އިނގިރޭސި ބޮޑު ވަޒީރު ބޮރިސް ޖޯންސަން ޔޫކްރެއިންގެ ވެރިރަށް ކިޔެވްއަށް ވަޑައިގެން އެ ގައުމުގެ ރައީސް ވޮލޮޑިމިރް ޒެލެންސްކީއާ ބައްދަލުކުރައްވައިފި އެވެ.
ބޮޑު ވަޒީރުގެ އޮފީހުން ބުނީ މިއީ ޔޫކްރެއިންގެ ރައްޔިތުންނާ އެކު ތިބިކަން އަންގައި ދިނުމަށް ކިޔެވްއަށް ކުރެއްވި ޒިޔާރަތެއް ކަމަށެވެ.
ބައްދަލުވުމަށް ފަހު ބޮޑު ވަޒީރުގެ އޮފީހުން ބުނީ ޔޫކްރެއިނަށް އެހީވުމަށް އިތުރު 120 އަސްކަރީ އުޅަނދާއި އެންޓި-ޝިޕް މިސައިލް ސިސްޓަމްތައް ފޮނުވާނެ ކަމަށެވެ.
ޒެލެންސްކީގެ ޓީމުގެ އިސްވެރިން ވަނީ ރަޝިއާއާ ދެކޮޅަށް ކުރާ ހަނގުރާމައިގައި އިނގިރޭސިވިލާތުން ޔޫކްރެއިނަށް ފޯރުކޮށްދޭ އެއްބާރުލުމަށް ޝުކުރު އަދާކޮށްފަ އެވެ.
ޖޯންސަން ކިޔެވްއަށް ވަޑައިގެންނެވުމުގެ ކުރިން އެކަން އިއުލާނެއް ނުކުރެ އެވެ. އެކަން ހާމަވީ ލަންޑަންގައި ހުންނަ ޔޫކްރެއިންގެ އެބްސީން ޖޯންސަން އާއި ޒެލެންސްކީ އެކުގައި ތިއްބެވި ފޮޓޯ އާއްމު ކުރުމުންނެވެ.
ބައްދަލުވުމަށް ފަހު ނެރުނު ބަޔާނެއްގައި ޖޯންސަން ވިދާޅުވީ ގިނަ ބަޔަކު ލަފާކުރި ގޮތާ ހިލާފަށް ކިޔެވްގެ ދޮރާށިތައް ކައިރިން ރަޝިއާ ސިފައިން ފައްސާލުމަކީ ޔޫކްރެއިނަށް ލިބުނު މޮޅެއް ކަމަށެވެ.
އޭގެ ފަހުން ޒެލެންސްކީއާ އެކު ބޭއްވި ޕްރެސް ކޮންފެރެންސެއްގައި ޖޯންސަން ވިދާޅުވީ ޔޫކްރެއިންގެ ރައްޔިތުން ދައްކައިދެނީ "ސިންގާއެއްގެ ހިތްވަރު" ކަމަށާއި ޒެލެންސްކީ ވަނީ އެ ސިންގާއަށް "ވަރުގަދަ އަޑެއް" ދެއްވާފައިވާ ކަމަށެވެ.
އިނގިރޭސިވިލާތާއި ހުޅަނގުގެ ގައުމުތަކުން ރަޝިއާއަށް ދަތިކުރުން އިތުރު ކުރާނެ ކަމަށާއި މިއީ "ބޭނުމެއް ނެތް ހަނގުރާމައެއް" ކަމަށް ޖޯންސަން ވިދާޅުވި އެވެ.
މިދިޔަ ހުކުރު ދުވަހު ޔޫރަޕިއަން ޔޫނިއަން (އީޔޫ) ގެ ބައެއް ވެރިން ވެސް މަޝްވަރާއަށް ޔޫކްރެއިނަށް ވަޑައިގެންނެވި އެވެ. އަދި އޮސްޓްރިއާ ޗާންސެލަރު ހޮނިހިރު ދުވަހު ކިޔެވްއަށް ވަޑައިގެންނެވި އެވެ.
ނަމަވެސް ޖޯންސަންއަކީ ހަނގުރާމަ ފެށި ފަހުން މަޝްވަރާއަށް ކިޔެވްއަށް ވަޑައިގެންނެވި ޖީ7 ގައުމެއްގެ ފުރަތަމަ ލީޑަރެވެ.
