ރަޝިއާގެ ސިފައިން ޔޫކްރެއިންގައި ގަތުލުއާއްމު ހިންގަމުންދާ ކަމަށާއި މުޅި ޔޫކްރެއިން "ނައްތާލަން" މަސައްކަތް ކުރާ ކަމަށް އެ ގައުމުގެ ރައީސް ވޮލޮޑިމިރް ޒެލެންސްކީ ތުހުމަތު ކުރައްވައިފި އެވެ.
ޒެލެންސްކީ އެހެން ވިދާޅުވި އިރު، ހޮނިހިރު ދުވަހު ވެރިރަށް ކިޔެވް ކައިރިން ގިނަ އަދަދެއްގެ އާއްމުން މަރާލައި، އެއްލާލާފައިވާ ވަޅުގަނޑުތަކެއް ފެނިފައިވެ އެވެ.
"މިއީ ގަތުލުއާއްމު. މުޅި ގައުމާއި ގައުމުގެ ރައްޔިތުން ނައްތާލުމުގެ މަސައްކަތް،" އެމެރިކާގެ ޓީވީ ޗެނަލް ސީބީއެސްގެ "ފޭސް ދަ ނޭޝަން" ޕްރޮގްރާމަށް ޒެލެންސްކީ ވިދާޅުވި އެވެ.
ގިނަ ބަޔެއްގެ ހަށިތައް އަޅާފައިވާ ވަޅުގަނޑުތައް ފެނުމާ އެކު ބައިނަލްއަގްވާމީ މުޖުތަމައިން ވެސް ދަނީ ނުރުހުން ފާޅުކޮށް، ރަޝިއާއާ ދެކޮޅަށް އެޅި ފިޔަވަޅުތައް ވަރުގަދަ ކުރާނެ ކަމަށް ބުނަމުންނެވެ.
ކިޔެވް ކައިރީގައި އޮންނަ ބުޗާ އަވަށުގެ މަގުތައް މަތީގައި ގިނަ ބަޔެއްގެ މަރުވެފައިވާ ހަށިތައް ހުރި މަންޒަރު ފެންނަ ވީޑިއޯތައް އާއްމުވީ ފާއިތުވި ހަފްތާ ބަންދުގަ އެވެ.
ޔޫކްރެއިންގެ އޮފިޝަލަކު ހޮނިހިރު ދުވަހު ވިދާޅުވީ އެ އަވަށުގައިވާ ބޮޑު ވަޅުގަނޑަކުން 280 މީހުންގެ ހަށިގަނޑު ފެނިފައިވާ ކަމަށެވެ.
ނަމަވެސް އާދީއްތަ ދުވަހުގެ ރޭ ޔޫކްރެއިންގެ އޮފިޝަލުން ވިދާޅުވީ ކިޔެވް ސަރަހައްދުން 410 މީހުންގެ ހަށިގަނޑު މިހާތަނަށް ފެނިފައިވާ ކަމަށެވެ.
ގިނަ ތުހުމަތުތަކެއް ކުރެވުނު ނަމަވެސް ރަޝިއާގެ ސިފައިން ބުނީ އާއްމު ރައްޔިތުންނަށް ހަމަލާ ނުދޭ ކަމަށާއި ގަތުލުއާއްމެއް ނުހިންގާ ކަމަށެވެ.
