އެމްޑަބްލިއުއެސްސީން ބަންދުކޮށްގެން ވިއްކާ އެ ކުންފުނީގެ ތާޒާ ބްރޭންޑުގެ މިނަރަލް ފެންފުޅި ސަޕްލައި ކުރާ މިންވަރު ލިމިޓްކޮށްފި ކަމަށް ބުނާ ވާހަކަތައް އެކުންފުނިން ދޮގުކޮށްފި އެވެ.
ކުރިޔަށް އޮތް ދުވަސްތަކުގައި ރާއްޖެއަށް ހޫނުގެ އަސަރު ކުރާ މިންވަރު އިތުރުވެދާނެ ކަމަށް ލަފާކޮށް އެމްޑަބްލިއުއެސްސީން ރަށްރަށަށް ފެން ސަޕްލައި ކުރާ މިންވަރު ލިމިޓުކޮށްފައިވާ ކަމަށް ބައެއް މީޑިއާތަކުން ވަނީ މިއަދު ރިޕޯޓުކޮށްފަ އެވެ.
ނަމަވެސް، އެމްޑަބްލިއުއެސްސީގެ މެނޭޖިން ޑިރެކްޓަރު ހަސަން ޝާހު "އަދަދު" އަށް ވިދާޅުވީ އެ ކުންފުނީގެ ފެން ސަޕްލައި ކުރާ މިންވަރު އެއްވެސް ވަރަކަށް ލިމިޓުކޮށްފައި ނުވާ ކަމަށެވެ.
"އަޅުގަނޑުމެންގެ ފެނުގެ ޑިސްޓްރިބިއުޝަންގެ މަސައްކަތް ކުރަނީ އައިލެންޑް ބެވަރެޖަސް މޯލްޑިވްސްއިން. އެ ކުންފުނިން ވެސް ލިމިޓްކޮށްފައެއް ނުވޭ ފެން ސަޕްލައިކުރުން،" ޝާހު ވިދާޅުވި އެވެ.
އާންމުކޮށް ރާއްޖޭގައި ބަންދުކޮށްފައިވާ މިނަރަލް ބޯފެން ފުޅީގެ ގޮތުގައި ބޭނުންކުރަނީ ތާޒާ، ބޮނަކުއާ އަދި ލައިފް ފެނެވެ.
އެމްޑަބްލިއުއެސްސީން އުފައްދާ ތާޒާ ފެން ލިމިޓުކުރި ކަމަށް އަޑުފެތުރުނުއިރު، ލައިފް ފެން އުފައްދާ ހެޕީމާކެޓް ކުންފުނީގެ މެޝިންތަކަށް މައްސަލައެއް ދިމާވެ އެ ކުންފުނީގެ ސަޕްލައިއަށް ވެސް އަސަރުކޮށްފައިވާ ކަމަށް ވަނީ އަޑުފެތުރިފަ އެވެ.
އެ ކުންފުނީގެ ފެން އުފައްދާ އިންޓަނޭޝަނަލް ބެވަރޭޖަސް ކުންފުނި (އައިބީސީ)ގެ މެޝިންތަކަކަށް މައްސަލައެއް ދިމާވެގެން ފެނުގެ ސަޕްލައިއަށް އަސަރުކޮށްފައިވާކަމަށް ބުނާ ވާހަކަ އައިބީސީއިން ވެސް ވަނީ މިއަދު ދޮގުކޮށްފަ އެވެ. އެކުންފުނީގެ އެސިސްޓެންޓް ޖެނެރަލް މެނޭޖަރު އަހުމަދު ފަޒްލީން މި ނޫހަށް ވިދާޅުވީ، އެއީ ހަގީގަތެއް ނޫން ކަމަށެވެ.
"އަޅުގަނޑުމެން މިދަނީ ހަމަ ފުލް ކެޕޭސިޓީގަ އަބަދުވެސް ސަޕްލައި ކުރަމުން. އެއްވެސް ދަތިކަމެއް ނޫޅޭ ފެނުގެ ސަޕްލައިގެ. ދަތިކަމެއް އުޅެނީ ޑެލިވަރި ކުރާ ވަގުތުތަކާއި ގުޅިގެން. ފެނުގެ ސަޕްލައިގެ ދައްޗެއް ނޫޅޭ މިކޮޅުގައެއް،" އޭނާ ވިދާޅުވި އެވެ.
ފަޒްލީން ވިދާޅުވީ ފެނުގެ ޑިމާންޑް މިދުވަސްވަރު ހޫނުގަދަވުމުގެ ސަބަބުން އިތުރުވެފައިވާ ކަމަށެވެ. ނަމަވެސް، އެއީ ގިނަ ބަޔަކު ފެން ރައްކާކުރުމާއި، ރަށްރަށުގައި ވެސް ވާރޭ ނުވެހުމުގެ ސަބަބުން ފެނުގެ ސަޕްލައިއަށް އަސަރުކޮށްފައިވާތީ އިތުރުވެފައިވާ ޑިމާންޑެއް ކަމަށެވެ.
ރާއްޖޭގެ ބައެއް ރަށްރަށުގައި ފެނުގެ ދަތިކަން ތަހައްމަލުކުރަމުންދާއިރު، މި ހިނގާ އޭޕްރިލް މަހަކީ ރާއްޖެއަށް ކޮންމެ އަހަރަކު ވެސް އެންމެ ހޫނުގަދަވާ މަސްކަން ފާހަގަކޮށްލެވެ އެވެ.
ނަމަވެސް، ރާއްޖޭގައި އެންމެ ގިނަ ބަޔަކު ބޯން ބޭނުންކުރާ މިނަރަލް ފެން އުފައްދާ ދެ ކުންފުނީގެ ވެސް ފެނުގެ ސަޕްލައިއަށް އެއްވެސް އަސަރެއް ކޮށްފައިނުވާކަމަށް އެ ދެ ކުންފުނިން ވެސް ވަނީ ބުނެފަ އެވެ.
