ފައިދިގު މަކުނުގެ 50،000 އަށް ވުރެ ގިނަ ބާވަތް ދެނެގަނެވިފައިވާ ކަމަށާއި ދެނެގަނެވިފައި ނުވާ އިތުރު 50،000 ބާވަތް ދިރިއުޅެމުން ދިޔުމަކީ އެކަށީގެންވާ ކަމެއް ކަމަށް ވޯލްޑް ސްޕައިޑާ ކެޓެލޯގުން ބުނެފި އެވެ.
ވޯލްޑް ސްޕައިޑާ ކެޓެލޯގް (ޑަބްލިއުއެސްސީ) އަކީ ފައިދިގު މަކުނާ ގުޅޭ މައުލޫމާތު އެއް ކުރާ ބަޔެކެވެ. އެ ތަން ގާއިމްވެފައި ހުންނަނީ ސްވިޓްޒަލޭންޑްގެ ވެރިރަށް ޖެނީވާގެ ނެޗުރަލް ހިސްޓްރީ މިޔުޒިއަމްގަ އެވެ.
ޑަބްލިއުއެސްސީން ބުނީ މިހާތަނަށް ހޯދުނު 50،000 ވަނަ ބާވަތުގެ ފައިދިގު މަކުނަށް ދީފައިވާ ނަމަކީ ޖުރިއުރިއަސް މިނުއާނޯ ކަމަށެވެ. އެއީ ފުންމާ ފައިދިގު މަކުނުގެ ސޯލްޓިސިޑޭ އާއިލާއަށް ނިސްބަތްވާ އެއްޗެކެވެ.
މިހާތަނަށް ހޯދުނު 50،000 ވަނަ ބާވަތުގެ ފައިދިގު މަކުނަށް ދީފައިވާ ނަމަކީ ޖުރިއުރިއަސް މިނުއާނޯ.
އެ ބާވަތުގެ ފައިދިގު މަކުނު އާއްމުކޮށް ފެންނަނީ ދެކުނު ބްރެޒިލް، އުރުގުއާއީ، އަދި އާޖެންޓީނާގެ ބައެއް ހިސާބުތަކުންނެވެ. އޭތި ދިރިއުޅޭ ތިރި ގަސްތަކުގަ އެވެ.
ފައިދިގު މަކުނާ ގުޅޭ ސައިންސް ދިރާސާ ކުރާ އެރެކްނޮލޮޖިސްޓް ކިމްބާލީ އެސް މާޓާ ބުނީ އެ ބާވަތުގެ ފައިދިގު މަކުނަށް ނަން ދިނީ އޭތި އާއްމުކޮށް ދިރިއުޅޭ ސަރަހައްދުގައި މީގެ ކުރިން ދިރިއުޅުނު މިނުއާނޭ ދަރިކޮޅުގެ މީހުންނަށް ނިސްބަތްކޮށް ކަމަށެވެ. އެ ދަރިކޮޅުގެ މީހުން މިހާރު ވަނީ ދުނިޔެއިން ނެތިގޮސްފަ އެވެ.
ސައިންސްގެ އަލީގައި ފައިދިގު މަކުނާ ގުޅޭ ދިރާސާތައް ފެށީ ތާރީހުން އެނގޭ ގޮތުގައި 1757 ވަނަ އަހަރު އެވެ. އޭގެ 265 އަހަރު ފަހުން 50،000 ވަނަ ބާވަތުގެ ފައިދިގު މަކުނު ފެނިފައިވާ އިރު، އެ އަދަދު އަދިވެސް އިތުރުވަމުން ދާނެ ކަމަށް ސައިންސްވެރިން ބުނެ އެވެ.
އެގޮތުން އިތުރު 50،000 ބާވަތުގެ ފައިދިގު މަކުނު ދެނެގަންނަން ހޭދަވާނީ 100 އަހަރަށް ވުރެ ކުރު މުއްދަތެއް ކަމަށް ސައިންސްވެރިން ދެކެ އެވެ.
