ޖައްވުގައި 183 ދުވަސް ނުވަތަ ހަ މަސް ހޭދަ ކުރުމަށް ފަހު ޗައިނާގެ ތިން އެސްޓްރޮނޯޓުން އެނބުރި ދުނިޔެއަށް އައިސްފި އެވެ.
މީގެ ކުރިން ޗައިނާގެ އެސްޓްރޮނޯޓުން މިހާ ގިނަ ދުވަސް ޖައްވުގައި ހޭދަކޮށްފައެއް ނުވެ އެވެ. އެ މީހުން އެނބުރި ދުނިޔެއަށް ދަތުރު ކުރި ކެޕްސޫލް ތިރިކުރީ އުތުރު ޗައިނާއަށެވެ.
އެމެރިކާއާ ވާދައަށް ޗައިނާއިން ހިންގާ ޖައްވީ މިޝަނުން ކާމިޔާބުކަމާ އެކު ޝެންޒައު-13 އުޅަނދުގެ ދަތުރުކޮށްފައިވާ އިރު، އޭގެ ކުރިން ޗައިނާއިން ވަނީ މާސް އާއި ހަނދަށް ކުދި ރޮބޮޓުތަކެއް ފޮނުވާފަ އެވެ.
ޗައިނާގެ ތިން އެސްޓްރޮނޯޓުން ފާއިތުވި ހަ މަސް ހޭދަކުރީ އެ ގައުމުން ބިނާކުރަން މަސައްކަތް ކުރާ ޖައްވީ ސްޓޭޝަން ޓިއަންގޮންގްގެ މައި މޮޑިއުލް، ޓިއަންހޭގެ ތެރޭގަ އެވެ.
އެސްޓްރޮނޯޓުން ލޭންޑިން ކެޕްސޫލްގައި ދުނިޔެއަށް ތިރިކުރި މަންޒަރު ސީސީޓީވީން ވަގުތުން ދުރަށް ދެއްކި އެވެ. އެ މީހުންގެ ތެރޭގައި ހިމެނޭ ވާންގްއަކީ ޖައްވުގައި ހިނގި ނުވަތަ "ސްޕޭސްވޯކް" ކުރި ޗައިނާގެ ފުރަތަމަ އަންހެން މީހާ އެވެ.
ވާންގް އާއި އެސްޓްރޮނޯޓް ޒާއީ މިދިޔަ ނޮވެމްބަރު މަހު މޮޑިއުލުން ބޭރުގައި ހަ ގަޑިއިރު ހޭދަކުރީ ޖައްވީ ސްޓޭޝަނުގެ ބައެއް މަސައްކަތްތައް ކުރުމަށެވެ.
އެ މިޝަންގެ ކޮމާންޑަރެއްގެ ގޮތުގައި ދިޔަ 55 އަހަރުގެ ޒާއީއަކީ "ސްޕޭސް ވޯކް" ކުރި ޗައިނާގެ ފުރަތަމަ މީހާ އެވެ. އޭނާ އެކަން ހާސިލްކުރީ 2008 ވަނަ އަހަރު އެވެ. ދެން މިޝަންގައި ހިމެނޭ ޔޭ އަކީ ޗައިނާގެ ޕީޕަލްސް ލިބެރޭޝަން ލަޝްކަރުގެ ޕައިލެޓެކެވެ.
ޗައިނާގެ ދައުލަތުގެ ހަބަރު ފަތުރާ ސީސީޓީވީން ބުނީ އެ ގައުމުގެ ޖައްވީ ސްޓޭޝަނުގައި އެސްޓްރޮނޯޓުން އެންމެ ގިނަވެގެން ހޭދަކުރާނީ ހަ މަހުގެ މުއްދަތެއް ކަމަށް ކަނޑައަޅާފައިވާ ކަމަށެވެ.
