ހއ. އަލިދޫ ރިސޯޓަށް ވިއްސާރައިގައި ލިބުނު ގެއްލުންތަކުގެ ބަދަލުގައި އިންޝުއަރެންސްއަށްވާ 22 މިލިއަން ޑޮލަރު ޔޮޓް ޓޫއާޒްއަށް ދިނުމަށް 2019 ވަނަ އަހަރު ސިވިލް ކޯޓުން އެލައިޑް އިންޝުއަރެންސް ކޮމްޕެނީގެ މައްޗަށް ކުރި ހުކުމް ހައި ކޯޓުން ބާތިލުކޮށްފި އެވެ.
އެ މައްސަލައިގައި ސިވިލް ކޯޓުން ވަނީ 2014 ވަނަ އަހަރުގެ އޯގަސްޓު އަދި ސެޕްޓެމްބަރު މަސް ތެރޭ އަލިދޫ ރިސޯޓަށް މޫސުން ގޯސްވެ، ގެއްލުންތަކެއްވުމުގެ ސަބަބުން އެ ރިސޯޓު ހިންގާ ޔޮޓް ޓުއާޒްއިން ވަނީ އެ ރިސޯޓަށް ލިބުނު ގެއްލުމުގެ އިންޝުއަރެންސްގެ ގޮތުގައި އެލައިޑުގެ އަތުން 22 މިލިއަން ޑޮލަރު ހޯދަން ހުށަހެޅި މައްސަލަ ޔޮޓު ޓުއާޒްއާ އެއްކޮޅަށް ނިންމައިފަ އެވެ.
އެ މައްސަލައިގެ އިސްތިއުނާފުގެ ގޮތުގައި އެލައިޑުން ހައި ކޯޓަށް ހުށަހެޅި މައްސަލައިގައި އެ ކޯޓުން އިއްޔެ ނިންމާފައިވަނީ ދަށު ކޯޓުގެ ހުކުމް ބާތިލުކުރުމަށެވެ.
އެ މައްސަލައިގައި ހައި ކޯޓުގެ ހުކުމުގައި ވަނީ ދަށު ކޯޓުން އެލައިޑާ ޔޮޓު ޓުއާޒްއާ ދެމެދު އޮތް އިންޝުއަރެންސް ޕޮލިސީއަށް ރަނގަޅަށް ބަލާފައިނުވާ ކަމަށް ފާހަގަކޮށްފަ އެވެ.
އެގޮތުން ވިއްސާރައިގައި ގެއްލުންވި އަލިދޫ ރިސޯޓުގައި ހުރި 45 ވޯޓާ ވިލާއާއި ދެ ޖެޓީ ތަޅާލައި އަލުން ހެދުމަށް ހިނގާ ހަރަދުގެ އަންދާސީ ހިސާބުތަކަކީ އެ ދެ ކުންފުނި ދެމެދުގައި އޮތް "ފަޔާ އިންޝުއަރެންސް ޕޮލިސީ" ގެ ދަށުން ކަވަރު ނުކުރާ އަންދާސީ ހިސާބެއްކަމަށް ހއިކޯޓުން ފާހަގަކުރި އެވެ.
އަދި ހަމަ އެއާއެކު އިންޝުއަރެންސް ޕޮލިސީއެއް އޮތުމަކީ އެ ޕޮލިސީގެ ދަށުން އެތަނަކަށް ލިބޭ އެންމެހާ ގެއްލުމެއްގެ ބަދަލުގައި ފައިސާ ދޭންޖެހޭ ސަބަބެއް ނޫން ކަމަށް ވެސް ހައިކޯޓުން ހުކުމްގައި ފާހަގަކުރެ އެވެ.
އޭގެ އިތުރުން ވެސް އެ މައްސަލައިގައި ޔޮޓް ޓުއާޒްއިން ހުށަހެޅި ގެއްލުމުގެ ތަފްސީލުތަކާއި ގެއްލުން ލިބުނު ދުވަސްތަކާ ދިމާނުވާ ކަމަށް ވެސް ކޯޓުން ފާހަގަކޮށްފައިވެ އެވެ.
އަދި އޭގެ އިތުރުން ވެސް ޔޮޓް ޓުއާޒްއިން ސާބިތުކޮށްދޭންޖެހެނީ އެ ގެއްލުމަކީ އިންޝުއަރެންސް ޕޮލިސީން ކަވަރުކުރަފަދަ ހާލަތެއްގައި މެދުވެރިވިކަމެއް ކަމަށް ހުކުމްގައި ފާހަގަކުރެ އެވެ. އެގޮތުން އަލިދޫ ރިސޯޓަސް މޫސުން ގޯސްވެ ފެންބޮޑުވީ އިންޝުއަރެންސް ޕޮލިސީގައި ބަޔާންކުރާ ސަބަބަކާހުރެ ކުރިމަތިވިކަމެއްކަމަށް ޔޮޓް ޓުއާޒްއިން ސާބިތުކޮށްދޭން ޖެހޭ ކަމަށެވެ. ނަމަވެސް އެއީ އެ އެއްބަސްވުމުގެ ދަށުން ކަވަރުކުރާ ގެއްލުމެއް ނޫންކަމަށް ހައި ކޯޓުން ފާހަގަކުރެ އެވެ.
އެއްބަސްވުމުގަައި ކަވަރުކުރަނީ ބިންހެލުން، އަލިފާން ފަރުބައެއް ގޮވުން، ތޫފާން (ސައިކްލޯން/ޓައިފޫން)، ވައިގަދަވުން ނުވަތަ ވިންޑްސްޓޯމްކަހަލަ ކަމަކާއި ކުރިމަތިވެގެން ލިބޭ ގެއްލުންކަމަށް ހައި ކޯޓުން ފާހަގަކުރެ އެވެ. އަދި އެއީ "ނޭމްޑް ޕެރިލް ޕޮލިސީ" އެއް ކަމަށާއި އެއީ "އޯލް ރިސްކް ޕޮލިސީއެއް ނޫންކަމަށް ވެސް ހައި ކޯޓުން ފާހަގަކުރެ އެވެ.
އެ މައްސަލަ ބެއްލެވީ ހައި ކޯޓުގެ ތިން ފަނޑިޔާރުންގެ ބެންޗަކުންނެވެ. އެ ތިން ފަނޑިޔާރުންނަކީ ފަނޑިޔާރު ހުސެއިން ޝަހީދު، ފަނޑިޔާރު މުހައްމަދު ނިޔާޒު، ފަނޑިޔާރު ޝުއެއިބު ހުސެއިން ޒަކަރިއްޔާ އެވެ.
