މާލޭގައި ބިދޭސީންތަކެއްގެ މެދުގައި މިރޭ ހިންގި މާރާމާރީއާ ގުޅިގެން 37 އަހަރުގެ ބިދޭސީއެއް ހައްޔަރުކޮށްފި އެވެ.
މިރޭ މާލޭ ސޯސަން މަގުގައި ބިދޭސީންތަކެއްގެ މެދުގައި ހިންގި އެ މަރާމާރީގައި އެކަކަށް އަނިޔާވެ ވަނީ ފަރުވާއަށް ހޮސްޕިޓަލަށް ގެންގޮސްފަ އެވެ.
ފުލުހުން ބުނީ އެ މައްސަލައާ ގުޅިގެން އުމުރުން 37 އަހަރުގެ ފިރިހެނަކު ހައްޔަރުކޮށްފައިވާ ކަމަށެވެ. ނަމަވެސް، އެއީ ކޮން ގައުމެއްގެ މީހެއް ކަމެއް ފުލުހުން ނުބުނެ އެވެ.
މިއީ ބިދޭސީންގެ މެދުގައި މިއަދު ހިންގި ދެވަނަ މާރާމާރީ އެވެ. އެންމެ ފުރަތަމަ މާރާމާރީއެއް ހިންގާފައިވަނީ ހުޅުމާލޭގައި ހަވީރުގެ ވަގުތެއްގަ އެވެ. އެ މަރާމާރީގައި އަނިޔާވި ބަންގްލަދޭޝްގެ މީހާ ވަނީ މަރުވެފަ އެވެ.
އެ ހަމަލާގެ ތުހުމަތު ކުރެވޭ ޕާކިސްތާނަށް ނިސްބަތްވާ މުހައްމަދު އާބިދު ކިޔާ މީހަކު ހޯދުމުގެ މަސައްކަތް ފުލުހުން ދަނީ ކުރަމުންނެވެ.
ހަމަލާ އަމާޒުވެފައިވަނީ ބަންގްލަދޭޝް މީހާގެ ބޮލަށާއި ކަރަށެވެ. މައުލޫމާތު ލިބޭ ގޮތުގައި އޭނާ ހޮސްޕިޓަލަށް ގެންދިޔައިރު ވެސް ވަނީ މަރުވެފަ އެވެ.
