ރަޝިއާ އާއި ޔޫކްރެއިނާ ދެމެދު ކުރަމުންދާ ސުލްހައިގެ މަޝްވަރާތަކުން އެއްވެސް ކުރިއެރުމެއް ނުލިބުނު ކަމަށް ރަޝިއާގެ ރައީސް ލެޑިމިއަ ޕުޓިން ވިދާޅުވެއްޖެ އެވެ.
ބެލަރޫސްގެ ރައީސް އެލެގްޒެންޑާ ލުކަޝެންކޯއާ ބައްދަލުކުރައްވައި ޕުޓިން ވިދާޅުވީ ސުލްހައިގެ މަޝްވަރާއިން ކުރިއެރުމެއް ނުލިބޭ ކަމަށާއި "އަސްކަރީ އޮޕަރޭޝަން" ކުރިއަށް ދާނެ ކަމަށޭވެ.
ހަނގުރާމައިގައި ޖަރީމާ ހިންގާ ކަމަށް ބުނެ ޔޫކްރެއިނުން "ފޭކު ތުހުމަތު" ކުރާ ކަމަށާއި މުހިއްމު ކަންކަމުގައި "ދެ ފަހަރު އެއް ވިސްނުމެއް ނުގެންގުޅޭ" ކަމަށް ޕުޓިން ވިދާޅުވި އެވެ.
އެކަމަކު ޔޫކްރެއިން ރައީސްގެ އެޑްވައިޒަރު މިކައިލޯ ޕޮޑޯލިޔަކް ރޮއިޓާޒްއަށް ވިދާޅުވީ މަޝްވަރާތައް "ވަރަށް އުނދަގޫ" ނަމަވެސް ކުރިއަށް ދާނެ ކަމަށެވެ.
ޕޮޑޯލިޔަކް ވިދާޅުވީ މުސްތަގްބަލުގައި އޮންނާނެ ސުލްހައިގެ މަޝްވަރާތަކަށް ޕްރެޝަރު ކުރުމުގެ ގޮތުން، ބައްދަލުވުމެއް ބޭއްވުމުގެ ކުރިން ރަޝިއާއިން މީޑިއާގައި އެކި ހަބަރުތައް ފަތުރާ ކަމަށެވެ.
އެންމެ ފަހުން ދެ ގައުމުގެ މެދުގައި ސީދާ މަޝްވަރާތައް ބޭއްވީ މާޗް މަހުގެ ފަހުކޮޅު ތުރުކީގެ ވެރިރަށް އިސްތަންބޫލްގަ އެވެ.
އެ ފަހަރު ރަޝިއާއިން އެއްބަސްވީ ޔޫކްރެއިންގެ ވެރިރަށް ކިޔެވް އަދި އުތުރުގެ ޗެރްނިހިވް ސިޓީ ވަށައިގެންވާ ސަރަހައްދުގައި ހަނގުރާމަ މަޑުޖައްސާލުމަށެވެ.
