ރަޝިއާގެ ތެޔޮ ގަތުން ހުއްޓާލާފައި ނުވާ ޔޫރަޕްގެ ގައުމުތަކުން "ފައިސާ ހޯދަނީ އެހެން މީހުންގެ ލޭ އޮހޮރުވައިގެން" ކަމަށް ޔޫކްރެއިންގެ ރައީސް ވޮލޮޑިމިރް ޒެލެންސްކީ ވިދާޅުވެއްޖެ އެވެ.
ބީބީސީއަށް ދެއްވި އިންޓަވިއުއެއްގައި ޒެލެންސްކީ ވަކިން ފާހަގަކުރެއްވީ ޖަރުމަނުވިލާތާއި ހަންގެރީގެ ނަމެވެ. ރަޝިއާގެ ހަތަކަ އެއްކޮށް މަނާ ނުކުރެވެނީ އެ ދެ ގައުމާ ހެދި ކަމަށް އޭނާ ތުހުމަތު ކުރެއްވި އެވެ.
ހުޅަނގުގެ ގައުމުތަކުން ރަޝިއާއާ ދެކޮޅަށް އަޅާފައިވާ ބައެއް ފިޔަވަޅުތަކަށް ޖަރުމަނުން ތާއީދު ކުރި ނަމަވެސް، ރަޝިއާގެ ތެލާއި ގޭސް ގަތުން ހުއްޓާލަން ޖަރުމަނުން ބޭނުމެއް ނުވެ އެވެ.
"އަޅުގަނޑުމެންގެ ބައެއް އެކުވެރިންނާއި ބައިވެރިންނަށް އެބަ ވިސްނޭ މިއީ ތަފާތު ހާލަތެއްކަން. މިއީ ވިޔަފާރި އާއި ފައިސާއާ ގުޅޭ ހާލަތެއް ނޫން. މިއީ ދިރިހުރުމާ ގުޅިފައި އޮތް ހާލަތެއް،" ޒެލެންސްކީ ވިދާޅުވި އެވެ.
ހުޅަނގުގެ ގައުމުތަކަށް ޒެލެންސްކީ ގޮވާލެއްވީ ޔޫކްރެއިނަށް އިތުރު ހަތިޔާރު ދިނުމަށެވެ. އަދި ބޭނުންވާ އަވަސް ސްޕީޑްގައި ހަތިޔާރު ނުލިބޭ ކަމަށް ފާހަގަކުރެއްވި އެވެ.
"އެމެރިކާ އާއި އިނގިރޭސިވިލާތާއި ޔޫރަޕްގެ ބައެއް ގައުމުތަކުން އެބަ ބޭނުންވޭ އެހީ ވާން އަދި އެބަ އެހީވަމުން ދޭ. އެކަމަކު މިހާރަށް ވުރެ އަވަހަށް އެހީ ބޭނުން."
ޔޫކްރެއިންގެ ވެރިރަށް ކިޔެވް އާއި މެދުތެރެ އަދި އުތުރުގެ ބައެއް ހިސާބުތައް ދޫކޮށް ރަޝިއާ ސިފައިން ދިޔަ ނަމަވެސް، އިރުމަތީގައި ހަނގުރާމަ ގޯސްވަމުންދާ މަންޒަރު ފެންނަމުންދެ އެވެ.
ދެކުނުގައި އޮންނަ މަރިޔުޕޯލް ސިޓީ ހިފަން ރަޝިއާއިން ކުރާ މަސައްކަތުގައި، އެ ސިޓީ އެއްކޮށް ސުންނާފަތިވެފައިވާ އިރު، ވަރަށް އަވަހަށް އެ ތަނުގެ ކޮންޓްރޯލް ރަޝިއާއަށް ލިބޭނެ ކަމަށް ބެލެވެ އެވެ.
