ސްރީލަންކާއަށް ކުރިމަތިވެފައިވާ އިގްތިސާދީ އަދި މާލީ ކާރިސާގެ ސަބބަުން ގައުމު ދޫކޮށް، ގަވާއިދާ ހިލާފަށް އިންޑިއާއަށް އެތެރެވާން މަސައްކަތް ކުރާ މީހުންގެ އަދަދު އިތުރުވެއްޖެ އެވެ.
އެކަން ފާހަގަވުމާ ގުޅިގެން އިންޑިއާގެ އިންޓެލިޖެންސް ބިޔުރޯއިން ވަނީ ކޯސްޓް ގާޑާއި މެރިން ފުލުހުން އަދި ސްޓޭޓްތަކުގެ ފުލުހުން ވެސް ސަމާލުވެ ތިބުމަށް އަންގާފަ އެވެ.
ލަންކާގެ ގިނަ މީހުން އެތެރެ ވާން މަސައްކަތް ކުރަނީ އަންދްރަ ޕްރަދޭޝް ސްޓޭޓަށް ކަމަށް ރިޕޯޓުތައް ބުނެ އެވެ. އެ ސްޓޭޓުގެ އައްސޭރިފަށުގައި 974 ކިލޯމީޓަރު ހުންނައިރު، 555 އަވަށް އައްސޭރިފަށާ ކައިރީގައި އޮވެ އެވެ. އެ އަވަށްތަކުގައި ސަލާމަތީ ކަންކަން ވަރުގަދަކޮށްފައިވާ ކަމަށް ފުލުހުން ބުނެ އެވެ.
ކްރިޝްނާ ޑިސްޓްރިކްޓުގެ ސުޕްރިންޓެންޑެންޓް އޮފް ޕޮލިސް ސިދާރްތް ކައުޝަލް ދަ ހިންދޫ ނޫހަށް ވިދާޅުވީ މަހަށް ނުކުންނަ މަސްވެރިން ވެސް ސަމާލުވެ ތިބުމަށް އަންގާފައިވާ ކަމަށެވެ.
އެގޮތުން ގޮތް ނޭނގޭ ބޯޓެއް ނުވަތަ ބަޔެއްގެ ހަރަކާތް ކަނޑުމަތިން ފާހަގަވެއްޖެ ނަމަ ވަގުތުން ފުލުހުން ރިޕޯޓުކުރަން މަސްވެރިންނަށް ވަނީ އަންގާފަ އެވެ.
ލަންކާ މީހުން ގަވާއިދާ ހިލާފަށް އިންޑިއާއަށް އެތެރެވާ މައްސަލަ ބޮޑުވާން ފަށާފައިވާ އިރު، ހުކުރު ދުވަހު ވެސް ލަންކާގެ ތަމަޅަ އާއިލާއަކުން ވަނީ ދެ ކުޑަކުދިންނާ އެކު ބޯޓެއްގައި ޓަމިލް ނާޑޫއަށް ގޮސްފަ އެވެ.
އެ އާއިލާގެ މެމްބަރުން ހައްޔަރު ކުރުމަށް ފަހު ގެންދިޔައީ ރެފިއުޖީ ކޭމްޕަކަށެވެ. އޭގެ ކުރިން މާޗް 22 ވަނަ ދުވަހު ލަންކާގެ 16 ތަމަޅައިން އިންޑިއާގެ ރެފިއުޖީ ކޭމްޕަކަށް ގެންދިޔަ އެވެ.
