އިންޑިއާގެ ފިލްމު އިންޑަސްޓްރީގެ ތާރީހުގައި އެންމެ ބޮޑެތި ކައިވެނިތަކުގެ ތެރެއިން ގުނާވެލޭނެ ކަމަށް ބެލެވޭ ރަންބީރް ކަޕޫރާއި އާލިއާ ބަޓްގެ ކައިވެނި ބުރާސްފަތި ދުވަހު އޮންނާނެ އެވެ.
ބޮލީވުޑްގެ ނަން މަޝްހޫރު ތަރިން ހަފްލާގައި ބައިވެރިވާނެ ކަމަށް ބެލެވޭ އިރު، އިންޑިއާގެ ނޫސްތަކުގެ ފަލަ ސުރުހީގައި ވަނީ އެ ވާހަކަ އެވެ. ޓްވިޓާގައި އެ ޖޯޑުގެ ނަން ޓްރެންޑްވަމުންދާ އިރު، އިންޑިއާގެ ސޯޝަލް މީޑިއާ އެހެން ޕްލެޓްފޯމުތަކުން ވެސް ފެންނަނީ އެ މީހުންގެ ވާހަކަ އެވެ.
ރަންބީރާއި އާލިއާއަކީ މި ވަގުތު ބޮލީވުޑްގެ އެންމެ މަގްބޫލް ތަރިންގެ ތެރޭގައި ހިމެނޭ ދެ މީހުންނެވެ. އެ މީހުންގެ ފޭނުން ދުނިޔޭގެ އެތަން މިތަނުގައި ވެ އެވެ.
ރަންބީރާއި އާލިއާގެ ކައިވެނި ބުރާސްފަތި ދުވަހު އޮންނާނެކަން އިއުލާނު ކުރީ، ބުދަ ދުވަހު، ރަންބީރްގެ މަންމަ އަދި ކުރީގެ އެކްޓްރެސް ނީތޫ ސިންގް އެވެ.
ރިޕޯޓުތައް ބުނާ ގޮތުން ކައިވެނި އޮންނާނީ މުމްބާއީގައި ހުންނަ ކަޕޫރް އާއިލާގެ ގޭގަ އެވެ. ރަންބީރާއި އާލިއާ އެކުގައި ފެންނަ ފުރަތަމަ ފިލްމް "ބްރާހްމާސްތްރަ" ނެރޭނީ މި އަހަރު ފަހުކޮޅު އެވެ.
އެ ފިލްމުގައި އެ މީހުންނާ އެކު ފެނިގެންދާ އަމީތާބް ބަޗަން އިންސްޓަގްރާމް މެދުވެރިކޮށް ކައިވެނީގެ ތަހުނިޔާ ފޮނުވަމުން ބުނީ ދިރިއުޅުމުގައި ކާމިޔާބަށް އެދޭ ކަމަށެވެ.
"ބްރާހްމާސްތްރަ" ގެ ޑިރެކްޓަރު އާޔަން މުކަރްޖީ ބުނީ އެ ދެ ތަރިން އުމުރަށް އެކުގައި ވުމަށް އެދޭ ކަމަށެވެ. އާޔަން މުކަރްޖީއަކީ ރަންބީރާއި އާލިއާގެ ގާތް އެކުވެރިއެކެވެ.
ކައިވެންޏަށް ފޭނުންގެ ބޮޑު ސަމާލުކަމެއް ވެސް ލިބިފައިވާ އިރު، ގިނަ އަދަދެއްގެ މީހުން ވަނީ ރަންބީރާއި އާއިލާގެ ގެ ކައިރިއަށް ޖަމާވެފަ އެވެ. ކަޕޫރް އާއިލާގެ ގެ ކައިރީގައި ވަނީ ސެކިއުރިޓީ ވަރުގަދަކޮށްފަ އެވެ.
ރިޕޯޓުތައް ބުނާ ގޮތުން ރަންބީރާއި އާލިއާ ބޭނުން ވަނީ ކައިވެނީގެ ހަފްލާ ވީހާވެސް "އިންޓިމޭޓް" ކުރުމަށެވެ. އެހެންކަމުން މާ ގިނަ މީހުންނަށް ދައުވަތު ދީފައެއް ވެސް ނުވެ އެވެ.
އެ ތަރިންގެ މެހެންދީ ނުވަތަ ހީނާ އެޅުމުގެ ރަސްމިއްޔާތު ބުދަ ދުވަހު ކުރިއަށް ދިޔައިރު، ރަންބީރާ ދެބެއިންގެ ދެދަރި މަޝްހޫރު އެކްޓަރުން، ކަރީނާ އާއި ކަރިޝްމާ ބައިވެރިވި އެވެ.
