"އެކުވެރި ނޫން" ގައުމުތަކުން ރޫބްލްސްއިން އަގު ނުދައްކާ ނަމަ ގޭސް ސަޕްލައި ކަނޑާލާނެކަމުގެ އިންޒާރު ރަޝިއާއިން ދީފި އެވެ.
ރައީސް ލެޑިމިއަ ޕުޓިން ސޮއިކުރެއްވި ގަރާރެއްގައި ބުނީ ހުކުރު ދުވަހުން ފެށިގެން ރަޝިއާގެ ގޭސް ގަންނަ ފަރާތްތަކުން ރަޝިއާގެ ބޭންކުތަކުގައި ރޫބްލް އެކައުންޓްތައް ހުޅުވަން ޖެހޭނެ ކަމަށެވެ.
"އެއްވެސް ބަޔަކު އަޅުގަނޑުމެންނަށް ވެސް ހިލޭ އެއްވެސް އެއްޗެއް ނުވިއްކާ. އެހެންވީމާ އަޅުގަނޑުމެން ވެސް ހިލޭ ސާބަހަށް އެއްޗެހި ބަހާކަށް ނޫޅެން. އޭގެ މާނައަކީ މިހާރު ހުރި ކޮންޓްރެކްޓުތައް ހުއްޓާލެވޭނެއޭ،" ޕުޓިން ވިދާޅުވި އެވެ.
ރޫބްލްސްއިން ގޭހަށް އަގު ދައްކަން ޑިމާންޑް ކުރަނީ، ހުޅަނގުގެ ގައުމުތަކުން އަޅާފައިވާ ދަތިކުރުމުގެ ފިޔަވަޅުތަކުގެ ސަބަބުން ކަމަށް ބެލެވެ އެވެ.
ހުޅަނގުގެ ގައުމުތަކާއި ކުންފުނިތަކުން ބުނީ ރޫބްލްސްއިން އަގު ދައްކަން ޑިމާންޑް ކުރުމަކީ ރަޝިއާއިން ސޮއިކޮށްފައިވާ އެއްބަސްވުންތަކާ ހިލާފު ޑިމާންޑު ކަމަށެވެ. އެއްބަސްވުންތަކުގެ ދަށުން އަގު ދައްކަން ކަނޑައަޅާފައި އޮންނަނީ ޔޫރޯ ނުވަތަ އެމެރިކާ ޑޮލަރުންނެވެ.
ފެބްރުއަރީ 24 ވަނަ ދުވަހު ރަޝިއާގެ ސިފައިން އަވައްޓެރި ޔޫކްރެއިނަށް އަރައި ހަނގުރާމަ ފަށާފައި ވާތީ، ހުޅަނގުގެ ގައުމުތަކުން ވަނީ ރަޝިއާއާ ދެކޮޅަށް އިގްތިސާދީ އަދި ވިޔަފާރީގެ ދަތިކުރުމުގެ ފިޔަވަޅުތައް އަޅާފަ އެވެ.
އެމެރިކާ އާއި ކެނެޑާއިން ރަޝިއާގެ ގޭހާއި ތެޔޮ ބޭނުން ކުރުން ހުއްޓާލި ނަމަވެސް، ޔޫރަޕިއަން ޔޫނިއަން (އީޔޫ) އިން އެ ފިޔަވަޅެއް ނާޅަ އެވެ. އީޔޫގެ ގައުމުތަކަށް ބޭނުންވާ ހަކަތަ އުފައްދަން ރަޝިއާގެ ގޭހާއި ތެލުގެ ސަޕްލައިއަށް ވަރަށް ބޮޑަށް ބަރޯސާވެ އެވެ.
އީޔޫއިން ބޭނުން ކުރާ ގޭހުގެ 40 ޕަސެންޓު އަދި ތެލުގެ 30 ޕަސެންޓު ލިބެނީ ރަޝިއާއިންނެވެ. ސަޕްލައި ހުއްޓިއްޖެ ނަމަ، ފަސޭހަކޮށް އެހެން ދިމާލަކުން އެ ތަކެތި ލިބޭނެ ގޮތެއް ވެސް ނެތެވެ. އީޔޫއަށް ގޭސް ފޯރުކޮށްދީގެން ރަޝިއާއިން ކޮންމެ ދުވަހަކު ވެސް 400 މިލިއަން ޔޫރޯ ލިބެ އެވެ.
ޖަރުމަނުވިލާތުން ބުނީ ޕުޓިން ސޮއިކުރެއްވި ގަރާރަކީ "ބްލެކްމެއިލް" ކުރުމުގެ އަމަލެއް ކަމަށެވެ. އެ ގައުމުގެ ޗާންސެލަރު އޯލާފް ޝޯލްޒް ވިދާޅުވީ ޖަރުމަނު ކުންފުނިތަކުން އަމަލު ކުރާނީ އެއްބަސްވުންތަކާ އެއް ގޮތަށް ކަމަށާއި އަގު ދައްކާނީ ޔޫރޯއިން ކަމަށެވެ.
ގޭސް ސަޕްލައި ހުއްޓިދާނެ ކަމަށް ބަލައި، ޖަރުމަނުވިލާތާއި އޮސްޓްރިއާއިން އަންނަނީ ފިޔަވަޅު އަޅައި، ރައްޔިތުން ތައްޔާރުވެ ތިބުމަށް އަންގަމުންނެވެ.
ޖަރުމަނުވިލާތަށް ބޭނުންވާ ގޭހުގެ 50 ޕަސެންޓާއި ތެލުގެ 30 ޕަސެންޓް ރަޝިއާއިން ހޯދާ އިރު، ސަރުކާރުން ރައްޔިތުންނާއި ކުންފުނިތަކަށް ގޮވާލީ ހަކަތަ ބޭނުން ކުރުން މަދު ކުރުމަށެވެ. ހާލަތު ގޯސްވަމުންދާ ނަމަ ގޭސް ރޭޝަން ކުރަން ވެސް އެ ދެ ގައުމުން އޮތީ ތައްޔާރަށެވެ.
