މުމްބާއީ، އިންޑިއާ (އޭޕްރިލް 13) - އިންޑިއަން ޕްރިމިއާ ލީގު (އައިޕީއެލް)ގެ އެންމެ ފަހުގެ ޗެމްޕިއަން ޗެންނާއީ ސުޕަކިންގްސް މި ސީޒަންގެ ފުރަތަމަ މޮޅު ހޯދިއިރު، މިހާތަނަށް އެއްވެސް މެޗަކުން ބަލިނުވެ އޮތް ގުޖުރާތު ޓައިޓަންސް ފުރަތަމަ ފަހަރަށް ބަލިވެއްޖެ އެވެ.
ދުނިޔޭގެ އެންމެ އަގު ބޮޑު ކްރިކެޓު ލީގުގައި މިހާތަނަށް ފަސް މެޗު ކުޅުނުއިރު ޗެމްޕިއަން ޗެންނާއީ ވަނީ އިއްޔެގެ މެޗު ފިޔަވައި އެހެން ހުރިހާ މެޗަކުން ބަލިވެފަ އެވެ. މި ވަގުތު އެ ޓީމަށް ދެ ޕޮއިންޓް ލިބިފައި އޮތްއިރު ޗެންނާއީ އޮތީ 10 ޓީމު ހިމެނޭ ލީގުގެ ތާވަލްގެ ނުވަ ވަނައިގަ އެވެ. އަލަށް އައިޕީއެލްގައި ވާދަކުރާ ގުޖުރާތު ޓައިޓަންސް ވަނީ އެ ޓީމު ކުޅުނު ފުރަތަމަ ތިން މެޗުން ވެސް މޮޅުވެފަ އެވެ. ނަމަވެސް ސަންރައިޒާސް ހައިދަރުއާބާތު އަތުން ބަލިވެ، އެ ޓީމު އެއް ވަނަ އަށް ޖެހިލަން ލިބުނު ފުރުސަތު ވަނީ ގެއްލިފަ އެވެ.
ޗެމްޕިއަން ޗެންނާއީ މޮޅުވީ ރަނގަޅު ފޯމެއްގައި އޮތް ރޯޔަލް ޗެލެންޖާސް ބެންގަލޫރާއި ވާދަކޮށް 23 ލަނޑުންނެވެ. މި މެޗުގެ ޓޮސް ދިމާވުމުން ބެންގަލޫރުން ނިންމީ ޗެންނާއީ އަށް ފުރަތަމަ ބެޓްކުރަން ފުރުސަތު ދޭށެވެ.
ޗެންނާއީ އާއި ބެންގަލޫރު ކުޅުނު މެޗުގެ ތެރެއިން.
ޗެންނާއީ އިން ކުޅެން އަރައި 20 އޯވަރުގެ ތެރޭގައި ހަތަރު ކުޅުންތެރިން ނުބައިވެގެން 216 ލަނޑު ހެދި އެވެ. މިއީ މި ސީޒަންގެ އެންމެ މަތީ ސްކޯ އެވެ. ޗެންނާ އީން އެންމެ ރަނގަޅަށް ކުޅުނީ ނުބައިނުވެ 46 ބޯޅައިން 95 ލަނޑު ހެދި ޝިވަމް ދުބޭ އާއި 50 ބޯޅައިން 88 ލަނޑު ހެދި ރޮބިން އުތައްޕާ އެވެ. މިހާތަނަށް ދަށް ސްކޯތަކެއް ނެރުނު ޗެންނާއީ އަށް މިއީ ރަނގަޅު ފެށުމެއް ކަަމަށް ގިނަ ބަޔަކު ގަބޫލު ކުރެ އެވެ.
ޖަވާބުގައި ބެންގަލޫރު ކުޅެން އަރައި 20 އޯވަރުގައި ނުވަ ކުޅުންތެރިން ނުބައިވެގެން ހެދުނީ 193 ލަނޑެވެ. އެ ޓީމަށް މި މެޗުގައި އެންމެ ބޮޑަށް ދިމާވި މައްސަލަ އަކީ އިނިންގްސްގެ ކުރީކޮޅު މުހިންމު ބެޓްސްމަނުންތައް ނުބައިވުމެވެ. އެންމެ ރަނގަޅަށް ކުޅުނު ދިނޭޝް ކާތިކް އާއި ސުޔާސް ޕްރަބުދެސާއި އަށް ހެދުނީ 34 ލަނޑެވެ.
މި އިނިންގްސްގައި ޗެންނާއީގެ މަހީޝް ތީކްޝަނަ ހަތަރު އޯވަރުގައި 33 ލަނޑަށް 4 ވިކެޓު ނެގިއިރު، ކެޕްޓަން ރަވިންދްރަ ޖަދޭޖާ ވަނީ ހަތަރު އޯވަރުގައި 39 ލަނޑަށް 3 ވިކެޓު ނަގާފަ އެވެ.
މި މުބާރާތުގައި ރަނގަޅު ފޯމެއްގައި އޮތް ގުޖުރާތު އަތުން ހައިދްރާބާދު މޮޅުވީ އަށް ވިކެޓުންނެވެ. ކުޅުނު ފުރަތަމަ ދެ މެޗުން ބަލިވި ހައިދަރުއާބާދުން އެންމެ ފަހުން ކުޅުނު ދެ މެޗު ވެސް ކާމިޔާބުކޮށް މި ވަނީ ފޯމު ރަނގަޅުކޮށްފަ އެވެ.
ފުރަތަމަ އިނިންގްސްގައި ގުޖުރާތުން ކުޅެން އަރައި 20 އޯވަރުތެރޭގައި ހަތް ކުޅުންތެރިން ނުބައިވެގެން ހެދުނީ 162 ލަނޑެވެ. އެ ޓީމުން އެންމެ ރަނގަޅަށް ކުޅުނީ ނުބައިނުވެ 42 ބޯޅައިން 50 ލަނޑު ހެދި ހަރްޑިކް ޕާންޑްޔާ އެވެ.
ޖަވާބުގައި ހައިދްރަބާދުން ކުޅެން އަރައި ބާކީ ފަސް ބޯޅަ އުކަން އޮއްވައި މެޗު ކާމިޔާބުކުރި އެވެ. މެޗުގެ މޮޅު ކުޅުންތެރިޔާގެ މަގާމް ހޯދި ހައިދަރުއާބާދުގެ ކެޕްޓަން ކޭން ވިލިއަމްސަން، ވަނީ 46 ބޯޅައިން 57 ލަނޑު ހަދައިފަ އެވެ. އަދި އެ ޓީމުގެ އަބީޝެކް ޝަރުމާ 32 ބޯޅައިން 42 ލަނޑު ހެދި އެވެ.
މި މުބާރާތުގައި މިރޭ ކުޅޭ މެޗުގައި ވާދަކުރާނީ މުމްބާއީ އިންޑިއަންސް އާއި ޕަންޖާބު ކިންގްސް އެވެ.
