އެކުވެރި ނޫން ގައުމުތަކަށް ކާބޯތަކެތި އެކްސްޕޯޓް ކުރުން މޮނީޓާ ކުރާނެ ކަމަށް ރަޝިއާގެ ރައީސް ލެޑިމިއަ ޕުޓިން ވިދާޅުވެއްޖެ އެވެ.
"މި އަހަރު ކާބޯތަކެތީގެ ދަތިކަން މުޅި ދުނިޔެއަށް ވެސް ކުރިމަތިވާނެ ކަމަށް ބެލެވޭތީ، ގައުމުން ބޭރު ކުރާ ސަޕްލައިއާ މެދު ފަރުވާތެރި ވާން ޖެހޭ. އަޅުގަނޑުމެންނާ އެކުވެރި ނޫން ގައުމުތަކަށް އެކްސްޕޯޓް ކުރުން މޮނީޓާ ކުރާނަން،" ދަނޑުވެރިކަމާ ގުޅޭ ބައްދަލުވުމެއްގައި ޕުޓިން ވިދާޅުވި އެވެ.
ރަޝިއާއާ އެކުވެރި ނޫން ގައުމުތަކުގެ ލިސްޓުގެ އެންމެ ކުރީގައި ހިމެނެނީ އެމެރިކާ، ޔޫރަޕިއަން ޔޫނިއަން (އީޔޫ)، ކެނެޑާ، އިނގިރޭސިވިލާތް، އޮސްޓްރޭލިއާ، ނިއުޒީލޭންޑް، ޖަޕާން އަދި ދެކުނު ކޮރެއާ އެވެ.
ޕުޓިން ވިދާޅުވީ ރަޝިއާގެ ރައްޔިތުންނަށް ބޭނުންވާ މިންވަރަށް ވުރެ އިތުރަށް އެ ގައުމުގައި ކާބޯތަކެތި އުފައްދާ ކަމަށާއި އިމްޕޯޓް ކުރުމުގެ ބަދަލުގައި ރަޝިއާގެ ތަކެއްޗަށް އިސްކަން ދިނުމަށް އޮފިޝަލުންނަށް ބާރު އަޅާ ކަމަށެވެ.
ރަޝިއާގެ ސިފައިން ޔޫކްރެއިނަށް އަރައި ކުރަމުންދާ ހަނގުރާމައާ ހެދި ދުނިޔޭގެ ކާބޯތަކެތީގެ ނިޒާމު އޮތީ ބޮޑު ނުރައްކަލެއްގައި ކަމަށާއި ހާލަތު ގޯސް ނުވަނީވެސް އަވަސް ފިޔަވަޅު އަޅަން ޖެހޭ ކަމަށް އދ. އިން މިދިޔަ މާޗް މަހު ބުންޏެވެ.
އދ. ގެ ސެކެޓްރީ ޖެނެރަލް އެންޓޯނިއޯ ގުޓެރޭޒް ނިއު ޔޯކްގައި ނޫސްވެރިންނަށް ވިދާޅުވީ ހަނގުރާމައިގެ ސަބަބުން ދުނިޔޭގެ ކާބޯތަކެތީގެ ސަޕްލައިއަށް ގިނަ ނުރައްކާތަކެއް އެބަ ހުރި ކަމަށާއި އޭގެ އަސަރު އެންމެ ބޮޑަށް ކުރާނީ ފަގީރުންނަށް ކަމަށެވެ.
"މިއީ ހަމައެކަނި ޔޫކްރެއިނާ ހަމައިގައި އޮތް ހަނގުރާމައެއް ނޫން. މިއީ ދުނިޔޭގެ އެންމެ ނާޒުކު ރައްޔިތުންނާއި ގައުމުތަކަށް ވެސް ދެވޭ ހަމަލާއެއް،" ގުޓެރޭޒް ވިދާޅުވި އެވެ.
ގުޓެރޭޒް ވިދާޅުވީ އދ. ގެ ކާބޯތަކެތީގެ އަގުތަކުގެ އިންޑެކްސްގައި ތަކެތީގެ އަގުތައް ރެކޯޑް މިންވަރަށް އުފުލިފައިވާ ކަމަށާއި ދުނިޔޭގެ އެންމެ ފަގީރު 45 ގައުމަށް ބޭނުންވާ ގޮދަން ފުށުގެ ތިންބައިކޮށްފައި އެއްބައި ލިބެނީ ރަޝިއާ ނުވަތަ ޔޫކްރެއިނުން ކަމަށެވެ.
