ރަށްރަށުގައި އުފެދޭ ކުނި ރައްކާތެރި ގޮތުގައި މެނޭޖުކުރުމަށް ހުނަރުވެރި ދިވެހިން އުފައްދަން ޖެހޭ ކަމަށް އެންވަޔަރަމަންޓް މިނިސްޓަރު އައިމިނަތު ޝައުނާ މިއަދު ވިދާޅުވެއްޖެ އެވެ.
ސަރުކާރުގެ ސްޓްރެޓީޖިކް އެކްޝަން ޕްލޭންގައި އަމާޒު ހިފާފައިވާ ފަދައިން ކުންޏަކީ އޭގެން ނަފާ ލިބޭ ވަސީލަތެއްގެ ގޮތުގައި މެނޭޖުކުރުމަށްޓަކައި، އެ މަސައްކަތް ރާވައި ހިންގާނެ ފަންނީ މީހުން އުފެއްދުމަށް ބޭނުންވާ "ނެޝަނަލް ކޮމްޕިޓެންސީ ސްޓޭންޑާޑް ފޯ ވޭސްޓް ޓު ވެލްތު" މިއަދު ވަނީ އިފްތިތާހުކޮށްފަ އެވެ.
މި ރަސްމިއްޔާތުގައި ވާހަކަ ދައްކަވަމުން މިނިސްޓަރު ޝައުނާ ވިދާޅުވީ މިއީ ކުނިން ނަފާ ހޯދުމަށް ކުރިއަށް އެޅޭ ވަރަށް މުހިންމު ފިޔަވަޅެއް ކަމަށެވެ.
"މިއީ ދެމެހެއްޓެނިވި ގޮތުގައި ކުންޏާއި ވަސީލަތްތައް މެނޭޖުކޮށް، އިސްރާފު ކުޑަކޮށް، އުކާލެވޭ ތަކެތިން ނަފާ ހޯދުމަށް ކުރެވެމުންދާ މަސައްކަތުގައި ކުރިއަށް އެޅޭ ވަރަށް މުހިންމު އަދި އެހާމެ ބޭނުންތެރި ފިޔަވަޅެއް އެޅިގެންދާ ދުވަހެއް،" މިނިސްޓަރު ވިދާޅުވި އެވެ.
މި މަސައްކަތާ އެކު ރާއްޖޭގެ ހުރިހާ ރަށެއްގައި އުފެދޭ ކުނި ރައްކާތެރި ގޮތުގައި މެނޭޖުކުރުމަށް ހުނަރުވެރި ދިވެހިން އުފައްދަން ޖެހޭ ކަމަށް ވެސް މިނިސްޓަރުގެ ވާހަަކައިގައި ފާހަގަކުރެއްވި އެވެ.
"މިއަދު އިފްތިތާހުކުރެވޭ މިންގަނޑާއި އެއްގޮތަށް މިދާއިރާއިން މީހުން ތަމްރީނު ކުރުމަށް ބޭނުންވާ ވަސީލަތްތައް ހިމެނޭ ތަމްރީނު ޕެކޭޖެއްވެސް މިވަނީ އެކުލަވާލެވިފައި،"
މި ވަސީލަތްތަކުގެ ބޭނުންކޮށްގެން އުކާލެވޭ ކުނިން ނަފާ ހޯދުމުގެ ކަންތައްތައް ރަށްރަށުގައި ވިލަރެސްކުރާނެ މީހުން ތަމްރީނުކުރުމުގެ މަސައްްކަތް ކުރައްވަން ބޭނުންވާ މީހުންނަށް އެކަން ކުރެވޭނެ މަގު މިއަދު ފަހިވެފައިވާ ކަމަށް މިނިސްޓަރު ވިދާޅުވި އެވެ.
ނެޝަނަލް ކޮމްޕިޓެންސީ ސްޓޭންޑާޑް ފޯ ވޭސްޓް ޓު ވެލްތު އިފްތިތާހު ކުރުމަށް ބޭއްވި ރަސްމިއްޔާތުގެ ތެރެއިން-- ފޮޓޯ: އެންވާރްމެންޓް މިނިސްޓްރީ
މިނިސްޓަރު ވިދާޅުވީ މި މަސައްކަތަކީ ގައުމީ ފެންވަރެއްގައި ހައްލެއް ހޯދުމަށް ބޭނުންވެފައިވާ މުހިންމު މައްސަލައަކަށް ހައްލު ހޯދުމަށްޓަކައި ސަރުކާރުގެ ކަމާބެހޭ މުވައްސަސާތަކެއް ގުޅިގެން ކުރެވިފައިވާ ނަމޫނާ މަސައްކަތެއް ކަމަށެވެ.
"ކުނީގެ މައްސަލަ ހައްލުވާނީ ހަމައެކަނި މެޝިންތަކެއް ގާއިމުކުރެވިގެން ނޫން. އެއީ ގޭބިސީ އާ ހިސާބުން ފެށޭ ކަމެއް. ގޭގައި އުފެދޭ ކުނި ބައިކޮށްގެން ނެރެ ކައުންސިލްތަކުން ނުވަތަ ވެމްކޯއިން އެ ކުނި ގަވާއިދުން ގެބިސީތަކުން ކަލެކްޓުކޮށްގެން،" މިނިސްޓަރު ވިދާޅުވި އެވެ.
އެގޮތުން، ކުނި ކޮށީގައި އެތަކެތި ބަހައްޓައިގެން ކުދިކޮށް، މުގުރައި އަދި ރަށުން ބޭރު ކުރެވެންދެން ބެހެއްޓޭނެ އިންތިޒާމް ހުންނަން ޖެހޭ ކަމަށާއި ބަދިގެ ކުންޏާއި ފަތްކުނި މެނޭޖުކުރާނެ ގޮތްތަކެއް ވެސް ހުންނަން ޖެހޭ ކަމަށް މިނިސްޓަރުގެ ވާހަކައިގައި ފާހަގަކުރެއްވި އެވެ.
އަދި، ކުނީގެ މައްސަލައަކީ ރައްޔިތުންނާއި، ކައުންސިލްތަކާއި، ވެމްކޯ އަދި ސަރުކާރުގެ އިދާރާތައް އެއްކޮށް މަސައްކަތްކޮށްގެން ހައްލުކުރެވެން އޮތް ކަމެއް ކަމަށް ވެސް މިނިސްޓަރު ވިދާޅުވި އެވެ.
