ރަޝިއާއިން ހަނގުރާމައިގެ ޖަރީމާ އާއި ގަތުލުއާއްމު ހިންގި ނަމަވެސް ސުލްހައިގެ މަޝްވަރާތައް ކުރިއަށް ދާނެ ކަމަށް ޔޫކްރެއިންގެ ރައީސް ވޮލޮޑިމިރް ޒެލެންސްކީ ވިދާޅުވެއްޖެ އެވެ.
ވެރިރަށް ކިޔެވް ކައިރީގައި އޮންނަ ބުޗާ ސިޓީއިން މަރުވެފައިވާ އެތައް ސަތޭކަ އާއްމުންގެ ހަށިތައް ފެނިފައިވާ އިރު، ޒެލެންސްކީ ހޯމަ ދުވަހު އެ ތަނަށް ވަޑައިގެންނެވި އެވެ.
ރަޝިއާ ސިފައިން އެ ސަރަހައްދު ދޫކޮށް ދިޔުމާ އެކު، ޔޫކްރެއިނުން ލިބިފައިވާ ގެއްލުން ބަލަމުން ދަނިކޮށް، ގިނަ އަދަދެއްގެ ހަށިތައް ވަނީ ބުޗާގެ މަގުމަތިން ފެނިފަ އެވެ.
ބުޗާގެ މަގުމަތީގައި އަންދާލާފައި އޮތް ކާރެއް. -- ފޮޓޯ: އީޕީއޭ
އޭގެ އިތުރުން ބޮޑު ވަޅުގަނޑުތަކެއްގައި ވެސް ގިނަ ބަޔެއްގެ ހަށިތައް ހުއްޓައި ފެނުނެވެ. އޭގެ ތެރެއިން ބައެއް މީހުން ތިބީ އަތާއި ފައި ބަނދެފަ އެވެ.
އެގޮތުން ކިޔެވް ވަށައިގެންވާ ސަރަހައްދުން 410 އާއްމުންގެ ހަށިގަނޑުތައް ފެނިފައިވެ އެވެ. ރަޝިއާއިން ގަތުލުއާއްމުގެ ތުހުމަތު ދޮގުކޮށް ބުނީ އެއީ ޔޫކްރެއިން "ސްޓޭޖުކޮށްފައިވާ ތަމްސީލެއް" ކަމަށެވެ.
ބުޗާއަށް ވަޑައިގެން ޒެލެންސްކީ ވިދާޅުވީ ރަޝިއާގެ ސިފައިން އިންސާނުންނާ މެދު އަމަލު ކުރަނީ ޖަނަވާރުންނަށް ވުރެ ވެސް އިހާނެތިކޮށް ކަމަށެވެ.
ރަޝިއާއާ ސުލްހައިގެ މަޝްވަރާ ކުރިއަށް ގެންދާނެތޯ ނޫސްވެރިޔަކު ސުވާލު ކުރުމުން ޒެލެންސްކީ ވިދާޅުވީ ޔޫކްރެއިނަށް ސުލްހަ ކޮންމެހެން ވެސް ބޭނުންތެރި ކަމަށެވެ.
"ސުލްހަ ގެނެވޭތޯ އަސްކަރީ ގޮތުންނާއި ޑިޕްލޮމެޓިކް ގޮތުން ވެސް އަޅުގަނޑުމެންގެ މަސައްކަތް ކުރިއަށް ގެންދާނަން،" ޒެލެންސްކީ ވިދާޅުވި ކަމަށް ބީބީސީގައިވެ އެވެ.
