ރަޝިއާގެ ހަމަލާތަކުގެ ސަބަބުން ޔޫކްރެއިންގެ ޑްނީޕްރޯ ސިޓީގެ އެއާޕޯޓު ސުންނާފަތިވެފައިވާ ކަމަށް އެ ސިޓީގެ އޮފިޝަލަކު ބުނެފި އެވެ.
"ޑްނީޕްރޯ އެއާޕޯޓަށް އަނެއްކާވެސް ހަމަލާއެއް ދީފި. މިހާރު އެ އެއާޕޯޓުގައި އެކައްޗެއް ވެސް ނެތް. އެއާޕޯޓާއި އެ ތަނުގައި ހުރި އިންފްރާސްޓްރަކްޗާ ވެސް އެއްކޮށް ސުންނާފަތިވެއްޖެ،" އެ ސިޓީގެ އޮފިޝަލް ވެލެންޓިން ރެޒްނިޗެންކޯ ޓެލެގްރާމްގައި ވިދާޅުވި އެވެ.
"ރޮކެޓުތައް ދަނީ ފުލުފުލުގައި އެއާޕޯޓަށް ވެއްޓެމުން."
އޭނާ ވިދާޅުވީ ޑްނީޕްރޯ އެއާޕޯޓަށް ދެމުންދާ ހަމަލާތަކުގައި މަރުވި މީހުންނާއި އަނިޔާވި މީހުންނާ ބެހޭ މައުލޫމާތު އަދި ނޭނގޭ ކަމަށެވެ.
އެއާޕޯޓު ކައިރިން ކަޅު ދުން އަރާ މަންޒަރާއި އެއާޕޯޓު ހުންނަ ސަރަހައްދަށް އަލިފާން ނިއްވާ ލޮރީތައް ދަތުރު ކުރި މަންޒަރު ނޫސްވެރިންނަށް ފެނިފައިވެ އެވެ.
އާދީއްތަ ދުވަހުގެ ރޭ ޑްނީޕްރޯ އެއާޕޯޓުން ފްލައިޓެއް ފުރި އެވެ. އެހެން ކަމުން ރިޕޯޓުތައް ބުނަނީ އެއާޕޯޓުގެ ރަންވޭ އަދިވެސް އޮޕަރޭޓް ކުރަމުންދާ ކަމަށެވެ.
ރެޒްނިޗެންކޯ ވިދާޅުވީ ޑްނީޕާ ކޯރުގެ އައްސޭރިފަށުގައި އޮންނަ ޑްނީޕްރޯ ސިޓީއަށް ދެމުންދާ ހަމަލާތައް ރަޝިއާއިން ވަރުގަދަ ކުރީ އާދީއްތަ ދުވަހު ކަމަށެވެ.
ގާތްގަނޑަކަށް އެއް މިލިއަން މީހުންގެ އާބާދީއެއް އޮންނަ ސިނާއީ މަސައްކަތަށް ހާއްސަ އެ ސިޓީއަށް މިހާތަނަށް ހަނގުރާމައިގައި މާ ބޮޑެތި ގެއްލުންތަކެއް ލިބިފައެއް ނުވެ އެވެ.
