ކޮވިޑާ ގުޅިގެން ލޮކްޑައުންކޮށްފައި ވަނިކޮށް ބޭއްވި އުފަން ދުވަހުގެ ޕާޓީގައި ބައިވެރިވެވަޑައިގެންނެވުމުން އިނގިރޭސި ބޮޑު ވަޒީރު ބޮރިސް ޖޯންސަން ޖޫރިމަނާ ކުރަން ފުލުހުން ނިންމައިފި އެވެ.
އެ ޕާޓީއަކީ ޖޫން 19، 2020 ގައި ބޮޑު ވަޒީރުގެ އޮފީހުގެ މުވައްޒަފުން ބޭއްވި އެއްވުމެކެވެ. ޕާޓީ ބޭއްވީ ކޮވިޑާ ގުޅިގެން އަޅާފައި ހުރި ފިޔަވަޅުތަކާ ހިލާފަށެވެ.
ބޮޑު ވަޒީރުގެ އިތުރުން ޗާންސެލަރު ރިޝީ ސުނަކް ވެސް ޖޫރިމަނާ ކުރާނެ ކަމަށް ފުލުހުން ބުންޏެވެ. ޖޯންސަންގެ އަނބިކަނބަލުން ކެރީ ވެސް ވަނީ ޖޫރިމަނާ ދައްކަވާފަ އެވެ.
ބޮޑު ވަޒީރުގެ އޮފީހުގެ މުވައްޒަފުން ފިޔަވަޅުތަކާ ހިލާފަށް ޕާޓީތަކެއް ބޭއްވި މައްސަލަ ނޫސްތަކުން ފެންމަތި ކުރުމުން، ފުލުހުން ވަނީ ޖިނާއީ ތަހުގީގެއް ފަށާފަ އެވެ.
ޖޯންސަންއަކީ އިނގިރޭސިވިލާތުގެ މުޅި ތާރީހުގައި ވެސް ގާނޫނާ ހިލާފުވެގެން ޖޫރިމަނާއެއް ކުރިމަތިވި އެންމެ ފުރަތަމަ ބޮޑު ވަޒީރެވެ.
އިދިކޮޅު ލޭބާ ޕާޓީގެ ލީޑަރު ސާ ކެޔާ ސްޓާމާ އަދި ސްކޮޓްލެންޑްގެ ފަސްޓް މިނިސްޓަރު، އެސްއެންޕީގެ ލީޑަރު ނިކޮލާ ސްޓާޖަން އާއި ވޭލްސްގެ ފަސްޓް މިނިސްޓަރު، ލޭބާ ޕާޓީގެ މާކް ޑްރޭކްފޯޑް ވަނީ ޖޯންސަން އާއި ސުނަކްގެ އިސްތިއުފާއަށް ގޮވާލައްވާފަ އެވެ.
