ޔޫކްރެއިން ހަނގުރާމައިގައި ގަތުލުއާއްމު ހިންގާފައިވާ ކަމަށް ތުހުމަތު ކުރަމުން ދަނިކޮށް، އދ. ގެ އިންސާނީ ހައްގުތަކާ ބެހޭ ކައުންސިލުން ރަޝިއާ ސަސްޕެންޑް ކުރުމަށް އދ. ގެ އާއްމު މަޖިލީހުން ފާސްކޮށްފި އެވެ.
ރަޝިއާ ސަސްޕެންޑް ކުރަން ތާއީދުކޮށް 93 ގައުމުން ވޯޓު ދިން އިރު، އެކަމާ ދެކޮޅަށް ވޯޓު ދިނީ 24 ގައުމެވެ. އަދި ވަކި ފަރާތަކަށް ނުޖެހި 58 ގައުމު އޮތެވެ. އޭގެ ތެރޭގައި ދިވެހިރާއްޖެ ހިމެނެ އެވެ.
މި ސަރަހައްދުގެ ގައުމުތަކުގެ ތެރެއިން އަފްގާނިސްތާނު ވޯޓުގައި ބައިވެރި ނުވާއިރު، އެހެން ހުރިހާ ގައުމަކުން ނިންމީ ވަކި އަތަކަށް ވޯޓު ނުދިނުމަށެވެ. އެއީ އިންޑިއާ، ސްރީލަންކާ، ޕާކިސްތާން، ނޭޕާލް އަދި ބޫޓާނެވެ. ޗައިނާއިން ވޯޓު ދިނީ ގަރާރާ ދެކޮޅަށެވެ.
އާއްމު މަޖިލީހުން ފާސްކުރި ގަރާރުގެ ޑްރާފްޓުގައި ބުނެފައި ވަނީ "އިންސާނީ ހައްގުތަކާ ބެހޭ ކައުންސިލްގެ މެމްބަރު ގައުމަކުން އިންސާނީ ހައްގުތަކާ ހިލާފު އަމަލުތައް ހިންގާ ނަމަ އެ ގައުމެއްގެ މެމްބަރުކަން ސަސްޕެންޑް ކުރެވިދާނެ" ކަމަށެވެ.
ރަޝިއާގެ ސިފައިން ޔޫކްރެއިނަށް އަރައި ކުރަމުންދާ ހަނގުރާމައިގައި "ބައިނަލްއަގްވާމީ އިންސާނީ ގާނޫނާ ހިލާފު އަމަލުތައް ހިންގުމާއި އިންސާނީ ހައްގުތަކާ ހިލާފު އަމަލު ހިންގާ ކަމަށް" ރިޕޯޓު ކުރެވޭތީ ކައުންސިލުން "ވަރަށް ކަންބޮޑުވާ" ކަމަށް ގަރާރުގައިވެ އެވެ.
ގަރާރު ފާސްކުރަން އާއްމު މަޖިލީހުގެ 2/3 ވޯޓު ބޭނުންވި އެވެ. އެގޮތަށް ފާސްވުމާ އެކި އިންސާނީ ހައްގުތަކާ ބެހޭ ކައުންސިލުން ރަޝިއާ ސަސްޕެންޑުކޮށް، ތުހުމަތު ކުރެވޭ މައްސަލަތަކުގެ ތަހުގީގެއް ހިންގަން ފެންނަ ނަމަ އެ މަސައްކަތް ކުރެވޭނެ އެވެ.
