އިރުމަތީ ޔޫކްރެއިންގެ ކްރަމަޓޯސްކް ސިޓީގެ ރޭލު ސްޓޭޝަނަށް ރަޝިއާއިން ދިން ރޮކެޓް ހަމަލާތަކެއްގައި ކުޑަކުދިން ހިމެނޭ ގޮތަށް ގިނަ އަދަދެއްގެ ބަޔަކު މަރުވެއްޖެ އެވެ.
ޔޫކްރެއިންގެ އޮފިޝަލުން ބުނީ އިރުމަތީ ޔޫކްރެއިން ދޫކޮށް ރައްކާތެރި ހިސާބުތަކަށް ބަދަލުވާން ބޭނުންވާ އެތައް ހާސް ބަޔަކު ހުކުރު ދުވަހު ހެނދުނު ރޭލު ސްޓޭޝަނުގައި ތިބި ކަމަށެވެ.
ގިނަ އަދަދެއްގެ އާއްމުން ރޭލު ސްޓޭޝަނުގައި ތިބި ވަގުތެއްގައި ދިން ހަމަލާގެ ތުހުމަތު އެއް ގައުމުން އަނެއް ގައުމުގެ ބޮލުގައި ދަނީ އަޅުވަމުންނެވެ.
ކްރަމަޓޯސްކްގެ މޭޔަރު އޮލެކްސެންޑަރް ހޮންޗަރެންކް ވިދާޅުވީ ރޭލު ސްޓޭޝަނަށް ހަމަލާތައް އަމާޒުވީ ޔޫކްރެއިން ގަޑިން ހެނދުނު 10:30 ގައި ކަމަށެވެ.
ޔޫކްރެއިންގެ ރޭލު ކުންފުނި، ޔޫކްރްޒެލިޒްނިޓްސިއާގެ ވެރިޔާ އޮލެކްސެންޑަރު ކަމިޝިން ވިދާޅުވީ ސްޓޭޝަނަށް ދެ ރޮކެޓް ހަމަލާ އަމާޒުވި ކަމަށެވެ.
ނަމަވެސް ބައެއް ރިޕޯޓުތައް ބުނާ ގޮތުން 5-10 ގޮވުމުގެ އަޑު އެ ސަރަހައްދުން އިވުނެވެ. ޔޫކްރެއިންގެ ވައިގެ ދިފާއީ ނިޒާމުން ބައެއް ހަމަލާތައް ހުއްޓުވި ކަމަށް ރިޕޯޓުތައް ބުނެ އެވެ.
ޔޫކްރެއިންގެ ޕްރޮސެކިއުޓާ ޖެނެރަލްގެ އޮފީހުން ބުނީ އެ ވަގުތު ރޭލު ސްޓޭޝަނުގައި 4،000 މީހުން ތިބި ކަމަށެވެ. އޭގެ ތެރޭގައި ގިނައިން ހިމެނެނީ އަންހެނުންނާއި ކުޑަކުދިންނެވެ.
ރޮކެޓެއްގެ އެއް ބައި ސްޓޭޝަން ކައިރީގައި އޮތް އިރު، އޭގެ އެއް ފަޅީގައި ހުދު ކުލައިން "ކުޑަކުދިންނަށްޓަކައި" ރަޝިއާ ބަހުން ލިޔެފައިވާ މަންޒަރު ފޮޓޯތަކުން ފެނެ އެވެ.
ރޭލު ސްޓޭޝަނަށް ހަމަލާ ދޭން ބޭނުން ކުރި ރޮކެޓުގެ އެއް ބައި.
ހަމަލާއަށް އާއްމުވި ވީޑިއޯތަކުން ސްޓޭޝަން ތެރޭގައި ގިނަ ބަޔެއްގެ ހަށިގަނޑު ހުރި މަންޒަރު ފެނުނެވެ. ޑޮނެސްކް ސަރަހައްދުގެ ވެރިޔާ ޕަވްލޯ ކިިރިލެންކޯ ވިދާޅުވީ 50 އަށް ވުރެ ގިނަ މީހުން މަރުވެފައިވާ ކަމަށެވެ. އޭގެ ތެރޭގައި ފަސް ކުދިން ހިމެނެ އެވެ.
އިތުރު 100 މީހުންނަށް އަނިޔާވެފައިވާ އިރު، ބައެއް މީހުންގެ ހާލު ސީރިއަސް އެވެ. މަރުވި މީހުންގެ އަދަދު އަދިވެސް އިތުރުވާނެ ކަމަށް ބެލެވެ އެވެ.
