ރަޝިއާގެ ސިފައިން ޔޫކްރެއިނަށް އަރައި އާއްމު ރައްޔިތުން މަރައި ބޮޑު ގަތުލުއާއްމެއް ހިންގާފައިވާ ކަމަށް ޔޫކްރެއިންގެ ރައީސް ވޮލޮޑިމިރް ޒެލެންސްކީ އދ. ގެ ސަލާމަތީ މަޖިލީހުގައި ވިދާޅުވެއްޖެ އެވެ.
ޒެލެންސްކީ ވިދާޅުވީ ރަޝިއާ ސިފައިންގެ "އުފަލަށްޓަކައި" ގެތަކާއި މަގުތަކާއި ކާރުތަކުގައި ތިބި އާއްމު ރައްޔިތުން މަރާފައިވާ ކަމަށެވެ.
އޭނާ ގޮވާލެއްވީ ސަލާމަތީ މަޖިލީހުން ރަޝިއާ ވަކިކޮށް، ގަތުލުއާއްމު ހިންގާފައި ވާތީ ޖަވާބުދާރީ ކުރުވުމަށެވެ.
ޔޫކްރެއިންގެ ވެރިރަށް ކިޔެވް ކައިރިން ރަޝިއާގެ ފައުޖުތައް ގޮސްފައިވާ އިރު، އެ ސަރަހައްދުގައި ގިނަ ބަޔެއް މަރުވެފައިވާ މަންޒަރު ފޮޓޯތައް އާއްމުވީ ފާއިތުވި ހަފްތާ ބަންދުގަ އެވެ.
ވީޑިއޯ މެދުވެރިކޮށް ސަލާމަތީ މަޖިލީހުގައި ވާހަކަ ދެއްކެވުމަށް ފަހު ޒެލެންސްކީ ވަނީ މަރުވެފައިވާ މީހުންގެ ހަށިތައް ފެންނަ ވީޑިއޯއެއް ދައްކާފަ އެވެ. އެ ވީޑިއޯއިން ފެންނަނީ ބައެއް މީހުންނަށް އަނިޔާކޮށް، ގައިގައި ރޯކޮށްފައިވާ މަންޒަރެވެ.
ރަޝިއާއިން އދ. އަށް ކަނޑައަޅާފައި ހުންނަ ސަފީރު ވަސިލީ ނެބެންޒިއާ ވިދާޅުވީ ރަޝިއާގެ ސިފައިން ގަތުލުއާއްމު ހިންގި ކަމުގެ އެއްވެސް ހެއްކެއް ނެތް ކަމަށެވެ.
"އަނެއްކާވެސް ރަޝިއާގެ ސިފައިންނާއި އަސްކަރިއްޔާއާ ގުޅޭ ގޮތުން މި އިވުނީ ބޮޑެތި ދޮގުތަކެއް،" އޭނާ ވިދާޅުވި އެވެ.
ޒެލެންސްކީ ވިދާޅުވީ މިއީ އދ. އިން ފިޔަވަޅު އަޅަން ޖެހޭ މައްސަލައެއް ކަމަށާއި ފިޔަވަޅު ނާޅާ ނަމަ އދ. އޮތުމުގެ ބޭނުމާ މެދު ސުވާލު އުފެދޭނެ ކަމަށެވެ.
