަށެވެ.
