ރަޝިއާއިން ހިފާފައިވާ ޔޫކްރެއިންގެ ދެކުނުގެ ސިޓީއެއްގައި އޮތް ސުލްހަވެރި އެއްވުމެއްގެ ތެރެއަށް ރަޝިއާ ސިފައިން ބަޑި ޖަހައި ހަތަރު މީހުންނަށް ސީރިއަސް އަނިޔާތަކެއް ލިބިފައިވާ ކަމަށް ޔޫކްރެއިނުން ތުހުމަތުކޮށްފި އެވެ.
ސުލްހަވެރި އެއްވުން ބޭއްބީ އެނެރްހޮޑާރް ސިޓީގަ އެވެ. ޔޫރަޕްގެ އެންމެ ބޮޑު ނިޔުކްލިއާ ހަކަތަ އުފައްދާ ޕްލާންޓް ހުންނަ އެ ސިޓީ ރަޝިއާގެ ކޮންޓްރޯލްގެ ދަށަށް ދިޔައީ މާޗް މަހުގެ ކުރީ ކޮޅު އެވެ. އެ ސިޓީގެ ރައްޔިތުން ހުކުރު ދުވަހު ބޭއްވީ ރަޝިއާއާ ދެކޮޅު އެއްވުމެކެވެ.
ޔޫކްރެއިންގެ އިންސާނީ ހައްގުތަކާ ބެހޭ އޮމްބަޑްސްމަން ލިޔުޑްމިލާ ޑެނިސޯނާ ޓެލެގްރާމްގައި ބުނީ ރަޝިއާގެ ސިފައިން އެ މީހުންގެ ގަޔަށް ބަޑި ޖެހުމުން، ހަތަރު މީހަކަށް ސީރިއަސް އަނިޔާތަކެއް ލިބި ވަރަށް ބޮޑަށް ފިހިފައިވާ ކަމަށެވެ.
ސޯޝަލް މީޑިއާގައި ދައުރުވާ ވީޑިއޯތަކުން ފެންނަނީ އެނެރްހޮޑާރް ސިޓީގެ މައިދާނަކަށް އެއްވެފައި ތިބި މީހުންގެ ތެރެއިން ހުދު ދުންތަކެއް އަރައި ގޮވުންތަކެއް އަޑު އިވެން ފެށުމާ އެކު މީހުން ސަލާމަތް ވާން ދުވާ މަންޒަރެވެ.
ޑެނިސޯވާ ވިދާޅުވީ ބައެއް މީހުން ގަދަކަމުން ސިފައިންގެ އުޅަނދުތަކަށް އަރުވައި، ގެންގޮސްފައިވާ ކަމަށެވެ. އެ މީހުން ގެންދިޔައީ ކޮން ތަނަކަށް ކަމެއް ނޭނގެ އެވެ. އޭނާ ރަޝިއާގެ ސިފައިންނަށް ތުހުމަތު ކުރެއްވީ ސިޓީގެ ރައްޔިތުންނަށް ބިރު ދައްކަމުންދާ ކަމަށެވެ.
މީގެ ކުރިން ހާސަން ސިޓީގައި ވެސް ސުލްހަވެރި އެއްވުމެއްގެ ތެރެއަށް ރަޝިއާ ސިފައިން ބަޑި ޖެހި ކަމަށް ޔޫކްރެއިނުން ތުހުމަތު ކުރި އެވެ.
ޑެނިސޯވާ ވިދާޅުވީ އެނެރްހޮޑާރްގެ މޭޔަރު އައިވަން ސަމޮއިޑިޔުކް ރަޝިއާ ސިފައިން "ރަހީނުކޮށްފައިވާ" ކަމަށާއި އޭނާގެ ހާލަތާ ބެހޭ އެއްވެސް މައުލޫމާތެއް ނޭނގޭ ކަމަށެވެ.
